SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 119 - Bokyi Bible

Byije ḿbyí Óburúkpâbí

¹ Bunyîn-dyityém mbu ne banet ḿbé akpen ebe a*fí ne kyibî* ḿbé mbe ba-kyú u akpen wǎ eringe nyí byije ḿbyí Óburúkpâbí byi/sét.

² Bunyîn-dyityém mbu ne banet ḿbé mbe ba-chi i ńkyí nyǐ mu o-sét ng, ḿbé mbe ba-chi i ne atyém ebe kángkáng ńkyí nyǐ o/fu, bachi.

³ Banet ámbe baa*chi kyibî-chwǒm*. Mbé mbe ba-cen n ké akwóp nyí Óburúkpâbí.

⁴ Óburúkpâbí, wo aa/kye bě byije eyên ne a/sét bě a/fu, be byifé dyityém ké mbyí byi-chi eringe nyí byi/sét.

⁵ Me n/kabe n/fu, n-fâ dyityém n-tî byiraa eyên ḿbyí amu a-sét ng.

⁶ Baa*ba/chi ba-fé mě éshwân* â me n/tî atông ké kángkáng byije eyên*.

⁷ Wǎ eringe nyí mu n-kwâa ng bampan ḿbé amu a-két ng kerededet, me n-kyâ ǒ akpee ne dyityém ńdyí kpárám.

⁸ Me n-tî ng byije eyên. *Da mě emîng*.

Byije ḿbyí Óburúkpâbí etî

⁹ Kyisu-onyinchéng kyi-cen n nǎ ne o-tî dyikpen emen kpárám. O-man n etî kándyí â mu o-chi i ńkyí byije eyên byi/sét.

¹⁰ Me mu n-kan n n/fu, n-fâ ǒ ne dyityém ejí kángkáng. *Da mě emîng n-né echi ńkyí byije eyên byi/sét*.

¹¹ Me mu n-tî ng byije eyên ké dyityém ejí eringe nyí me nn*chi kyibî ké bushú eyên*.

¹² Ô Óburúkpâbí, me mu m-kpee ng ǒ. Tángê mě akwóp eyên.

¹³ Me mu n-sét ng banet kángkáng byije ḿbyí wo aa/kye.

¹⁴ Nkyi kyi-nyîn n mě ńkyí ndachi ńkyí byije eyên byi/sét kyi-shwôm ńkyí ndajá esang chwóó.

¹⁵ Me mu n-kwâa ng byiraa eyên ḿbyí amu a-sét ng. Me mu m-kpúrî ng byěm eyên ḿbyí amu a-tángê e.

¹⁶ Me mu n-já ng bunyîn-dyityém ké byije eyên. Me mm*ba/chi n-ráp byije eyên*.

Bunyîn-Dyityém ké Byije ḿbyí Óburúkpâbí

¹⁷ Nwa dyityém ne me mú ḿgbán eyên eringe nyí me ndakpen n-chi ḿbyí amu a-tángê e.

¹⁸ Bâa achi ejí eringe nyí me ndari biǐtí-ntûntû mú mu ké byije eyên.

¹⁹ Me mu nyín ké ejíí ké kaǎnyín-nkéré. *Da mě erôo byije eyên*.

²⁰ Dyityém ejí dyi-kú dyi-sung ng ké káryúryú. Me mu n-ryuu ng n/fu, nnyît byije eyên kángkáng nkéré.

²¹ Wo amu a-raa ng ne bantông byiko, a-shú u to banet ḿbé ba*fí ba-chi i ńkyí byije eyên byi/sét*.

²² Nyii mě ké ecábé ne edángé ebe nyí mbe ba-kyâ mě, ké nǎ, me nn/tî byije eyên.

²³ Batu mbe ba-cibi ng ba-nam m mě, nké me n-kwâa ng byěm eyên ḿbyí amu a-tángê e.

²⁴ Byiraa eyên ḿbyí amu a-sét ng mbyi byi-kyâ mě bunyîn-dyityém. Mbyí nké mbyi mě wǎ banet-bacê ejí.

Dyityém etî ké Byije-Óburúkpâbí etî

²⁵ Me mm/myii ké édúkǎndú ké baa/kpógê mě. Chi mě m-bûu wǎ eringe nyí wo a/ryí ocím.

²⁶ Me n/sét ǒ kángkáng byěm ḿbyí me nn/chi, ne wo a/faa mě ojá. Tángê mě akwóp eyên.

