SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 104 - Bokyi Bible

Byikpee Osówo mú o/chi Bě

¹ Kyirim ejí, kpee Óburúkpâbí. Osówo Óburúkpâbí ejí, wo a/rêe kanong kanong. Wo aa/sú ne baryên ne busa.

² Wo amu a-fâ kiinwángé ké byiko wǎ byídí. Wo a/paam bubóng éné wǎ mpyep mú badabi ké kyídí.

³ Ne a/bi byise eyên kyíbóng-omu mú mu kyíbóng. Wo amu a-yú u éfíbí wǎ mútu, a-yú u to bufú wǎ mbu ne abyibabang.

⁴ Bufú nké mbu mbánge kyitwóm eyên ne kasabang nké nke ḿgbán eyên.

⁵ Wo aa/tî esí ké byikwap emen kíngkíng ne baa*man enáng kányí*.

⁶ Wo a/chi omu a-cít kányí wǎ byídí, ne omu o/cít eku kángkáng.

⁷ Omu o/rim ké nkéré aa/raa ne mú. Mǔ o/chêe ké nkéré oo/jwo ényân eyên.

⁸ Mǔ o/sen ké eku o-nung ké ewo, o-ribi ké kyikit ńkyí a/chi a-tî kámú.

⁹ Wo a/fé buti ḿbú mǔ oo*man eshwôm* eringe mǔ oo*man echîcít ejíí*.

¹⁰ Wo a/chi boǒbwán-buce bu-kûbyí ké ewo, ne buce bu-kûsen ké afîm-eku.

¹¹ Mbú nké mbu bu-kyâ enyam-dyikán omu mú nyi e-jwáp ng. Mbú nké enyam-dyikán nyi e-kune e kyijé-omu.

¹² Ké byichí ḿbyí mbyi fáráng ne buce nké bunurung mbu bu-chi i aju bu-raa ng to.

¹³ Áku kyíbóng nké omu mu o-fím m ké abwô eyên o-bâ kyíbóng-eku, ne ojware eyên o-sú ké esí.

¹⁴ Wo amu a-chi i biǐbyâa byi-kán n eringe nyí byitú byidaryí, ne asín-byichí a-tî onet eringe nyí onet odakwón byíkwôn emen,

¹⁵ a-chi to bato eringe nyí odakyú ké bunyîn-dyityém, a-chi bakút eringe nyí odajêe, ne byiryíng eringe ada ǎ ekye busa.

¹⁶ Byichí ḿbyí Óburúkpâbí o/kwón ké Lebánon mbyi byi-já ng omu chwóó.

¹⁷ Ké mbyí nké bunurung mbu bu-chi i aju. Ké mbyí nké bunurung mbu bu-bi ng byise ebe.

¹⁸ Enyam-dyikán nyi e-kyú u kyíbóng-eku ne ké afít-ewo.

¹⁹ Wo a/chi otukáku eringe nyí odatông kyifang ne burwom. Óbyísû mu o-nyît ng nkéré mú odaríbî.

²⁰ Wo a/chi buchú, ne enyam-dyikán kángkáng e-byí i kyíjí ké kyifip.

²¹ Byisu-ekpang byi-fém m ké nkéré byi-kú byi-ryuu ng dyikán byi-kyé ng byiryíng ḿbyí Osówo mu o-kyâ kámbyí.

²² Mbyí byi-bwa ng esim byi-da-cít ké buríng ebe ké nkéré esû ee/byí.

²³ Ne banet kâng ba-dim bǎmkpóngé ebe echi, ba-chi kámbé tete dyikurúku.

²⁴ Óburúkpâbí, wo aa/chi byěm chwóó. Wo a/chi kámbyí ké bubong ḿbú kiǐtí. Ejíí ee/sú ne byěm eyên ḿbyí a/chi.

²⁵ Baya mbe kô ḿbé ba/rêe kyibé, ḿbé mbe ne byěm ḿbyí byiryên ne ḿbyí boǒníng ḿbyí wo a/chi.

²⁶ Bǎnsukyíkang mbe ba-sen n ké baya ámbe, ne [kiǐnyám-baya ńkyí wo a/chi nkyi kyi-chi i acáá ké mbé.]

²⁷ Mbyí kángkáng mbyi byi-jêem m busi ebe ké wo byi/fu, wo akye kámbyí byiryíng ké nkéré mbyí byi-kú byi-ryuu ng kámbyí.

²⁸ Wo amu a-kyâ kámbyí byiryíng ne mbyí mbyi byi-ryí i kámbyí. Wo amu a-tî ng byiryíng ḿbyí mbyí mbyi byi-zût ng.

²⁹ Mbyí byi/firi ké bushî ké nkéré wo aa/bírî kámbyí esim. Mbyí byi-kpú u ké nkéré wo aa/koo kámbyí kiǐnjáng, ne byi-bírî ecing nyí wo a/kúng ne a-chi kámbyí.

³⁰ Nké wo amu a-chi i kámbyí ké nkéré mú amu a-chi i ejíí [e-chîjá dyikpen ńdyí dyifyîfî.]

³¹ Kyi/bát akpee nyí Óburúkpâbí awaa ne banyá. Kyi/bát Óburúkpâbí okyú ké bunyîn-dyityém ké byěm ḿbyí nyǐ oo/chi.

³² Esí e-náng ng, â nyǐ o/tún kányí achi. Eku e-byí i arúkwâ, â nyǐ o/ta kányí.

³³ Me n/chi n-kwán ekwan n-kye Óburúkpâbí kángkáng dyikpen ejí. Me n/chi n-kwán ekwan-akpee n-kye Osówo ejí tete m-kpú.

³⁴ Kyi/bát nyǐ okyú ké bunyîn-dyityém ké ekwan ejí, ké nǎ, bunyîn-dyityém ejí mbu bu-fím m ne nyǐ.

³⁵ Kyi/bát nyǐ oman ne banet-byibî ké ejíí. Kyi/bát bambên atyém baman. Kyirim ejí, kye Óburúkpâbí akpee, kpee Óburúkpâbí.