SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 10 - Bokyi Bible

Nshwam mú Mpan mú Ntûntû

¹ Ô Óburúkpâbí, ebóng ńkyí wo a/bwom bě tíbítíbí. Ebóng ńkyí wo amu a-rôo ng bě byiko eyên ké nkéré be byi/firi ké afaníkong.

² Bambên atyém mbe ba-tông ng byiko ne mbe ba-kyâ banet-kyikpu busông. Kám kámbé ké boǒtám ḿbú mbé baa/kuu.

³ Mbên dyityém mu o-tông ng byiko ké byibî-okabe emen. Nshwam byěm mu o-shú u, ne mu o-né ng Óburúkpâbí.

⁴ Mbên dyityém oo*kérê kyi-kim ne Óburúkpâbí*. Nyǐ mu o-kabe ng ké byiko emen etông o/fu, Osówo o*da/byí chwǒm*.

⁵ Mbên dyityém o-já ng kanong ké kángkáng byěm. Oo*man enyît dyishí ne kyikû-bampan ḿbé Osówo mu o-két ng*. Nyǐ o-jwó ng banet-bushwôn emen.

⁶ Nyǐ mu o-sét ng byiko emen o/fu, me mm*ba/chi n-róng ne banyá*. Me ne banyá mm*ba/chi n-róng ké afaníkong*.

⁷ Byiraa emen bii/sú ne byibî-banshwam ne byisédéng ne bupii-achi. Nyǐ o-kwáng ng ké byibî-byiraa eraa ne ḿbyí bii*nyîn onet*.

⁸ Nyǐ mu o-rem m byiko ké kafâ-oshê o-bám m eringe nyí odaju banet ḿbé ba*da/chi kyibî*. Nyǐ mu o-kpúrî ng ké karem o-ri banet emen ḿbé mu o-ju ng.

⁹ Nyǐ mu o-bám m ké kyikit-dyirem emen wǎ ekpang. Nyǐ mu o-cít ng kyísí o-bám m banet-kyikpu. Nyǐ mu o-kám m kámbé ké boǒtám emen ḿbú mu o-kuu ng o-tut ng kámbé o-dim m.

¹⁰ O-shiryi banet ḿbé ochwâp o*fí kámbé* o-pwó kyísí. Kyibî-busa emen kii/kpógê kámbé.

¹¹ Mbên dyityém o-raa ng ké dyityém o/fu, Osówo o*fí o-kérê ng*. Osówo oo/cít achi ne oo*ba/chi o-ri mě ne banyá*.

¹² Ô Óburúkpâbí, kye bambên atyém ámbe busông. Zîim banet ḿbé mbe ba-ri ng afaníkong.

¹³ Kyi/cen nǎ ńkyí mbên dyityém odadángê Osówo o-raa ké dyityém o/fu, Osówo oo*ba/chi o-kye mě busông*.

¹⁴ Nké wo amu a-ri ng. Wo amu a-ri ng kyi-kim ne busông ne afaníkong, ne aa/kpá byiko kángkáng nkéré ḿbyí adachwáp. Onet mú ochwâp o*fí ǎ* mu o-kyâ ǒ byiko emen. Wo kángkáng nkéré aa/chwáp onet mú o*fí ne bonchí*.

¹⁵ Bên busa ḿbú bambên atyém ne ḿbú byibî-banet. Kûkye kámbé busông ké byibî-byěm ebe ḿbyí mbé baa/chi tete ba-mîng kámbyí echi.

¹⁶ Óburúkpâbí nké mu Otu mú ne banyá ne banyá. Banet ḿbé mbe ba-fâ esówo ekíri ba/chi ba-rím ké esí emen.

¹⁷ Ô Óburúkpâbí, wo a/chi a-jwo banshwam ḿbé banet ḿbé mbe ne atyém dek. Wo a/chi a-kye kámbé atyém ecíp.

¹⁸ Wo a/chi a-jwo bukyû ḿbú banet ḿbé mbe ba-cít ng kámbé ne ḿbú bwǎn-byibén. Wo a/chi a-két mpan o-nwa kámbé eringe nyí banet ḿbé badakpú baa*kye to afaníkong*.