Póróvep 3 - Bokyi Bible

Bacê ḿbé ba/já Byisat

¹ Wǎn ejí, *dachi a-ráp ńkyí me mu n-tángê e ǒ*. Kángkáng nkéré, kûzîim ńkyí me mu n-sét ng ǒ n/fu, chi.

² Byěm ḿbyí mu n-tángê e ǒ byi/chi byi-kye ǒ dyikpen ńdyí dyinong, ńdyí adakpen a-tíbî.

³ *Dabángê ofê eyên ne dyityém eyên ńdyí a/fé ne Osówo byi-fem ǒ*. Bwá kámbyí ké kyitông eyên, a-sáng kámbyí ké dyityém eyên.

⁴ Â a/chi ńkyín, wo a/chi a-kûnyîn Osówo ne banet dyityém.

⁵ Bángê ké Óburúkpâbí ne dyityém eyên kángkáng. *Dajêem esim ké ńkyí a/kabe a/fu, wo amu a-nyît ng*.

⁶ Zîim Óburúkpâbí ké kángkáng byěm ḿbyí amu a-chi i, ne nyǐ o/chi o-tông ǒ kiǐfáng ńkyí kyinong.

⁷ *Dachi a-kabe a/fu, wo amu ne bubong a-shwôm eringe nyí amu ne mbú*. Chi ńkyí Óburúkpâbí o/sét, a-né echi chwǒm ńkyí kii*nwa*.

⁸ Â a/chi ńkyí Óburúkpâbí o/sét, kyi/chi kyi-kyú ǒ wǎ bukye ḿbú bunong ḿbú budaju byinêm, bu-chi bubân eyên bu-man.

⁹ Kye Óburúkpâbí ofê ké chwǒm eyip ńkyí kyi/nwa kyi-shwôm kángkáng byíkwôn ḿbyí esí nyi e-kyâ, a-kye ǎ.

¹⁰ Â wo a/chi ńkyín, nkám-byiryíng eyên o/chi o-sú ne byiryíng, ne bato ba/chi ba-jê ǒ ba-shwôm ḿbé aa*ba/chi a-chîman etî kámbé kángkáng*.

¹¹ Wǎn ejí, â Óburúkpâbí o-kú o-tángê e ǒ dyishí, bwom chee a-jwo, a-kúng kánkyí wǎ ekó ekuri.

¹² Óburúkpâbí mu o-tángê e banet ḿbé mbe ba-jê ng ǎ dyishí, wǎ eringe nyí bonchí odatángê wǎn emen mú oda ǎ enyîn dyishí.

¹³ Bunyîn-dyityém mbu ne onet mú o/firi ne bubong, mú mu o-já ng byinyídíng.

¹⁴ Mpún mu ké nkyí o-shwôm mú mu ké akpuga. Nkyi ǒ kiǐtí-chwǒm kyi-shwôm esang.

¹⁵ Bubong bu/shwôm byibwáng-gûl. Chwǒm kyi*fí ńkyí adakan ne mbú*.

¹⁶ Bubong bu-kyâ ǒ dyikpen ńdyí dyi/jê. Bu-kyâ ǒ to esang ne ofê.

¹⁷ Bubong bu-man n echi dyikpen eyên dyi-kyú ké bunyîn-dyityém, bu-sí ǒ ké kiǐfáng ńkyí afaníkong a*fí*.

¹⁸ Banet ḿbé ba/firi ne bubong mbe ké bunyîn-dyityém. Bubong bu-kyâ kámbé dyikpen.

¹⁹ Óburúkpâbí o/chi ejíí ké bubong emen. Ké byinyídíng emen nké o/tî bubóng ké kyikit ńkyí mbu.

²⁰ Bubong emen bu/chi buce bu-kûsen ne bu-chi ófíbí o-chi omu o-kûna ké esí.

²¹ Wǎn ejí, bwom shwaneshwane ké bubong ne byinyídíng eyên. *Dabángê kámbyí byi-fem ǒ*.

²² Mbyí byi/chi byi-kye ǒ dyikpen, dyikpen ńdyí kyijé ne bunyîn-dyityém.

²³ A-man n ecen a-ca ké kiǐfáng eyên nang dyícíring aa*kpán*.

²⁴ Bushî boo*chi ǒ ké nkéré aa/rí sáre* ne a-rê ng kanong kanong buchú bumúmú.

²⁵ Wo aa*ba/chi a-chîkédê ofong kyi-kim ne kiǐmút-afaníkong* wǎ nyí adabê a-kâm bambên atyém wǎ afú nyí aryên*.

²⁶ Óburúkpâbí o/chi o-fé ǒ dyityém. Nyǐ oo*ba/chi o-bángê ǒ a-róng ké kaǎtám*.

²⁷ Nang nkéré orá nké adaman echi, chi kanong a-kye banet ḿbé mbe ba-ryuu ng kánké.

²⁸ *Dasét orî-onet eyên a/fu, obám tete nencí* â a-man n ǎ echwáp ké abe ányi*.

²⁹ *Danam orî-onet eyên kyibî-chwǒm*. Nyǐ mu o-kyú u ne wo fáráng ne dyityém emen ké wo.

³⁰ *Dakán okân ké dyishí mú o*fí ne dyishí* ne onet mú o*da ǒ echi ne kyibî*.

³¹ Orêm o*da ǒ echi ne bannwa anwa* a-leme nang édúú ebe*.

³² Ké nǎ, kafâ ka-sa ng Óburúkpâbí ne banet ḿbé mbe ba-chi i byibî-byěm. Nké nyǐ mu o-sét ng banet ḿbé mbe ba-chi i kanong dyityém emen kángkáng.

³³ Óburúkpâbí mu o-shú u byibám ḿbyí bambên atyém, nké mu o-jware ng ḿbyí banet ḿbé mbe ba-chi i kanong.

³⁴ Bantông byiko ba*fí ǎ wǎ chwǒm* nké banet ḿbé mbe ba-tî ng byiko ebe kyísí mbe ba-ri ng kanong emen.

³⁵ Banet ḿbé mbe ne bubong ba/chi ba-já ofê mú onong, nké enyam-banet e/chi e-bwa e-fé byiko ebe éshwân chwóó.