SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 106 - Bokyi Bible

Kanong ńké Óburúkpâbí mu o-tông ng Banet Emen

¹ Kpee n̂g Óburúkpâbí. Kó n̂g Óburúkpâbí asǎma, ké nǎ, nyǐ mu kanong. Kyijé emen nkyi ne banyá.

² Yeě odaman esét kángkáng biǐtí-byěm ḿbyí nyǐ oo/chi. Yeě oda ǎ eman ekye akpee a-kwárê.

³ Bunyîn-dyityém mbu ne banet ḿbé mbe ba-chi i ńkyí nyǐ mu o-sét ng, ḿbé mbe ba-chi i ńkyí nkyi kanong.

⁴ Óburúkpâbí, *da mě eráp* ké nkéré a-kú a-chwáp ng banet eyên*. Cibi mě ne mbé ké nkéré a-kú a-nyii ng kámbé.

⁵ Mîng mě n-ri kanong ńké bwǎn eyên, n-kyú ké bunyîn-dyityém ebe, n-jêe to ké akpee nyí ebe.

⁶ Be bii/chi byibî wǎ eringe nyí banchí eten ḿbé kpákpá ba/chi. Be bii/bên atyém byi-chi byibî-byěm.

⁷ Banchí eten ḿbé kpákpá, ḿbé ba/mû ké Éjip, ba*da/nyît kyikû ne dyishí-biǐtí-byěm ḿbyí Osówo o/chi*. Mbé ba/ráp kyijé ńkyí nyǐ o/tông kámbé kampén chwóó, ne mbé ba-bírî bunwa ne [nyǐ mú o/rêe o-shwôm,] ké baya ḿbé badakó Rêt.

⁸ Nké nyǐ o/nyii kámbé eringe nyí nyǐ o/mû o/ryí kámbé ocím, eringe nyí odatông kiǐtí-busa emen.

⁹ Nyǐ o/nyán baya ḿbé badakó Rêt, ba-núng. Nyǐ o-sí banet emen ba-nyáng ké esí nyí yéyé.

¹⁰ Nyǐ o/nyii kámbé ké abwô nyí banet-bushwôn ebe o-chi kámbé ba-fem.

¹¹ Nké banet-bushwôn ebe ba/jé ké baya kángkáng. Onet nang obónge o*da/waa*.

¹² Ne banet emen kâng ba-bángê ké ocím emen mú o/ryí kámbé, ne ba-kwán ekwan-akpee ba-kye ǎ.

¹³ Nké ka*da/bwom ne mbé ba-ráp ńkyí nyǐ oo/chi*. Mbé ba*da/bwom o-kye kámbé bacê*.

¹⁴ Atyém ebe a/mû a-ryuu ng byěm a-shwôm ké kyikim-dyikán, ne mbé ba/kan Osówo.

¹⁵ Nyǐ kâng o/kye kámbé ńkyí mbé ba/bí ǎ, nké o/twóm kámbé to kyibî-orwôm.

¹⁶ Orêm o/mû o-chi i kámbé ne Músis ne Éron, mú ḿgbán mú onong mú Óburúkpâbí, ányi ké kyikim-dyikán.

¹⁷ Ké bubwô ámbu, esí e/nere e-myii kyikû-banet ńkyí Datân, e-myii kyikû-banet ńkyí Ábyíram.

¹⁸ Okwâ o/mang banet ḿbé ba/mû ne mbé ké kyikû, o-shí byibî-banet ámbyi kángkáng.

¹⁹ Mbé ba/mee orím-bukye wǎ mpong ké kaku-Sána ba-kye kámú ofê wǎ Osówo.

²⁰ Mbé ba/yángê busan ḿbú Osówo ḿbú ragerage ba-koo ḿbú orím-bukye mú enyam nyí edaryí biǐbyâa.

²¹ Mbé ba/ráp Osówo mú o/nyii kámbé ké biǐtí-byěm ḿbyí o/chi ké Éjip.

²² Nyǐ o/chi biǐtí-akat ké Éjip ḿbyí bii*nwa eri*. Nyǐ o/chi byěm ḿbyí onet odawaa ocím ké dyishí fúú, ké baya ḿbé badakó Rêt.

²³ Ké nkéré Osówo o/fu, nyǐ o-ju ng banet emen, Músis mú mu ḿgbán mú nyǐ o/cá, o/bwom bushwôn ne Osówo, o*da/bángê kafâ ńké ka/mû ka-sa ng Osówo ka-ju kámbé*.