²⁷ Chwáp mě eringe nyí me ndanyît kyikû-byije eyên, ne me n/chi n-kûkabe kyi-kim ne biǐtí-byěm eyên [ḿbyí amu a-tángê e.]

²⁸ Bafip baa/shwôm mě busa. Chi mě n-shwane wǎ eringe nyí wo a/ryí ocím.

²⁹ *Da mě emîng n-fín bukwóp eyên*. Tángê mě byije eyên ké kanong eyên.

³⁰ Me mm/bángê n/fu, n-kû ng echi ńkyí a/sét. Me nn/tî atông ké byije eyên.

³¹ Óburúkpâbí, me nn/koo byiraa eyên. *Da mě emîng ba-fé mě éshwân*.

³² Me n/chi n-chi babap ńkyí byije eyên byi/sét, ké nǎ, wo a/chi a-chî mě ekye bubong chwóó.

Nshwam-Kyikû-Byěm enyît

³³ Óburúkpâbí, tángê mě kyikû ńkyí byije eyên ne me n/chi n-chi eringe nyí byi/sét kángkáng nkéré.

³⁴ Sét mě wááng eringe nyí byije eyên mbyi, ne me n/chi n-chi eringe nyí byi/sét. Me n/chi n-tî kámbyí ne dyityém ejí kángkáng.

³⁵ Tông mě bukwóp ḿbú ndatî byije eyên, ké nǎ, ké mbyí nké mu n-ri ng bunyîn-dyityém.

³⁶ Kye mě dyityém ńdyí ndatî byije eyên, *chí ńdyí ndajá esang*.

³⁷ *Da mě emîng n-tî dyityém ké chwǒm ńkyí kyi*fí ké chwǒm*. [Nwa dyityém ne me eringe nyí wo aa/ryí ocím.]

³⁸ Tî ocím eyên mú a/ryí ne me, me mú ḿgbán eyên, ocím eyên mú a/ryí banet ḿbé mbe ba-chi i ńkyí a/sét.

³⁹ Chi mě n-fem ké ecábé nyí mu n-shî ng. Mpan ekét eyên mu kiǐtí kanong kanong.

⁴⁰ Me mu n-ryuu ng n/fu, n-chi i eringe nyí byije eyên byi/sét. Kye mě dyikpen ńdyí dyifyîfî, ké nǎ, wo amu a-chi i kanong.

Dyityém etî ké Byije ḿbyí Óburúkpâbí

⁴¹ Óburúkpâbí, tông mě eringe kyijé eyên kyi/jê ne me, a-nyii mě eringe nyí a/ryí ocím.

⁴² Ne me kâng n/chi m-man n efaa banet ḿbé mbe ba-kyâ mě edángé ojá, ké nǎ, me mu n-tî ng dyityém ké ejá eyên.

⁴³ Chwáp mě n-sét ntûntû kángkáng nkéré, ké nǎ, dyityém ejí ndyi ké byije eyên.

⁴⁴ Me kángkáng nkéré n/chi n-chi eringe nyí byije eyên byi/sét ne banyá ne banyá.

⁴⁵ Me n/chi n-kyú ké byiko ejí, ké nǎ, me mu n-kan n echi eringe byěm ḿbyí amu a-tángê e.

⁴⁶ Me n/chi n-sét batu byije eyên ne éshwân ee*ba/chi e-chi mě*.

⁴⁷ Me mu n-ri ng bunyîn-dyityém ké byije eyên etî, ké nǎ, mbyí mbyi byi-jê ng mě.

⁴⁸ Me mu n-fâ byije eyên, ne mbyí mbyi byi-jê ng mě. Me n/chi n-kabe kyi-kim ne byěm ḿbyí amu a-sét ng.

Obánge ké Byije ḿbyí Óburúkpâbí

⁴⁹ Zîim ocím eyên mú a/ryí ne me mú ḿgbán eyên. Oo/kye mě okabe etî.

⁵⁰ Nang ké busông ejí, me m/mû ké bunyîn-dyityém, ké nǎ, ocím eyên eryí o/kye mě dyikpen.

⁵¹ Bantông byiko mbe ba-cábê ng mě kángkáng nkéré, nké me n*da/mîng ne byije eyên*.

