SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 103 - Bokyi Bible

Kyijé ńkyí Osówo

¹ Kyirim ejí, kye Óburúkpâbí akpee. Kyirim ejí kángkáng kyikpee dyizîn emen ńdyí dyinong.

² Kyirim ejí, kye Óburúkpâbí akpee. *Dachi a-ráp eringe nyí nyǐ o/cángê dyityém*.

³ Nyǐ mu o-pwoo ng mě ké kángkáng byibî ejí, ne mu o-chi i to kángkáng byirwóm ejí byi-man.

⁴ Nyǐ o*fí o-bángê e ba-fé mě ké dyikun* ne mu o-jware ng mě to ne kyijé ne bafip eri.

⁵ Nyǐ mu o-kyâ [dyikpen ejí] byěm ḿbyí byinong eringe enyam-byiko ejí edawaa efyîfî ne shwaneshwane wǎ nyí kiinkwa.

⁶ Óburúkpâbí mu o-két ng mpan o-nwa banet ḿbé mbe ba-cít ng kámbé, ne mu o-kyâ kámbé ńkyí kyi/já kámbé.

⁷ Nyǐ o/sét Músis okabe emen wááng, ne o/mîng banet ḿbé Ézerel ba-ri biǐtí-akat emen ḿbyí nyǐ o/chi.

⁸ Óburúkpâbí mu o-ri ng banet bafip, ne mu o-tông ng banet kyijé. Nyǐ kaa*sa ǎ babap* ne kyijé kii*man ǎ ké byiko*.

⁹ Nyǐ oo*bîn banet o-ca kashú* ne kafâ to kaa*sa ǎ ne banyá*.

¹⁰ Nyǐ o*fí o-kyâ bě busông wǎ eringe nyí byi/mû byi/chi byi-koo kámbú* o-só bě nang osó ké byibî eten ne orông eten*.

¹¹ Kyijé emen ńkyí mu o-tông ng banet ḿbé mbe ba-kyâ ǎ ofê kyi/rêe wǎ eringe nyí bubóng mbu kyíbóng nyáám bu-shwôm ejíí.

¹² Nyǐ mu o-kúng ng byibî eten o-câ ne mbyí tíbítíbí wǎ eringe kyikit ńkyí óbyísû odabyí kyi/tíbî ne ńkyí odaríbî.

¹³ Óburúkpâbí mu o-cángê e dyityém ne banet ḿbé mbe ba-kyâ ǎ ofê wǎ eringe nyí bonchí-bwǎn mu o-cángê e dyityém ne bwǎn emen.

¹⁴ Óburúkpâbí mu o-nyît ng ńkyí nyǐ o/kúng ne o-chi bě. Nyǐ mu o-zîim m o/fu, be byi-chi i ecing.

¹⁵ Akpen eten nyi wǎ biǐbyâa. Be byimu byi-kán n byi-kpen n wǎ ekong-biǐbyâa.

¹⁶ Ne ké nkéré bufú boo/tugi ké nyǐ, nyǐ kángkáng e-roo. Onet oo*ri to kányí*.

¹⁷ Nké kyijé ńkyí Óburúkpâbí kyi-waa ng ne banyá ne banet ḿbé mbe ba-kyâ ǎ ofê, ne kanong emen ka/chi ka-ta kángkáng bwǎn-bafî ne ḿbé mbe ba-bâ.

¹⁸ Ka-ta ng to banet ḿbé ba/fé dyityém ké ocím mú Osówo o/ryí, ne mbe ba-chi i ńkyí byije emen byi/sét.

¹⁹ Óburúkpâbí oo/tî kakyúng-butu emen kyíbóng, ne nyǐ mu Otu mú kángkáng banet.

²⁰ Kpee n̂g Óburúkpâbí, ǎ barím ḿbé banong ḿbé mbe kiǐtí ne busa, ḿbé mbe ba-chi i ńkyí nyǐ o/sét, ne mbe ba-jwo ng ńkyí nyǐ mu o-sét ng.

²¹ Kángkáng barím emen ḿbé mbe kyíbóng, ḿbé bǎmgbán emen, ḿbé mbe ba-chi i ńkyí nyǐ o/sét, kpee n̂g Óburúkpâbí.

²² Kángkáng byěm ḿbyí Osówo o/chi ké butu emen kángkáng, kpee n̂g Óburúkpâbí. Kyirim ejí, kye Óburúkpâbí akpee.