SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 102 - Bokyi Bible

Nshwam mú Kyisat ńkyí nkyi ké Afaníkong

¹ Ô Óburúkpâbí, fwôo atông a-jwo nshwam ejí, a-jwo bukyû ejí ḿbú mu n-tii ng n/fu, chwáp mě.

² *Da mě ebírî esim ké nkéré n/firi ké afaníkong*. Fwôo atông a-jwo mě, a-faa mě ojá babap ké nkéré nn/kó ǒ.

³ Dyikpen ejí ndyi dyi-man n dyi-câ wǎ arúkwâ. Enyam-byiko ejí nyi e-sóng ng wǎ okwâ.

⁴ Mbe ba-cím m mě ba-fâ kyísí wǎ biǐkpúkpú-biǐbyâa. Okabe mú byiryíng eryí o*fí mě to*.

⁵ Me mu m-byâ kakânkakân. Enyam-byiko ejí ee/jwóm e/firi byikúú byíkuu.

⁶ Me n/firi kǎnchí wǎ kanurung ńké nke ké kyikim-dyikán, ne wǎ kiikong ńkyí nkyi ké biǐbwô-byise.

⁷ Me mu n-waa ng achi fúú. Me n/firi kǎnchí wǎ ncen-kanurung mú mu kyíbóng-kyise.

⁸ Banet-bushwôn ejí mbe ba-dángê e mě kyirim-dyicí kángkáng. Banet ḿbé mbe ba-fát ng mě kiikuku mbe ba-kúng ng dyizîn ejí wǎ chwǒm-kyishû.

^9-10 Ké bubwô ḿbú kiikuku ne kafâ esa eyên, atông nké a/firi mě byiryíng, ne batíí ejí ba-kú ba-róngê e ké ńkyí mu n-jwáp ng. Wo a/nwam mě a-twóp kú.

¹¹ Dyikpen ejí dyi/firi wǎ busun-dyikurúku. Me n/firi wǎ biǐkpúkpú-biǐbyâa.

¹² Nké Óburúkpâbí, wo nké amu Otu mú ne banyá. Kángkáng bwǎn eten ba/chi ba-zîim ǒ.

¹³ Wo a/chi a-bûu a-ri Záyon bafip. Nkéré oo/fyi mú adari kámú bafip, ochíchí-nkéré něen.

¹⁴ Záyon o-jê ng bǎmgbán eyên, nang banet baa/bên kámú. Mbé ba/ri kámú bafip nang ké mu bênbên.

¹⁵ Eshê kángkáng e/chi e-shî Óburúkpâbí. Kángkáng batu ḿbé ké ejíí ba/chi ba-shî busa emen.

¹⁶ Óburúkpâbí o/chi o-tông eringe nyǐ o/rêe ké nkéré oo/bwât Záyon o-bi.

¹⁷ Nyǐ o/chi o-jwo banet emen ḿbé o/mû o/né, o-fwôo atông ké nshwam ebe.

¹⁸ Sáng kyísí a-tî bwǎn ḿbé mbe ba-bâ kashú, ńkyí Óburúkpâbí oo/chi, eringe nyí bwǎn ḿbé ba*da/fwon ne kámbé* ba/chi ba-kpee ǎ,

¹⁹ ba-nyît ba/fu, Óburúkpâbí o/mû ké kyikit emen kyíbóng ńkyí ociring o-tún n kyísí. Nyǐ o/mû kyíbóng o-tún n ké ejíí.

²⁰ Nyǐ o/jwo dyibyê ńdyí banet-bamgbokobá, o-chi banet ḿbé ba/mû ba/fu, baju kámbé, ba-fem.

²¹ Ké bubwô ámbu, ba/chi ba-sét kyi-kim ne dyizîn emen ké Záyon, ne ba/chi ba-kpee ǎ ké Jerúsélem,

²² ké nkéré eshê ne batu baa/cibi kyikit kyibónge ba-kye Óburúkpâbí ofê.

²³ Óburúkpâbí oo/chi mě n-firi kyeekyee ne bubwásíng ké byiko, ne oo/chi dyikpen ejí dyi-firi kaǎkím.

²⁴ Ô Osówo, me mu n-sét ng ǒ n/fu, *da mě ekoo dyikpen ejí kántîk* mú n*da/kâa ne*. Ô Óburúkpâbí, wo amu ne banyá.

²⁵ Wo a/chi ejíí ké aje nyí a/shwôm ké esim chwóó, ne wo a/chi bubóng ké abwô eyên wo oyén.

²⁶ Mbyí byi/chi byi-rím, nké wo a/chi a-waa. Mbyí kángkáng byi/chi byi-kâa wǎ kyídí. Wo a/chi a-yángê kámbyí wǎ byídí, ne mbyí byi/chi byi-rím.

²⁷ Nké wo amu eringe ebónge kángkáng nkéré, ne dyikpen eyên dii*man ne banyá*.

²⁸ Chwǒm kii*ba/chi kyi-ta bwǎn eten* ne ké bushú eyên, bwǎn ebe ba-kyú u kerededet.