⁵² Ô Óburúkpâbí, me mu n-zîim m bampan eyên ekét ḿbé aje nyí a/shwôm ké esim, ne mbé mbe ba-fâ mě dyityém.

⁵³ Kafâ ka-sa ng mě ké nkéré ndari bambên atyém ba-bên n byije eyên.

⁵⁴ Ké dyikpen ejí, me mu n-kwán n ekwan kyi-kim ne byije eyên.

⁵⁵ Óburúkpâbí, me mu n-zîim m ǒ ne buchú, ne mu n-kabe ng kyi-kim ne byije eyên.

⁵⁶ Me mu n-ri ng bunyîn-dyityém ejí ké byije eyên etî.

Ofê ekye ké Byije ḿbyí Óburúkpâbí

⁵⁷ Ô Óburúkpâbí, wo amu kángkáng ńkyí [mu n-ryuu ng.] Me n/ryí ocím n/fu, n-tî ng byije eyên.

⁵⁸ Me mu m-bí ng ǒ ne dyityém ejí kángkáng n/fu, ri mě bafip wǎ eringe nyí wo aa/ryí ocím.

⁵⁹ Me nn/kabe kyi-kim ne édúú ejí, ne mu n-ryí i ocím n/fu, n-chi i eringe nyí amu a-sét ng.

⁶⁰ Me mm*bên nkéré ké byije eyên etî*.

⁶¹ Bambên atyém baa/kuu kaǎtám ba-tî mě, nké me n*fí n-ráp ng byije eyên*.

⁶² Me mu n-jwóbê ng ké kyirê-buchú n-kye ǒ akpee ké bubwô ḿbú bampan ḿbé amu a-két ng kerededet.

⁶³ Me n-chi i ocín mú kángkáng banet ḿbé mbe ǒ bǎmgbán, ne ḿbé mbe ba-tî ng byije eyên.

⁶⁴ Óburúkpâbí, ejíí ee/sú ne kyijé eyên ńkyí kii*man*. Tángê mě byije eyên.

Byije ḿbyí Óburúkpâbí mbyi Kiǐtí

⁶⁵ Óburúkpâbí, wo aa/tî ocím eyên mú a/ryí, ne wo a/nwa dyityém ne me mú ḿgbán eyên.

⁶⁶ Kye mě bubong ne byinyídíng, ké nǎ, me [mu n-tî ng dyityém ké] byije eyên.

⁶⁷ Me m/mû n-fwam m eróng, ne wo a-kû mě ekye busông, nké kántîk me mu n-chi i eringe nyí wo amu a-sét ng.

⁶⁸ Wo a/nwa ne a/cángê dyityém kanong kanong. Tángê mě byije eyên.

⁶⁹ Bantông byiko baa/sét byisédéng byi-kim ne me, nké me mu n-chi i ńkyí wo amu a-sét ng ne dyityém ejí kángkáng.

⁷⁰ Banet ḿbén ba*fí ne dyishí* nké me mu n-ri ng bunyîn-dyityém ké byije eyên.

⁷¹ Busông ejí bu/mû kanong ne me, ké nǎ, bu/chi mě n-kwâa byije eyên.

⁷² Byije ḿbyí wo a/kye mbyi mě kiǐtí byi-shwôm kángkáng akpuga nyí nyi ké ejíí.

Ntûntû mú Byije ḿbyí Óburúkpâbí

⁷³ Wo a/mee mě [a-tî mě kanong.] Kye mě bubong eringe nyí ndakwâa byije eyên.

⁷⁴ Banet ḿbé mbe ba-kyâ ǒ ofê ba/chi ba-kyú ké bunyîn-dyityém ké nkéré baa/ri mě, ké nǎ, me mu n-tî ng dyityém ké ocím eyên mú a/ryí.

⁷⁵ Óburúkpâbí, me mu n-nyît ng n/fu, amu a-két ng bampan kanong, ne wo a/kye mě busông, ké nǎ, wo a-tî ng ocím eyên mú a/ryí.

⁷⁶ Mîng kyijé eyên ńkyí kii*man* kyi-fé mě dyityém wǎ eringe nyí a/ryí mě ocím, me mú ḿgbán eyên.

⁷⁷ Ri mě bafip ne me n/chi m-kpen, ké nǎ, bunyîn-dyityém ejí mbu ké byije eyên.

⁷⁸ Kyi/bát éshwân ewuri bantông byiko ké ńkyí mbe ba-bât ng mě dyikáá. Wǎ ké byiko ejí, me n/chi n-kûkabe kyi-kim ne ḿbyí amu a-sét ng.

