SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 118 - Bokyi Bible

Nshwam-Asǎma ekó ké Okpóge

¹ Kó n̂g Óburúkpâbí asǎma, ké nǎ, nyǐ o/nwa, ne kyijé emen kyi-waa ng ne banyá.

² Kyi/bát banet ḿbé Ézerel baraa ba/fu, kyijé emen kyi-waa ng ne banyá.

³ Kyi/bát banchi kyifen ḿbé Osówo baraa ba/fu, kyijé emen kyi-waa ng ne banyá.

⁴ Kyi/bát kángkáng banet ḿbé mbe ba-kyâ ǎ ofê baraa ba/fu, kyijé emen kyi-waa ng ne banyá.

⁵ Me n/kó Óburúkpâbí ké busông ejí. Nyǐ o/faa mě ojá, ne o/chi mě n-fem.

⁶ Óburúkpâbí mu ne me. Me mm*ba/chi n-shî*. Ebóng ńkyí onet oda mě eman echi.

⁷ Óburúkpâbí nké mu o-chwáp ng mě, ne me m-man n-ri n/fu, mm/kpógê banet-bushwôn ejí.

⁸ Nkyi kanong ńkyí adafé dyityém ne Óburúkpâbí kyi-shwôm ńkyí adajêem esim ne onet.

⁹ Nkyi kanong ńkyí adafé dyityém ké Óburúkpâbí kyi-shwôm ńkyí adajêem esim ne banet-ashí.

¹⁰ Banet-bushwôn ejí chwóó ba/mû ba/wâng mě, nké me m/man ne mbé ké busa ḿbú Óburúkpâbí.

¹¹ Mbé ba/mû ba/wâng mě ké byicê byimúmú, nké me m/man ne mbé ké busa ḿbú Óburúkpâbí.

¹² Mbé ba/fyí mě ké byiko wǎ bakwan, nké mbé ba/shí ochéé óchee wǎ aro nyí okwâ odashí. Me m/man ne mbé ké busa ḿbú Óburúkpâbí.

¹³ Banet-bushwôn ejí ba/rim bunwa ne me kanong kanong, ne ba/mû ba-kú ba-kpógê ng mě, nké Óburúkpâbí o/chwáp mě.

¹⁴ Óburúkpâbí o/chi mě n-shwane, n-firi ne busa. Nyǐ o/nyii mě.

¹⁵ Fwôo n̂g atông ba-jwo eringe nyí banet-Osówo ḿbé mbe ké bampyep-byití ebe mbe ba-jêe ng ne ejá kyíbóng kyíbóng ké okpóge mú mbé ba/kpógê, ba/fu, kiǐtí-busa ńkyí Óburúkpâbí kii/chi kánkyí.

¹⁶ Kiǐtí-busa emen ké byití kii/chi bě byi-kpógê.

¹⁷ Me mm*ba/chi m-kpú*. Me n/chi m-bwa m-kpen, n-sét ńkyí Óburúkpâbí oo/chi.

¹⁸ Nyǐ oo/kye mě busông kanong kanong, nké nyǐ o*da mě emîng m-kpú*.

¹⁹ Bâa n̂g mě afyi nyí kiǐtí-kyise-kyifen-Osówo echi eringe nyí me n/chi n-nung n-kó Óburúkpâbí asǎma.

²⁰ Nyín dyifyi ńdyí Óburúkpâbí. Banet ḿbé mbe ba-chi i kanong nké badaman enung ké kafâ.

²¹ Óburúkpâbí, me n-kyâ ǒ akpee, ké nǎ, wo a/jwo mě, ne ké bubwô ḿbú wo a/chi mě m-kpógê.

²² Ochíchí-buká ḿbú bambi byise ba/né ba/fu, bu*da/byí chwǒm* mbú nké boo/bírî bu/firi ḿbú bu/rêe bu-shwôm aká nyí áku kángkáng.

²³ Óburúkpâbí nké o/chi ńkyín. Kyi/kaa banet byiko kanong kanong.

²⁴ Nyín dyicí ńdyí Óburúkpâbí o/kpógê. Bâ n̂g byi-jêe byi-kyú ké bunyîn-dyityém.

²⁵ Óburúkpâbí, nyángê bě. Ô Óburúkpâbí, chi bě byi-kyú kanong.

²⁶ Kyi/bát Osówo ojware onet mú mu o-bâ ké dyizîn ńdyí Óburúkpâbí. Be byi/jware běn nkéré mú ba-kú ba-nung ng ké kafâ-kiǐtí-kyise-kyifen-Osówo echi.

²⁷ Óburúkpâbí o-chi i Osówo. Nyǐ mu kanong ne be. Kám m̂ biǐfúfú ké abwô ba-kpet ǎ ofê ekye, ba-cen ba-wáp kyikit ńkyí badachi kyifen-Osówo.

²⁸ Wo nké amu Osówo ejí, me mu n-kó ng ǒ asǎma. Me n/chi n-sét kyi-kim ne eringe nyí a/rêe a-shwôm.

²⁹ Kó n̂g Óburúkpâbí asǎma, ké nǎ, nyǐ o/nwa, ne kyijé emen kyi-waa ng ne banyá.