Póróvep 12 - Bokyi Bible

¹ Onet mú bubong mbu bu-jê ng ǎ o-ryuu ng o/fu, batángê ǎ dyishí. Enyam-onet nké oo*ryuu o/fu, batángê ǎ dyishí*.

² Onet mú mu o-chi i kanong o-nyîn n Óburúkpâbí, nké Óburúkpâbí o-két ng mpan o-bên onet mú mu o-kabe ng kyibî.

³ Dyityém ebên dyi-chi i ǒ a-waa ké bushî, nké banet ḿbé mbe ba-chi i kanong baa*nwa eking*.

⁴ Otyép o-tông ng byiko, ne o-kyú u ké bunyîn-dyityém ké onyi mú mu o-chi i kanong, nké onyi mú mu o-fâ otyép emen éshwân mu wǎ ntimelô-kyibáp mú oo/nung ǎ ké byikúú.

⁵ Banet ḿbé mbe ba-chi i kanong baa*ryí ǒ acît*. Nké bambên atyém ba-nîm m ǒ.

⁶ Byiraa ḿbyí bambên atyém byi-cen n onet ne bukyû, nké ḿbyí banet ḿbé mbe ba-chi i kanong byi-nyii ng onet.

⁷ Bambên atyém mbe ba-kpú u ne kyikû-banet ebe kángkáng, nké kyikû-banet ńkyí banet ḿbé mbe ba-chi i kanong nkyi kyi-kpen n kyi-câ kashú.

⁸ Ba-kpee ng ǒ â wo amu ne bubong, nké â amu enyam, banet ba-tún n ǒ fúú.

⁹ Nkyi kanong ńkyí adashû byiko eyên kyísí a-chi bǎmkpóngé ḿbé adajá kyiryíng kyi-shwôm ńkyí adakúng byiko eyên wǎ kiǐtí-onet a-waa esong.

¹⁰ Onet mú mu kanong o-tún n byitú emen, nké bambên atyém ba-bên n atyém ne byitú ḿbyí ebe.

¹¹ Mkpang byiryíng mú mu o-fâ busa ké bǎmkpóngé emen o-kyú u ne byiryíng chwóó ḿbyí odaryí, nké nkyi enyam eróng ńkyí adabên nkéré ké byěm echi ḿbyí byi*da/byí chwǒm*. [

¹² Kángkáng ńkyí bambên atyém mbe ba-ryuu ng kyi*da/shwôm byibî-byěm ekyé ba-chi* nké banet ḿbé mbe ba-chi i kanong mbe shwanshwan.]

¹³ Mbên dyityém mu o-fâ dyígep ké kyitông emen nyǐ oyén ké byiraa emen, nké onet mú mu o-chi i kanong o-fem m ké afaníkong.

¹⁴ Eyáré eyên nyi ké ńkyí amu a-raa ng ne ńkyí amu a-chi i, wo a-já ng ńkyí kyi/kwárê ne wo.

¹⁵ Enyam-banet kángkáng nkéré ba-kabe ng ba/fu, mbé mbe ba-chi i kanong. Banet ḿbé mbe ne bubong ba-jwo ng bacê.

¹⁶ Enyam-onet o-chi i ba-nyît babap ké nkéré o-kú o-sa ng kafâ. Banet ḿbé mbe ne byinyídíng baa*kúng edángé wǎ chwǒm*.

¹⁷ Acît eryí a*fí ké nkéré aa/sét ntûntû* nké byisédéng byi-cen n ne acît eryí.

¹⁸ Byiraa ḿbyí byi*fí ne okabe* byi-némê e onet wǎ kashwám, nké ḿbyí mbyi ne bubong byi-chi i onet o-nyange.

¹⁹ Dyikpen ńdyí kyisédéng ndyi kaǎkím, nké ntûntû o-kpen n ne banyá.

²⁰ Ba/chi ba-byí banet ḿbé mbe ba-nam m byibî-byěm echi kiǐmút, nké banet ḿbé mbe ba-tî ng okabe ké kanong echi ba/chi ba-já bunyîn-dyityém.

²¹ Kyibî-chwǒm kii*ta banet ḿbé mbe ba-chi i kanong* nké bambên atyém ba*fí ne chwǒm kyikíri* kyi-cibi ne afaníkong*.

²² Bansêt byisédéng ba-sa ng Óburúkpâbí kafâ, nké banet ḿbé mbe ba-chi i eringe nyí mbé ba/sét ba-nyîn n ǎ.

²³ Banet ḿbé mbe ne byinyídíng baa*sét ńkyí mbé mbe ba-nyît ng* nké enyam-banet e-tông ng enyam ebe nyí ba/róng.

²⁴ Busa ké bǎmkpóngé bu-kyâ busa. Dyidare dyi-chi i ǒ a-firi ósóng.

²⁵ Ofong ekédê o-man n eman bunyîn-dyityém, nké byiraa ḿbyí byinong byi-chi i ǒ a-kyú ké bunyîn-dyityém.

²⁶ Onet mú mu o-chi i kanong o-tông ng ocín emen kiǐfáng, nké kiǐfáng ńkyí bambên atyém kyi-sí ng kámbé ba-tánê. [

²⁷ Wo aa*já ńkyí amu a-kyé ng* â amu a-dare ng* nké â amu a-chi i bǎmkpóngé a-fâ busa, wo a/chi a-já esang chwóó.]

²⁸ Kanong echi ányi bukwóp-dyikpen. [Dyityém ebên] ányi bukwóp-bukyû.