⁷⁹ Kyi/bát banet ḿbé mbe ba-kyâ ǒ ofê ne kángkáng ḿbé mbe ba-nyît ng byije eyên babâ ba-kâm mě.

⁸⁰ Kyi/bát ntî byije eyên kerededet eringe nyí éshwân ee*wuri mě*.

Nshwam-Onyii

⁸¹ Óburúkpâbí, me nn/kyee ké obâm mú mu m-bám m n/fu, nyii mě. Me mu n-tî ng dyityém ejí ké byiraa eyên.

⁸² Achi ejí aa/kyee etún ké ńkyí wo a/ryí ocím. Me mu m-bí ng n/fu, wo a-chwáp ng mě nkéré orá.

⁸³ Me n/firi wǎ biǐfâa-byiféng-bato ḿbyí baa/twóp, nang ké nkyi éné, me n*da/ráp ne byije eyên*.

⁸⁴ Me n-chîbám ka-bwon nǎ. Nkéré orá mú wo a/chi a-pan banet ḿbé mbe ba-kyâ mě busông mpan.

⁸⁵ Bantông byiko-banet ḿbé ba*fí ba-tî ng byije eyên* baa/sím abíng nyí bada mě ekám.

⁸⁶ Kángkáng byije eyên mbyi ntûntû. Banet mbe ba-kyâ mě busông ké byisédéng, chwáp mě.

⁸⁷ Kyi/waa kaǎnyín ba-ju mě, nké me n*da/né ne byije eyên*.

⁸⁸ Ké bubwô-kyijé eyên ńkyí kii*man* [nwa dyityém ne me] eringe nyí ndatî byije eyên.

Dyityém efé ké Byije ḿbyí Óburúkpâbí

⁸⁹ Ô Óburúkpâbí, ejá eyên e-waa ng kyíbóng ne banyá.

⁹⁰ Wo a-tî ng ocím eyên mú a/ryí kángkáng nkéré. Wo aa/tî esí ké kyikit ńkyí nyi, ne nyǐ e-waa ányi.

⁹¹ Kángkáng byěm ḿbyí a/chi byi/waa tete kurún ké bubwô-busa eyên ḿbú a/kye, ké nǎ, mbyí kángkáng byi-chi i bǎmgbán eyên.

⁹² Â byije eyên byi/mû byi*fí chwǒm ńkyí bunyîn-dyityém ejí mbu bu-fím m* něen m/mû mm/kpú ké busông ejí.

⁹³ Me nn*ráp byije eyên ne banyá* ké nǎ, ké mbyí, wo aa/tî mě okpó.

⁹⁴ Me n/já ǒ wo. Nyii mě. Me nn/kan byije eyên etî.

⁹⁵ Bambên atyém mbe ba-bám m ba/fu, mbé ba-ju ng mě, nké me mu n-kabe ng kyi-kim ne byije eyên.

⁹⁶ Me nn/kwâa n-nyît n/fu, kángkáng byěm [mbyi ne bunyerenyere, nké byije eyên mbyi kerededet.]

Kyijé etông ké Byije-Óburúkpâbí

⁹⁷ Byije eyên byi-jê ng mě kanong kanong. Me mu n-kabe ng kyi-kim ne mbyí dyicí dyimúmú.

⁹⁸ Byije eyên mbyi mě ké dyityém kángkáng nkéré, ne mbyi byi-chi i mě n-já bubong n-shwôm banet-bushwôn ejí.

⁹⁹ Me mu ne bubong ḿbú ndajwo n-shwôm bantánge ejí, ké nǎ, me mu n-kabe ng kyi-kim ne byiraa ḿbyí amu a-sét ng mě.

¹⁰⁰ Me mu ne bubong n-shwôm bakínkán, ké nǎ, me mu n-chi i wǎ eringe byije eyên byi/sét.

¹⁰¹ Me mm/mîng kángkáng byibî-édúú, ké nǎ, me mu n-ryuu ng n/fu, n-chi i eringe a/sét.

¹⁰² Me n*da/né echi ńkyí wo a/sét* ké nǎ, wo oyén nké amu ntánge ejí.

¹⁰³ Byěm ḿbyí amu a-sét ng mě mbyi byi-nyîn n byi-shwôm bakút-bukwan.

