SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 116 - Bokyi Bible

Onet mú Osówo o/nyii ǎ ké Bukyû ekpú o/kye Osówo Akpee

¹ Óburúkpâbí mu o-jê ng mě, ké nǎ, nyǐ mu o-jwo ng mě. Nyǐ mu o-fwôo ng atông ké banshwam ejí.

² Nyǐ mu o-fwôo ng atông o-jwo mě nang nkéré orá nké n/kó ǎ.

³ Bukyû bu/mû bu/wâng mě kángkáng, ne bafip ḿbé dyikun ba/mû baa/fárâng mě. Bushî ne ofong ekédê byi/mû bii/sú mě ké dyityém.

⁴ Me n-kó kâng Óburúkpâbí n/fu, Óburúkpâbí nyii mě, n/tîm ǒ arông.

⁵ Óburúkpâbí o-chi i kanong, ne mu o-ri ng banet bafip. Osówo mú eten byiko byi-kpú u ǎ ne banet.

⁶ Óburúkpâbí mu o-ku ng banet ḿbé ba*fí ne onet-ochwâp*. Nyǐ o/nyii mě ké nkéré me m/mû ké busông.

⁷ Dyityém ejí, kyú chee, ké nǎ, Óburúkpâbí mu kanong ne me.

⁸ Óburúkpâbí o/nyii mě ké bukyû. Nyǐ o/chi batíí ba-mîng mě ebyí, ne o*da/bángê ba-kpógê mě*.

⁹ Ké bubwô ámbu, me mu n-cen n ne Óburúkpâbí ké oshê mú banet bakpó.

¹⁰ Me n/tî dyityém ejí ńdyí n/fé, nang ké nkéré n/raa n/fu, baa/shiryi mě debédebé,

¹¹ nang ké nkéré me m/mû n-shî ng ne n-raa n/fu, onet o*fí mú badatî dyityém ne nyǐ*.

¹² Ebóng ńkyí me ndaman eyárê Óburúkpâbí ké kángkáng kanong emen ne me.

¹³ Me n/chi m-bâ ne eyáré nyí bato n-kye Óburúkpâbí, n-kó ǎ asǎma ké onyii mú nyǐ o/nyii mě.

¹⁴ Me n/chi n-kye ǎ ńkyí me n/ryí ocím ké ncibi mú kángkáng banet emen.

¹⁵ Kyi-bán n Óburúkpâbí kanong kanong ké nkéré onet emen obónge oo/kpú.

¹⁶ Óburúkpâbí, me n-chi i ḿgbán eyên. Me mu n-chi i ńkyí wo a/sét wǎ eringe nyí boné ejí o/chi. Wo a/nyii mě ké bukyû.

¹⁷ Me n/chi n-chi kyifen-asǎma ekó n-kye ǒ, n-kye ǒ to banshwam ejí.

^18-19 Me n/chi n-kye ǒ ńkyí me n/ryí ocím ké ncibi mú kángkáng banet eyên, ne ké kiǐtí-kyise-kyifen eyên echi ké Jerúsélem. Kye n̂g Óburúkpâbí akpee.