Póróvep 14 - Bokyi Bible

¹ Bubong ḿbú banyinyi nké mbu bu-bi ng byibám ebe, nké enyam eróng nyi e-bên n kámbyí.

² Wo a-tông ng a/fu, wo amu a-kyâ Óburúkpâbí ofê â amu a-sét ng ntûntû. Wo a-tông ng a/fu, wo a*fí a-kyâ ǎ ofê* â amu a-sét ng byisédéng.

³ Byiko etông ḿbyí enyam-onet byi-chi i enyam-onet ányi e-kûraa kyiraa e-shwôm. Byiraa ḿbyí onet mú mu ne bubong byi-ku ng ǎ ké afaníkong.

⁴ Â a*fí ne byitú ḿbyí byida ǒ echi bǎmkpóngé ké kyifát* [nkám-byiryíng eyên o-kyú u kafâ dyikáá, nké â amu ne mbyí, nkám eyên o-sú u pwat ne byiryíng.]

⁵ Ntûesé mú badafé dyityém ne nyǐ o-sét ng ntûntû kángkáng nkéré, nké mú baa*man efé dyityém ne nyǐ* oo*sét chwǒm kyikíri* kyi-cibi ne byisédéng*.

⁶ Banet ḿbé mbe ba-tông ng byiko baa*man ekyú ne bubong* nké chwǒm kii*zût banet ḿbé mbe ne bubong ekwâa*.

⁷ *Dakyú fáráng ne enyam-banet*. Mbé ba*fí ne chwǒm ńkyí mbé bada ǒ etángê*.

⁸ Ebóng ńkyí onet mú mu ne byinyídíng mu ne bubong. Ké nǎ, nyǐ mu o-nyît ng ńkyí odachi. Ebóng ńkyí enyam-onet mu enyam. Ké nǎ, nyǐ mu o-kabe ng nké nke o/fu, nyǐ mu o-nyît ng. [

⁹ Enyam-banet baa*kérê* nang ba/chi kyibî* nké banet ḿbé mbe ba-chi i kanong ba-ryuu ng opwoo.]

¹⁰ Bunyîn-dyityém eyên ne bafip eyên byi/já ǒ wo oyén. Onet o*fí mú odakyii kámbyí ne wo*.

¹¹ Ba-bên n kyise ńkyí kyibî-onet. Ńkyí onet mú mu o-chi i kanong kyi-waa ng cip.

¹² Bukwóp ḿbú wo amu a-kabe ng a/fu, mbu kanong, bu-man n ekyú bukwóp-bukyû.

¹³ Éjwô ejwô e-man n ecít bafip. Ké nkéré bunyîn-dyityém boo/man, bafip ba-waa ng kángkáng nkéré.

¹⁴ Byibî-banet ba/chi ba-já ńkyí kyi/kwárê ne mbé. Banet ḿbé mbe ba-chi i kanong ba/chi ba-koo eyáré [ké byěm ḿbyí mbé mbe ba-chi i.]

¹⁵ Enyam-onet o-bángê e nang ebóng. Banet ḿbé mbe ne byinyídíng ba-bám m byiko ebe.

¹⁶ Banet ḿbé mbe ne bubong ba-tî ng byiko ebe eringe nyí mbé baa*nung ké afaníkong* nké enyam-banet baa*kérê* ne mbé ba-dûu ng ké byěm.

¹⁷ Banet ḿbé mbe ne kiikuku ba-chi i byěm-enyam ényam. Banet ḿbé mbe ne bubong [ba-kyú u chee.]

¹⁸ Banet ḿbé ba*da/nyît ne chwǒm* ba/chi ba-já ńkyí kyi/kwárê ne enyam ebe eróng, nké banet ḿbé mbe ne byinyídíng ba/chi ba-koo eyáré-byinyídíng.

¹⁹ Banet-byibî ba/chi ba-tíngê kyísí ba-kye banet ḿbé mbe ba-chi i kanong ofê, ba-tîm kámbé arông ba/fu, banyángê kámbé.

²⁰ Onet-kyikpu oo*nyîn onet nang obónge* nang onet mú mu ǎ fáráng* nké onet-esang o-kyú u ne bacín chwóó.

²¹ Â wo amu a-ryuu ng a/fu, wo a-kyú u ké bunyîn-dyityém, cángê dyityém ne banet-kyikpu. Nkyi kyibî ńkyí adakám onet nang orá fúú.

²² Banet ba/chi ba-fé dyityém ne wo ba-kye ǒ ofê â amu a-kabe ng kanong echi. Â amu a-nam m kyibî, wo amu a-tánê e.

²³ Chi bǎmkpóngé ne wo a/chi a-já ńkyí adaryí. Â wo amu a-kyú u ké byikit a-raa ng byiraa, a-waa ng kyikpu.

²⁴ Banet ḿbé mbe ne bubong ba-yárê ng kámbé esang, nké enyam-banet [ba-nyît ng kámbé] ké enyam-byěm ebe.

²⁵ Ntûesé mú mu o-sét ng ntûntû o-nyángê e akpen nyí banet, nké mú mu o-sét ng byisédéng o-chi i ba-kám banet.

²⁶ Onet o-kyú u ne dyityém ńdyí shwanshwan â mu o-kyâ Óburúkpâbí ofê. Nyǐ ne bwǎn emen ba-já ng kyikit-dyirem.

²⁷ A*fí a-ryuu ng bukyû*? Kye Óburúkpâbí ofê, ké nǎ, dyikpen ndyi dyi-fím m ányi.

²⁸ Bujê-banet ḿbé otu mu o-níbî ng nké nkyi kyi-tông ng eringe nyí otu ámu o/rêe. Nyǐ oo*kyú onet* â mbé ba*fí*.

²⁹ Â wo amu chee, ányi wo amu ne bubong, nké â amu ne kiikuku chwóó, ányi amu a-tông ng eringe nyí wo amu enyam.

³⁰ Dyityém ńdyí ndyi chee dyi-chi i enyam-byiko e-kyú nyangenyange, nké orêm mu wǎ ntimelô-kyibáp.

³¹ Â wo amu a-cít ng banet-kyikpu, ányi wo amu a-kyâ Osówo mú o/chi kámbé edángé, nké dyityém ecángê ne banet-kyikpu, ányi Osówo efé.

³² Bambên atyém ba-cen n byiko ebe ne bukyû ké byěm ebe echi, nké banet ḿbé mbe ba-chi i kanong ba-fem m ké [ntûntû] ebe.

³³ Bubong mbu ké okabe nang orá mú onet mú mu ne byinyídíng. Enyam-banet ee*nyît [chwǒm*] kyi-kim ne bubong*.

³⁴ Kanong echi ka-chi i oshê o-kyú kiǐtí. Byibî echi byi-fâ oshê nang orá éshwân.

³⁵ Ḿgbán mú mu o-chi i bǎmkpóngé emen ne bubong o-nyîn n otu, nké o-kyâ ḿgbán mú o*fí o-chi i kanong* busông.