¹⁰⁴ Me mu n-já ng bubong ké bubwô-byije eyên. Ké bubwô ámbu, kángkáng byibî-édúú byi-sa ng mě kafâ.

Kiinwángé ńkyí nkyi kyi-fím m ké Byije ḿbyí Óburúkpâbí

¹⁰⁵ Ejá eyên nyi mě wǎ kiinwángé-otyuryíkáng ńkyí kyida mě etông kiǐfáng.

¹⁰⁶ Me n/chi n-tî ocím ejí mú n/ryí ntûntû n/fu, n-chi i eringe byiraa eyên ḿbyí ntûntû byi/sét.

¹⁰⁷ Afaníkong ejí aa*nwa eri* ǎ Óburúkpâbí. Tî mě okpó wǎ eringe a/ryí ocím.

¹⁰⁸ Ô Óburúkpâbí, koo banshwam-asǎma ekó ejí, a-tángê mě byije eyên. [

¹⁰⁹ Me kángkáng nkéré mm/kpá byiko ḿbyí nang bukyû ekpú. Me] n*da/ráp ne byije eyên*.

¹¹⁰ Byibî-banet byi/kuu kaǎtám byi-tî mě, nké me n*da/né ne echi ńkyí byije eyên byi/sét*.

¹¹¹ Byije eyên nké mbyi mě byěm ejí ḿbyí ne banyá. Mbyí nké mbyi byi-kyâ dyityém ejí bunyîn-dyityém.

¹¹² Me mm/bángê n/fu, n-chi i eringe byije eyên byi/sét tete dyicí ndakpú.

Bushî bu*fí ké Byije ḿbyí Óburúkpâbí*

¹¹³ Banet ḿbé mbe ne atyém afee kyi-kim ne wo baa*nyîn mě* nké byije eyên mbyi byi-jê ng mě.

¹¹⁴ Wo nké amu a-ku ng mě ne amu kyikit-dyirem ejí. Me mu n-tî ng achi ejí ké ocím eyên mú a/ryí.

¹¹⁵ Dim m̂ mě ké bushú, ben banet ḿbé bamu ba-chi i byibî. Me n-tî ng byije ḿbyí Osówo ejí.

¹¹⁶ Kye mě busa eringe nyí wo a/ryí ocím, ne me n/chi m-kpen. *Damîng achi etî ejí a-waa mě kyísí dyikáá*.

¹¹⁷ Níbî mě eringe n/chi n-fem, ne me n/chi n-tî dyityém ké byije eyên kángkáng nkéré.

¹¹⁸ Wo amu a-né ng nang yeě mú o*fí o-tî ng byije eyên*. Byibî-ekabe ebe byi-waa ng kyísí dyikáá. [

¹¹⁹ Wo amu a-kúng ng bambên atyém wǎ] biǐbyém ḿbyí badapwó, ne ké bubwô ámbu, byěm eyên ḿbyí amu a-sét ng mbyi byi-jê ng mě.

¹²⁰ Ké bubwô eyên, me mu n-shî ng. Bushî boo/sú mě ké byiko ké bubwô-bampan ḿbé amu a-két ng.

Byije etî ḿbyí Óburúkpâbí

¹²¹ Me nn/chi ńkyí nkyi ochíchí ne ńkyí nkyi kanong. *Da mě emîng ké abwô nyí banet-bushwôn ejí*.

¹²² Ryí ocím a/fu, wo a-chwáp ng ḿgbán eyên. *Damîng bantông byiko ba-cít mě*.

¹²³ Achi ejí aa/kyee ebám ochwâp eyên mú wo a/ryí ocím.

¹²⁴ Tî mě eringe nyí kyijé eyên ńkyí kii*man* a-tángê mě byije eyên.

¹²⁵ Me n-chi i ḿgbán eyên. Kye mě bubong eringe nyí ndanyît byěm eyên ḿbyí amu a-tángê e.

¹²⁶ Óburúkpâbí, nkéré oo/fyi mú adachi chwǒm, ké nǎ, banet ba*fí ba-tî ng byije eyên*.

¹²⁷ Byije eyên mbyi byi-jê ng mě byi-shwôm gûl nang o-nwa nǎ.

¹²⁸ Ké bubwô ámbu, me mu n-chi i [kángkáng byěm ḿbyí amu a-sét ng.] Kángkáng akwóp nyí aa*nwa* a-sa ng mě kafâ.