²⁴ Mbé kâng ba/né esí ányi nyí bunyîn-dyityém, ké nǎ, mbé ba*da/bángê ké ocím mú Osówo o/ryí*.

²⁵ Mbé ba/kyú ké bampyep ebe ḿbé badabi ké kyídí ba-rime ké kyitông, ba-né ejwo Óburúkpâbí.

²⁶ Óburúkpâbí o-kuri kámbé ekó kanong kanong kâng o/fu, nyǐ o/chi o-ju kámbé ké kyikim-dyikán ánkyi,

²⁷ o-chi bwǎn ebe ba-pwôo byiryibyiryi ké eshê nyí banshâng bakye, o-mîng kámbé ba-kpú ké eshê nyí e*fí nyí ebe*.

²⁸ Banet-Osówo ba-da-kyú kâng ké Pôo ba-kpet Bâl ofê ekye, ba-ryí byiryíng ḿbyí ba/chi kyifen ba-kye erím-bakye nyí e*fí ne dyikpen*.

²⁹ Mbé ba/buu Óburúkpâbí kafâ ké édúú ebe, ne kyibî-orwôm kyi-róng kámbé.

³⁰ Nké Fyinéhas o/bûu o-bwom o-kye banet ḿbé ba/chi kyibî busông, ne kyibî-orwôm ánkyi kyi-man.

³¹ Banet ba-zîim m ńkyín nyáá ké kanong emen ne ba-zîim m kánkyí kángkáng nkéré mú mu o-bâ.

³² Mbé ba/chi kyi-sa Óburúkpâbí ké kaace ńké Meryíba, ne Músis o/róng ké afaníkong ké bubwô ebe.

³³ Mbé ba/chi kyi-sa ǎ kanong kanong, kyi-chi ǎ o-raa ńkyí o*da/man ebwom o-kabe*.

³⁴ Mbé ba*da/ju banet ḿbé ba/bángê ké bakye esháng* wǎ eringe nyí Óburúkpâbí o/kye kámbé busa o/fu, bachi*.

³⁵ Nké mbé ba/bé abé ne mbé, ba-kúng édúú ebe nyí baa*nyît Osówo*.

³⁶ Banet-Osówo ba/kye erím-bakye ofê, ne ofê ámu o/cen kámbé ne bukyû.

³⁷ Mbé ba/kúng bwǎn ebe ḿbé banyinchéng ne ḿbé banyinyi ba-chi byifen ba-kye erím-bakye nyí Kínan.

³⁸ Mbé ba/ju bwǎn ámbe ḿbé ba*da/chi chwǒm* ne ké bubwô ámbu, baróng ebe ba/bên esí.

³⁹ Mbé baa/bên byiko ebe ké ńkyí ba/chi éné, ne ba*da/fé dyityém ne Osówo*.

⁴⁰ Óburúkpâbí ka/bírî ǎ kâng ne banet emen. Nyǐ oo/ciring bwǎn emen.

⁴¹ Nyǐ o/mîng kámbé ba-firi ké abwô nyí banet ḿbé ba/bángê ké bakye esháng, ne banet-bushwôn ebe ba-firi ne busa ne mbé.

⁴² Banet-bushwôn ebe ba/cít kámbé, ne ba/mû ba/firi ké busa ebe ké kángkáng byěm.

⁴³ Óburúkpâbí o/nyii banet emen kampén kampén, nké mbé ba/bángê ké bunwa ebírî ne nyǐ, ne ba-nung ké byibî.

⁴⁴ Nang ké nkyi éné, Óburúkpâbí o/ri kámbé bafip ké nkéré ba/tii bukyû ba/fu, ori afaníkong ebe.

⁴⁵ Ké bubwô ebe, nyǐ o/zîim ocím emen mú o/ryí o-sem byiko emen, ne ké bubwô-kiǐtí-kyijé emen nyǐ o/yángê dyityém.

⁴⁶ Nyǐ o/chi banet ḿbé mbe ba-cít ng banet emen byiko byi-kpú kámbé ne mbé.

⁴⁷ Ô Osówo Óburúkpâbí mú eten, nyii bě, a-fîm bě ké eshê nyí byimu, a-bwa ne be esim, eringe nyí be byida ǒ ekó asǎma, byi-kpee dyizîn eyên ńdyí dyinong.

⁴⁸ Kpee n̂g Osówo Óburúkpâbí mú Ézerel. Kpee n̂g ǎ kántîk ne ne banyá. Nang yeě oraa o/fu, kyi/bát kyikyú éné. Kpee n̂g Óburúkpâbí.