SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 115 - Bokyi Bible

Osówo mu Obónge mú mu Ntûntû

¹ Ô Óburúkpâbí, ba-man ba-kye ǒ akpee, wo kǎnchí nké nke, *chí be* ké bubwô ḿbú kyijé eyên ńkyí kii*man* ne ké ḿbú wo amu a-tî ng ocím eyên mú a/ryí ne banyá.

² Ebóng ńkyí banet ḿbé baa*nyît Osówo* mbe ba-bí ng bě ba/fu, Osówo enen mu nyá.

³ Osówo mú eten mu kyíbóng. Nyǐ mu o-chi i nang ebóng ńkyí mu o-ryuu ng.

⁴ Esówo nyí ebe ba/chi ké syílyíba ne gûl. Banet nké ba/mee kányí ké abwô ebe.

⁵ Esówo ányi nyi ne ecím, nké ee*man eraa* nyi ne achi, nké ee*rángê*.

⁶ Nyi ne atông, nké ee*jwo* nyi ne ezóng, nké ee*man ejwo kyinung*.

⁷ Nyǐ nyi ne abwô, nké ee*man eta chwǒm* nyi ne byiká, nké ee*man ecen*. Ojá ee*man efaa*. [

⁸ Kyi/bát kángkáng banet ḿbé ba/chi kányí, ne ḿbé ba/tî atyém ebe ké nyǐ, bafiri] wǎ erím-bakye nyí mbé ba/chi.

⁹ Ben banet ḿbé Ézerel, tî n̂g atyém ké Óburúkpâbí. Nyǐ o-chwáp ng běn ne o-ku ng běn to.

¹⁰ Ben banchi kyifen-Osówo, tî n̂g atyém ké Óburúkpâbí. Nyǐ o-chwáp ng běn ne o-ku ng běn to.

¹¹ Ben kángkáng mú bamu ba-fâ Óburúkpâbí, tî n̂g atyém ké nyǐ. Nyǐ o-chwáp ng běn ne o-ku ng běn to.

¹² Óburúkpâbí mu o-zîim m bě, ne o/chi o-jware bě. Nyǐ o/chi o-jware banet ḿbé Ézerel ne kángkáng banchi kyifen-Osówo.

¹³ Nyǐ o/chi o-jware nang yeě mú mu kiǐtí nang mú o*fí kiǐtí* mú mu o-kyâ ǎ ofê.

¹⁴ Kyi/bát Óburúkpâbí okye běn ne kyikû-banet enen bwǎn.

¹⁵ Kyi/bát Óburúkpâbí mú o/chi bubóng ne esí ojware běn.

¹⁶ Bubóng bu/já Óburúkpâbí kǎnchí, nké nyǐ o/kye banet esí.

¹⁷ Bakúsí ne nang yeě mú o/shû o-jâ ké oshê-bakúsí baa*kye Óburúkpâbí akpee*.

¹⁸ Nké be banet bakpó nké byi/chi byi-kó ǎ asǎma kántîk ne ne banyá. Kye n̂g Óburúkpâbí akpee.