Okabe mú Byije-Óburúkpâbí etî

¹²⁹ Byěm eyên ḿbyí amu a-tángê e bii*nwa eri*. Me mu n-chi i eringe byi/sét ne dyityém ejí kángkáng.

¹³⁰ Kyikû-byěm ḿbyí amu a-tángê e mbyi byi-tông ng kiinwángé, ne mbyi byi-kyâ banet ḿbé baa*nyît chwǒm* bubong.

¹³¹ Me mu n-shû ng kiǐnjáng ocím fúú, ké nǎ, me mu n-ryuu ng byije eyên.

¹³² Bírî a-kâm mě a-ri mě bafip wǎ eringe nyí amu a-ri ng banet ḿbé wo amu a-jê ng kámbé.

¹³³ *Dabángê byibî byi-koo mě busa*. *Da mě emîng n-róng* wǎ eringe nyí a/ryí ocím*.

¹³⁴ Nyii mě ké abwô nyí banet ḿbé mbe ba-cít ng mě, eringe nyí me n/chi m-man echi ńkyí byije eyên byi/sét.

¹³⁵ Tông mě bushú eyên, a-jware mě, a-tángê mě to byije eyên.

¹³⁶ Batíí mbe ba-byí i mě ba-pwó ng kyísí wǎ kace, ké nǎ, banet ba*fí ba-chi i ńkyí byije eyên byi/sét*.

Byije-Óburúkpâbí bii*ryí Acît*

¹³⁷ Óburúkpâbí, wo amu a-chi i kanong. Byije eyên bii*ryí acît*.

¹³⁸ Byije eyên ḿbyí a/kye byi/tyeem, ne mbyi kanong.

¹³⁹ Dyityém ejí ndyi dyi-mang ng mě wǎ okwâ, ké nǎ, banet-bushwôn ejí mbe ba-kúng ng byije eyên fúú.

¹⁴⁰ Ocím eyên mú a/ryí, nang ké mu ké kafâ ntûntû, o-jê ng mě kanong kanong.

¹⁴¹ Me n*fí kiǐtí-onet* ne baa*kúng mě wǎ chwǒm* nké me n*fí n-né ng byěm ḿbyí amu a-tángê e mě*.

¹⁴² Kanong eyên ńké amu a-chi i ka/chi ka-waa ne banyá, ne byije eyên kángkáng nkéré mbyi ntûntû.

¹⁴³ Afaníkong ne káryúryú bii/sú mě ké byiko, nké byije eyên mbyi byi-kyâ mě bunyîn-dyityém.

¹⁴⁴ Byiraa eyên ḿbyí amu a-sét ng mě mbyi ntûntû kángkáng nkéré. Kye mě bubong ḿbú ndajwo, ne me n/chi m-kpen.

Nshwam-Onyii

¹⁴⁵ Me mu n-kó ng ǒ ne dyityém ejí kángkáng. Óburúkpâbí, faa mě ojá, ne me n/chi n-tî byije eyên.

¹⁴⁶ Me mu n-kó ng ǒ. Nyii mě, ne me n/chi n-tî byije eyên.

¹⁴⁷ Me mu n-jwóbê ng ne dyicí dyi-kûwángê, n-kó ǒ n/fu, chwáp mě. Me mu n-tî ng achi ejí ké ocím eyên mú a/ryí.

¹⁴⁸ Buchú bumúmú me mu sáre achi fúú, n-kabe ng kyi-kim ne byiraa eyên ḿbyí amu a-sét ng.

¹⁴⁹ Ô Óburúkpâbí, ké bubwô ḿbú kyijé eyên ńkyí kii*man* jwo mě. Byiko byikpú ǒ a-tî dyikpen ejí kanong.

¹⁵⁰ Bambên atyém ḿbé mbe ba-kyâ mě busông mbe ba-fárâng ng mě ba-bâ, ḿbé mbe banet ḿbé ba*fí ba-tî ng byije eyên*.

¹⁵¹ Nké wo, ǎ Óburúkpâbí, amu mě fáráng, ne byije eyên kángkáng mbyi ntûntû.

¹⁵² Me n/kwâa ké aje nyí a/shwôm ké esim kyi-kim ne byiraa eyên ḿbyí amu a-sét ng. Wo a/chi kámbyí byi-waa ne banyá.

