SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 107 - Bokyi Bible

Byikpee n̂g Kanong ńké Osówo

¹ Kó n̂g Óburúkpâbí asǎma, ké nǎ, nyǐ mu kanong. Kyijé ńkyí emen kyi-waa ng ne banyá.

² Ben kángkáng ḿbé nyǐ oo/nyii, chi n̂g eraa ejá ńnyín ké akpee ba-kye Óburúkpâbí. Nyǐ oo/nyii běn ké abwô nyí banet-bushwôn enen.

³ Ne oo/fîm běn ké eshê nyí ba/mû bacinbánet ké [bakô-ejíí bamúmú] o-bwa ne ben esim.

⁴ Bakíri ba/yêe ké kyikim-dyikán ńkyí kyi*fí ne kiǐfáng* ńkyí mbé badacen ba-jâ ké [oshê mú badakyú.]

⁵ Esong e/nwa kámbé, omu o-jê kámbé, ne mbé ba/zú dyityém kángkáng.

⁶ Ne ké afaníkong ebe kâng, mbé ba/kó Óburúkpâbí, ne nyǐ o/nyii kámbé.

⁷ Nyǐ o/tông kámbé kiǐfáng ńkyí dángdáng o-sí kámbé ba-ribi ké oshê mú mbé badakyú.

⁸ Mbé ba-man ba-kó Óburúkpâbí asǎma ké bubwô ḿbú kyijé emen ńkyí kii*man* ne ké ḿbú biǐtí-byěm ḿbyí nyǐ oo/chi o-kye kámbé.

⁹ Nyǐ mu o-kyâ omu o-kwárê banet ḿbé omu mu o-jê ng kámbé, ne mu o-fâ banet ḿbé esong nyi e-nwa ng kámbé byěm ḿbyí byinong ké abwô.

¹⁰ Banet bakíri ba/mû ba-kyú u ké kiǐtí-kyifip, wǎ banet-bamgbokobá ḿbé ba/fé kámbé bamgbokobá,

¹¹ ké nǎ, mbé baa/bírî bunwa ne byije ḿbyí Osówo mú mu kyíbóng kyíbóng, ne baa/né ńkyí nyǐ o/sét.

¹² Asa a/man kámbé ké bǎmkpóngé ḿbé ba/mû ba-sóng ng ba-shwôm. Mbé ba/myii kyísí, onet mú odachwáp kámbé o*fí*.

¹³ Mbé kâng ba-kó Óburúkpâbí ké bubwô ḿbú afaníkong ebe, ne nyǐ o-nyii kámbé ké busông ebe.

¹⁴ Nyǐ o/fîm kámbé ké kiǐtí-kyifip o-két bamgbokobá ḿbé ba/mû ba/fé kámbé.

¹⁵ Mbé ba-man ba-kó Óburúkpâbí asǎma ké bubwô ḿbú kyijé emen ńkyí kii*man* ne ké ḿbú biǐtí-byěm ḿbyí nyǐ o/chi o-kye kámbé.

¹⁶ Ké nǎ, nyǐ mu o-sé ng afyi nyí ba/chi ké kiǐré, o-bún n biǐré ḿbyí ba/mû ba/ku.

¹⁷ Bakíri ba/mû wǎ enyam-banet, ne mbé ba/mû ba-ri ng busông ké bubwô-byibî ebe ne ké ḿbú byibî-atyém ebe.

¹⁸ Mbé baa*ryuu eryí byiryíng nang byirá*. Mbé ba/mû ba/firi fáráng ne bukyû.

¹⁹ Mbé kâng ba-kó Óburúkpâbí ké bubwô ḿbú afaníkong ebe, ne nyǐ o-nyii kámbé ké busông ebe.

²⁰ Nyǐ o/chi kámbé ba-nyange ké ejá emen, ne o/nyii kámbé ké dyikun enung.

²¹ Mbé ba-man ba-kó Óburúkpâbí asǎma ké bubwô ḿbú kyijé emen ńkyí kii*man* ne ké ḿbú biǐtí-byěm ḿbyí nyǐ oo/chi o-kye kámbé.

