Póróvep 16 - Bokyi Bible

¹ Be byi-man n ekyú ne okabe mú byěm echi, nké Óburúkpâbí nké [odasét ne kyi-man.]

² A-kabe ng a/fu, kángkáng byěm ḿbyí amu a-chi i mbyi kanong, nké Óburúkpâbí mu o-pan n dyityém eyên mpan.

³ Bí Óburúkpâbí o-jware okabe eyên ne kyi/chi kyi-nwa kyi-kye ǒ ké mǔ.

⁴ Kángkáng byěm ḿbyí Óburúkpâbí oo/chi mbyi ne bukwóp. Nang bambên atyém to mbe ne bukwóp ḿbú ebe, ḿbú budacen ne afaníkong.

⁵ Nang yeě mú mu o-tông ng byiko oo*nyîn Óburúkpâbí*. Óburúkpâbí oo*mîng kámbé ba-fem busông*.

⁶ Chi ńkyí Óburúkpâbí mu o-sét ng a-fé dyityém ne nyǐ, ne nyǐ o/chi o-pwoo ǒ ké byibî eyên. Kye Óburúkpâbí ofê ne kyibî-chwǒm kii*chi ǒ*.

⁷ Óburúkpâbí [o-man n ebírî] banet-bushwôn eyên ba-firi bacín eyên ké nkéré a-kú a-chi i ńkyí kyida ǎ enyîn.

⁸ Nkyi kanong ńkyí adajá kaǎnyín-akpuga ké bukwóp ḿbú bunong kyi-shwôm ńkyí adajá dyizu-akpuga ké bukwóp ḿbú boo*nwa*.

⁹ Dyityém-onet dyi-kabe ng byěm ḿbyí onet odachi, nké Óburúkpâbí nké mu o-tông ng bukwóp ḿbú onet odachi kámbyí.

¹⁰ Otu mu o-raa ng ké busa ḿbú Osówo. Mpan mú nyǐ odakét kángkáng nkéré mu ntûntû.

¹¹ Óburúkpâbí mu o-ryuu ng o/fu, érúmá ne byiféng-byěm ekan byikyú ḿbyí ntûntû, ne kángkáng ocím-kasî-byěm okyú mú acît a*fí*. [

¹² Batu baa*bángê ké byibî-byěm echi*] ké nǎ, kanong echi nke ka-tî ng kakyúng-butu shwaneshwane.

¹³ Otu o-ryuu ng o/fu, nyǐ o-jwo ng ntûntû, ne o-bwom m ne banet ḿbé mbe ba-sét ng ntûntû.

¹⁴ Onet mú mu ne bubong o-kan n eringe nyí nyǐ odachi otu o-kpú ké bunyîn-dyityém. Onet o-man n ekpú â otu o-kú o-sa ng kafâ.

¹⁵ Dyikpen ndyi ké bunyîn-dyityém ḿbú otu, ne kanong emen etông nke wǎ ófíbí mú odana omu ké ashí-kyifang.

¹⁶ Kyi/nwa kanong kanong ńkyí adakyú ne bubong ne byinyídíng kyi-shwôm esang nang erá.

¹⁷ Banet ḿbé mbe ba-chi i kanong ba-cen n ké kiǐfáng ńkyí byibî byi*fí*. Ké bubwô ámbu, bám byiko ké kyicê ńkyí amu a-wâa ng, ké nǎ, kyi-man n ǒ enyii dyikpen.

¹⁸ Akpee ekyé a-cen n ne bukyû. Byiko etông byi-chi i onet o-róng.

¹⁹ Kyi/nwa ńkyí adakyú degere a-kyú kyikpu kyi-shwôm ńkyí adakyú ké burwám-bantông byiko a-kyú ne abwô ké byěm ḿbyí ba/bam ba-koo.

²⁰ Tî dyityém ké ńkyí ba/tángê ǒ ne kyi/chi kyi-nwa kyi-kye ǒ. Tî dyityém ké Óburúkpâbí ne wo a/chi a-kyú ké bunyîn-dyityém.

²¹ Ba-nyît ng onet mú mu ne bubong ké byinyídíng emen. Bunyîn-ejá emen bu-kyâ kyitíring.

²² Dyikpen ńdyí banet ḿbé mbe ne bubong ndyi dyi-fím m ké bubong, nké nkyi nkéré ebên ńkyí onet odakan o/fu, nyǐ o-tángê e enyam-onet.

²³ Banet ḿbé mbe ne bubong ba-kabe ng ne ba-faa ojá. Ńkyí mbé badafu kâng kyi-kyâ kyitíring kyi-shwôm.

²⁴ Byiraa-dyityém ecángê mbyi wǎ bakút-bukwan ḿbé badanyîn ké omiríng ne ba-chi i byiko eyên byi-kyú nyangenyange.

²⁵ Bukwóp ḿbú amu a-kabe ng a/fu, mbu bukwóp ḿbú bunong bu-man n ekyú bukwóp-bukyû.

²⁶ Omiríng mú nchi bǎmkpóngé o-chi i ǎ o-chi bǎmkpóngé o-fé busa, ké nǎ, nyǐ mu o-ryuu ng o/fu, nyǐ ozût.

²⁷ Banet-byibî ba-kyé ng akwóp nyí mbé badanémê banet. Nang byiraa ebe mbyi byi-mang ng ne byibî.

²⁸ Bambên atyém nké mbe ba-káng ng eram. Mbé mbe ba-cen n ne byiraa ba-bên n bacín eryí.

²⁹ Bannwa anwa ba-nîm m bacín ebe, ba-sí kámbé ké bukwóp ḿbú boo*nwa*.

³⁰ Bám byiko eyên ne banet ḿbé mbe ba-myâp ng ǒ achi. Mbé baa/kabe kyibî-chwǒm.

³¹ Kpen a-tíbî, ányi eyáré nyí kanong echi. Ébyî ké dyishí, ányi etam-butu nyí ofê.

³² Nkyi kanong ńkyí adakyú chee kyi-shwôm ńkyí adatông busa. Nkyi kanong ńkyí adaníbî byiko eyên kyi-shwôm ńkyí adaníbî oshê.

³³ Banet mbe ba-twóp ng ámám eringe nyí badanyît okabe mú Osówo, nké Osówo nké odasét eringe nkyi.