SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 132 - Bokyi Bible

Byikpee n̂g Kiǐtí-Kyise-Kyifen-Osówo echi

¹ Óburúkpâbí, *daráp Otu Dívit* ne kángkáng afaníkong emen nyí nyǐ o/ri*.

² Óburúkpâbí, zîim ńkyí Otu Dívit o/ryí ocím. Ocím mú nyǐ o/sem ǒ wo, Osówo mú Jekôp, mú a/rêe a-shwôm, o/fu,

³ me mm*ba/chi n-dim dyijê* n-rí nang sáre*.

⁴ Me mm*ba/chi n-jáng* n-rê nang burê*

⁵ tete n-chi kyikit n-tî Óburúkpâbí, kyise ńkyí Osówo mú Jekôp mú o/rêe o-shwôm.

⁶ Be byi/jwo ké Bételehêm kyi-kim ne mkpukpu-byěm-Osówo, ne be byi/ri kámú ké byifát ḿbyí Jeryím.

⁷ Byi/raa byi/fu, bâ n̂g byi-dim byi-wâa ké kyise-Óburúkpâbí. Bâ n̂g byi-kye ǎ ofê ké kakyúng-butu emen.

⁸ Óburúkpâbí, bâ ne mkpukpu-byěm eyên mú mu o-tông ng busa eyên ké kiǐtí-kyise-kyifen eyên echi a-kûkyú nyín ne banyá.

⁹ Kyi/bát banchi kyifen eyên bakûchi ńkyí nkyi kanong kángkáng nkéré. Kyi/bát banet eyên bajêe ne ejá kyíbóng kyíbóng.

¹⁰ Wo a/ryí Otu Dívit mú ḿgbán eyên ocím. Óburúkpâbí, *dané otu eyên mú wo a/cá*.

¹¹ Wo a/ryí Otu Dívit ocím mú ntûntû, ocím mú wo aa*ba/chi a-bírî kámú esim*. Wo a/raa a/fu, me n/chi n-chi wǎn-onyinchéng eyên obónge otu, ne nyǐ o/chi o-kúng kakyúng-butu eyên.

¹² Bwǎn emen to ba/chi ba-kúng kyikit eyên kángkáng nkéré wǎ batu, â ba/chi ba-tî ocím mú ba/ryí ba-sem mě, ne byije ejí ḿbyí n/kye kámbé.

¹³ Óburúkpâbí oo/cá Záyon. Nyǐ mu o-ryuu ng o/fu, nyǐ o-chi i Záyon oshê emen. Nyǐ o/fu,

¹⁴ nyín něen kyikit ńkyí me n/chi n-kyú ne banyá. Nyín něen nké me n/fu, n-kyú u otu.

¹⁵ Me n/chi n-kye Záyon kángkáng byěm ḿbyí nyǐ mu o-ryuu ng. Me n/chi n-kye banet emen ḿbé mbe kyikpu byiryíng ba-ryí ba-zût.

¹⁶ Me n/chi n-jware banchi kyifen-Osówo emen ké kángkáng byěm ḿbyí mbé mbe ba-chi i, ne banet emen ba/chi ba-kwán ekwan ba-jêe ne ejá kyíbóng kyíbóng.

¹⁷ Nyín něen nké me n/chi n-chi wǎn-Otu Dívit obónge otu mú kiǐtí. Nyín něen nké me n/chi n-tî butu ḿbú otu ejí mú n/cá.

¹⁸ Me n/chi n-fé banet-bushwôn emen éshwân ké byiko, ne butu ḿbú emen bu/chi bu-já byěm chwóó.