²² Mbé ba-man ba-kó ǎ asǎma ké byifen echi ba-kye ǎ, ne ba-man ba-sét ǎ ké ekwan nyí bunyîn-dyityém kángkáng byěm ḿbyí nyǐ oo/chi.

²³ Bakíri ba/cen ké bǎnsukyíkang ké baya ḿbé baryên ba-já ńkyí kyidachwáp dyikpen ebe.

²⁴ Mbé ba/ri ńkyí Óburúkpâbí odaman echi, ne biǐtí-byěm to ḿbyí o/chi ké baya.

²⁵ Nyǐ o/kye busa ne bufú ḿbú buryên bu-kpet etugi, bu-buu bunâng-baya.

²⁶ Bunâng-baya bu/yip bǎnsukyíkang bu-twóp kyíbóng bu-shû ne mbé kyísí. Asa a/man kámbé ké nkéré ba/firi ké dyizong-afaníkong ányi.

²⁷ Mbé ba/kpán ba-cíng wǎ bambwôm bato. Kángkáng bubwô-bǎmkpóngé ebe wǎ banfung kace bu*da/chîbyí chwǒm*.

²⁸ Mbé kâng ba-kó Óburúkpâbí ké bubwô ḿbú afaníkong ebe, ne nyǐ o-nyii kámbé ké busông ebe.

²⁹ Nyǐ o/chi kyibî-bufú kyi-mîng etugi, ne baya ba-mîng enáng.

³⁰ Baya ḿbé ba/mîng enáng ba/chi kámbé ba-firi ké bunyîn-dyityém. Ne o-yip kámbé o-ribi ne mbé ké dyiga ńdyí mbé mbe ba-ryuu ng.

³¹ Mbé ba-man ba-kó Óburúkpâbí asǎma ké bubwô ḿbú kyijé emen ńkyí kii*man* ne ké ḿbú biǐtí-byěm ḿbyí nyǐ oo/chi o-kye kámbé.

³² Mbé ba-man ba-sét wááng ké burwám-banet kyi-kim ne eringe nyǐ o/rêe o-shwôm, ba-kpee ǎ ké ncibi mú banet-ashí.

³³ Óburúkpâbí o/chi buce bu-núng debédebé, ne o/chi buce ḿbú mbu bu-byí i ké bǎmbwó bu-mîng esen.

³⁴ Nyǐ o/chi esí nyí enong e-firi bano báno ké bubwô ḿbú byibî ḿbyí banet ḿbé ba/mû ba-kyú u ányi.

³⁵ Nyǐ o/yángê byikim-dyikán byi-firi biǐdé-omu, o-yángê biǐyíyé-esí byi-firi ne buce ḿbú budasen.

³⁶ Nyǐ o/mîng banet-esong ba-kyú ké esí ányi, ne mbé ba/bi oshê mú mbé badakyú.

³⁷ Mbé ba/kpang byifát ba-kwón byíkwôn, ne mbé ba/fuu byíkwôn chwóó.

³⁸ Nyǐ o/jware banet emen ne mbé ba/já bwǎn chwóó. Nyǐ o*da/bángê byitú ebe byi-bwa ocím ké esim*.

³⁹ Ké nkéré banet ba/kpógê banet-Osówo ne edángé ké ecábé ne busông,

⁴⁰ nyǐ o/kúng banet ḿbé mbe ba-cít ng kámbé wǎ *chí banet* ne o-chi kámbé ba-kûzóp ké kyikim-dyikán ńkyí kiǐfáng kyi*fí*.

⁴¹ Nké nyǐ o/nyii banet-kyikpu ké bafip ebe, o-chi byikû-banet ebe byi-jê wǎ abóng-enyam.

⁴² Banet ḿbé mbe ba-chi i kanong kyi/nyîn kámbé ké nkéré mbé ba/ri ńkyín. Nké banet ḿbé mbe ba-chi i byibî-byěm ba*da/man echîfaa ojá*.

⁴³ Kyi/bát banet ḿbé mbe ne bubong bakabe kyi-kim ne byěm ḿbyín. Kyi/bát banyît kyijé ńkyí Óburúkpâbí ńkyí kii*man*.