Arông etîm nyí Ochwâp

¹⁵³ Ri busông ejí a-nyii mě, ké nǎ, me n*da/ráp byije eyên*.

¹⁵⁴ Bwom mě ké esim, a-chi mě n-fem. Nyii mě eringe nyí a/ryí ocím.

¹⁵⁵ Bambên atyém baa*já onyii* ké nǎ, mbé ba*fí ba-tî ng byije eyên*.

¹⁵⁶ Nké bafip ḿbé amu a-ri ng banet, ǎ Óburúkpâbí, ba/rêe ba-shwôm. Ri mě bafip a-nyii mě.

¹⁵⁷ Me mu ne banet-bushwôn chwóó ne banet ḿbé mbe ba-cít ng mě, nké me n*fí m-mîng ng byije eyên etî*.

¹⁵⁸ Nkéré m/bírî achi n-ri bannîm banet, kyi*da mě enyîn* ké nǎ, mbé ba*fí ba-tî ng byije eyên*.

¹⁵⁹ Óburúkpâbí, ri eringe byiraa eyên ḿbyí amu a-sét ng mbyi byi-nyîn n mě. Kyijé eyên kii*yángê ne banyá*. Ké bubwô ámbu, nyii mě.

¹⁶⁰ Dyishí-byije eyên ndyi [ntûntû], ne kángkáng bampan ḿbé amu a-két ng ba-bwom m ké ntûntû ne banyá.

Byije-Óburúkpâbí efé

¹⁶¹ Banet-busa mbe ba-nwa ng ne me dyikáá, nké me mu n-fâ byije eyên.

¹⁶² Me mu ké bunyîn-dyityém kanong kanong ké bubwô-ecím eyên nyí a/ryí. Me mu ké bunyîn-dyityém wǎ onet mú o/koo byěm ké byití.

¹⁶³ Kángkáng byisédéng byi-sa ng mě kafâ ne nn*ryuu kámbyí* nké byije eyên mbyi byi-jê ng mě.

¹⁶⁴ Kángkáng dyicí, me mu n-kó ng ǒ asǎma kampén bujam ké bampan ḿbé amu a-két ng kerededet.

¹⁶⁵ Banet ḿbé byije eyên mbyi byi-jê ng kámbé ba*fí ne chwǒm ńkyí badashî* ne chwǒm kyi*fí ńkyí kyidachi kámbé ba-róng*.

¹⁶⁶ Óburúkpâbí, me mu m-bám m ǒ n/fu, nyii mě, ne me n-chi i ńkyí wo a/kye busa.

¹⁶⁷ Me mu n-chi i byěm ḿbyí wo amu a-tángê e. Mbyí mbyi byi-jê ng mě ne dyityém ejí kángkáng.

¹⁶⁸ Me mu n-tî ng byije eyên ne byiraa eyên ḿbyí amu a-sét ng. Wo amu a-ri ng kángkáng byěm ḿbyí mu n-chi i.

Nshwam-Ochwâp

¹⁶⁹ Óburúkpâbí, mîng bukyû ejí ḿbú mu n-tii ng n-kó ng ǒ n/fu, chwáp mě, bu-kâm ǒ. Kye mě bubong eringe nyí wo a/ryí ocím.

¹⁷⁰ Fwôo atông a-jwo nshwam ejí, a-nyii mě eringe nyí a/ryí ocím.

¹⁷¹ Me n/chi m-kpee ǒ kángkáng nkéré, ké nǎ, wo amu a-tángê e mě byije eyên.

¹⁷² Me n/chi n-kwán ekwan-akpee kyi-kim ne byije eyên, ké nǎ, byije eyên bii*ryí acît*.

¹⁷³ Kpá byiko kángkáng nkéré ḿbyí ada mě echwáp, ké nǎ, me mu n-chi i ńkyí byije eyên byi/sét.

¹⁷⁴ Ô Óburúkpâbí, me mu n-ryuu ng ochwâp eyên. Me mu n-já ng bunyîn-dyityém ké byije eyên.

¹⁷⁵ Kye mě dyikpen eringe nyí nda ǒ ekpee. Kyi/bát byiraa eyên ḿbyí amu a-sét ng byichwáp mě.

¹⁷⁶ Me mu n-yêe ng wǎ etám-ebû nyí ee/tánê. Ké bubwô ámbu, bâ a-kyé mě me mú ḿgbán eyên, ké nǎ, me n*da/ráp byije eyên*.