Póróvep 4 - Bokyi Bible

Kanong ńké nke ké Bubong

¹ Bwǎn ejí, jwo n̂g ńkyí ńchân mu o-tángê e běn. Tî n̂g atông ba-jwo ǎ, ne ben ba/chi ba-já byinyídíng.

² Ńkyí me mu n-tángê e běn nkyi kanong. Ké bubwô ámbu, kû n̂g ezîim kánkyí kángkáng.

³ Me m/mû wǎn-dyityém mú bonchí ne boné ejí. Ké nkéré m/mû wǎsíng kyísí,

⁴ bonchí ejí o/mû mu o-tángê e mě byěm. Nyǐ o/mû o-sét ng mě o/fu, zîim ńkyí me mu n-sét ng ǒ. *Daráp kánkyí ne banyá*. Chi eringe nyí me mu n-sét ng ǒ ne wo a/chi a-kpen.

⁵ Já bubong ne byinyídíng. *Daráp* a-né nang oné ńkyí me mu n-sét ng ǒ*.

⁶ *Dachi a-né bubong* ne mbú bu/chi bu-ku ǒ. Bubong bujê ǒ, ne mbú bu/chi bu-bám ǒ.

⁷ Bubong ejá nkyi kiǐtí-chwǒm ńkyí adachi. Nang ebóng chwǒm kyikíri ńkyí amu ne nkyí, já byinyídíng.

⁸ Bubong bujê ǒ, ne mbú bu/chi bu-chi ǒ a-firi kiǐtí-onet. [Bukyú ǒ kiǐtí-chwǒm,] ne mbú bu/chi bu-bâ ǒ ne ofê.

⁹ Mbú bu/chi bu-kyú ǒ wǎ etam-butu nyí enong.

¹⁰ Wǎn ejí, tî atông a-jwo mě. Kúng ńkyí me mu n-sét ng ǒ wǎ kiǐtí-chwǒm, ne a/chi a-kpen a-tíbî.

¹¹ Me nn/tángê ǒ bubong ne bukwóp-dyikpen ekyú ḿbú bunong.

¹² Chwǒm kyi*fí ńkyí kyida ǒ eku* â amu a-cen n ne bubong* ne aa*kpán dyícíring* ké nkéré a-kú a-zóngê e ochéé*.

¹³ Kángkáng nkéré, zîim ńkyí aa/kwâa. Byěm eyên ḿbyí amu a-kwâa ng nké mbyi dyikpen eyên. Tún kámbyí kanong.

¹⁴ *Dace kyicê ńkyí byibî-banet mbe ba-câ*. *Dakúng kyiká-bucen ńkyí bambên atyém*.

¹⁵ *Dachi a-chi kánkyí*. *Dabwom fáráng ne byibî*. Né byibî. Ca ké bukwóp ḿbú eyên.

¹⁶ Bambên atyém baa*rê* â ba*da/chi ne kyibî-chwǒm*. Mbé ba-waa ng achi fúú tete ba-chi onet kyibî.

¹⁷ Dyityém ebên ne anwa mbyi kámbé wǎ byiryíng ne bato.

¹⁸ Kiǐfáng ńkyí banet ḿbé mbe ba-chi i kanong mbe ba-cen n nkyi wǎ óbyísû-dyicófóróng mú mu o-wángê e o-bâ tete dyicí dyi-wángê.

¹⁹ Nké kiǐfáng ńkyí bambên atyém nkyi kyifip kyífip wǎ buchú. Mbé mbe ba-myii ng, nké baa*man eri chwǒm ńkyí mbé ba/kpán ké nkyí*.

²⁰ Wǎn ejí, tî atông a-jwo ńkyí me mu n-sét ng ǒ. Jwo byiraa ejí.

²¹ *Dachi a-mîng kámbyí byi-fem ǒ ne banyá*. Kûzîim kámbyí a-tî kámbyí ké dyityém eyên.

²² Mbyí byi-kyâ nang yeě mú mu o-nyît ng kámbyí dyikpen ńdyí dyinong.

²³ Bwom chee a-kabe. Okabe eyên nké mu wǎ dyijwáng ńdyí dyikpen eyên.

²⁴ *Dachi a-raa chwǒm nang kyibónge ńkyí kyi*fí ntûntû*. *Dakyú ne abwô ké byisédéng* ne ké byiraa ḿbyí byi*fí ké kafâ*.

²⁵ Achi eyên akûtún kashú káshu. *Dafé dyishí eyên éshwân*.

²⁶ Kabe kanong kanong kyi-kim ne ńkyí amu a-chi i, ne nang ebóng chwǒm ńkyí amu a-chi i kyi/chi kyi-kyú kanong.

²⁷ Mîng byibî, a-cen dángdáng a-ca kashú. *Dachi a-monge a-mîng ochíchí-bukwóp*.