SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 109 - Bokyi Bible

Kyiraa ńkyí Onet mú mu ké Afaníkong

¹ Osówo, me mu n-kyâ ǒ akpee. *Dawaa pyêppyêp*.

² Bambên atyém-banet ne bansêt byisédéng baa/rim bunwa ne me. Mbé mbe ba-sét ng byisédéng ba-bât ng mě,

³ ne mbé mbe ba-raa ng byibî-byěm ba-kim ne me, ba-nwa ng ne me chwǒm n*da/chi*.

⁴ Mbé ba*da/bángê ne me* nang ké mbé mbe ba-jê ng mě, ne [me nn/fé nshwam ké bubwô ebe.]

⁵ Me n/chi kámbé kanong, mbé ba-chi mě kyibî. Mbé ba-jê ng mě, me n-sa ng kámbé kafâ.

⁶ Cá nkêt mpan mú odaryí ngu o-pan onet-bushwôn ejí mpan, a-mîng onet-bushwôn emen obónge o-bât ǎ kyiraa.

⁷ Kyi/bát bapan ǎ mpan ba/fu, o/chi kyibî. Kyi/bát nang nshwam emen efé okyú chwǒm-kyibî.

⁸ Kyi/bát dyikpen emen dyiman ké abe ké abe. Kyi/bát onet okíri okúng kyikit-bǎmkpóngé emen.

⁹ Kyi/bát bwǎn emen bafiri bwǎn-byibén. Kyi/bát onyi emen ofiri onyǐnkú.

¹⁰ Kyi/bát bwǎn emen bafiri banrêm byěm ḿbé ba*fí ne kyise*. Kyi/bát [baró kámbé] ké biinkut ḿbyí mbe ba-kyú u.

¹¹ Kyi/bát banet ḿbé nyǐ o/ryí kámbé afwá bakoo ǎ byěm emen kángkáng. Kyi/bát bacinbánet bakoo ǎ kángkáng byěm ḿbyí o/já ké bǎmkpóngé echi.

¹² Kyi/bát onet nang obónge o*dacángê dyityém ne nyǐ* ba-tún nang bwǎn-byibén emen ḿbé nyǐ o/mîng*.

¹³ Kyi/bát bwǎn emen kángkáng bakpú. Kyi/bát bwǎn ḿbé bwǎn emen baráp dyizîn emen.

¹⁴ Kyi/bát Óburúkpâbí ozîim byibî ḿbyí banchí emen ḿbé kpákpá ba/chi. Kyi/bát Óburúkpâbí o*dachi o-pwoo byibî ḿbyí boné emen*.

¹⁵ Kyi/bát Óburúkpâbí ozîim byibî ebe kángkáng nkéré, [nké kyi/bát banet baráp kámbé.]

¹⁶ Onyinchéng ámu oo*kabe ne banyá kyi-kim ne dyityém ecángê*. Nyǐ o/kye banet ḿbé mbe kyikpu ne ḿbé ba*fí ne chwǒm* ne ḿbé ba*fí ne ochwâp* busông, o-ju kámbé.

¹⁷ Banet ba-nyîn n ǎ eshú. Kyi/bát bashú ǎ. Banet baa*nyîn ǎ ekye ojware*. Kyi/bát onet nang obónge o*da ǎ ekye ojware*.

¹⁸ Nyǐ o/shú banet wǎ eringe nyí mu o-bwá ng byídí. Kyi/bát byishû emen byinung ǎ ké byiko wǎ omu, ne ké byikúú wǎ bakút.

¹⁹ Kyi/bát byicít ǎ wǎ byídí, ne byiwáp ǎ wǎ emâp kángkáng nkéré.

²⁰ Óburúkpâbí, kye banet-bushwôn ejí ḿbé mbe ba-raa ng byibî-byěm ámbyi ba-bât ng mě dyizong-busông ándyi.

²¹ Nké Óburúkpâbí mú mu Osówo ejí, chwáp mě wǎ eringe a/ryí ocím, a-nyii mě ké bubwô ḿbú kanong ńké kyijé eyên.

²² Me mu kyikpu, n*fí ne chwǒm*. Nkyi kyi-bán n mě kyi-ribi ng ké kafâ-dyityém ejí.

²³ Me n-kú m-bâ eríbî wǎ busun-dyikurúku. Baa/pâ mě ba-twóp kú wǎ kaǎnyâa.

²⁴ Arông aa/nyii mě ké byiryíng ḿbyí byi*fí mě*. Enyam-byiko ejí e/firi byikúú byíkuu.

²⁵ Banet mbe ba-jwó ng mě ké nkéré baa/ri mě. Mbé mbe ba-ninge e ashí ba-kyâ mě edángé.

²⁶ Ô Osówo Óburúkpâbí ejí, chwáp mě. Nyii mě ké bubwô-kyijé eyên ńkyí kii*man*.

²⁷ Chi banet-bushwôn ejí ba-nyît ba/fu, wo nké amu a-nyii ng mě.

²⁸ Kyi/nyîn kámbé bashú mě, nké wo a-jware ng mě. [Kyi/bát éshwân ewuri banet ḿbé mbe ba-kyâ mě busông,] ne kyi/bát me mú ḿgbán eyên nkyú ké bunyîn-dyityém.

²⁹ Kyi/bát éshwân esú banet-bushwôn ejí ké byiko. Kyi/bát bafé éshwân ebe ké byiko wǎ byídí.

³⁰ Me n/chi n-kó Óburúkpâbí asǎma ne ejá kyíbóng kyíbóng. Me n/chi m-kpee ǎ ké burwám-banet emen,

³¹ ké nǎ, nyǐ mu o-bám m onet-kyikpu, ne mu o-nyii ng ǎ ké abwô nyí banet ḿbé ba/fu, baju ǎ.