Póróvep 10 - Bokyi Bible

Atím-Ekan nyí Otu-Sólómon

¹ Nyín něen atím-ekan nyí Otu Sólómon. Wǎn mú mu ne bubong o-chi i bonchí o-kyú ké bunyîn-dyityém, nké mú mu enyam o-kyâ boné bafip.

² Efang efang ké kyibî-bukwóp ee*chwáp ǒ* nké kanong echi ka-nyii ng dyikpen eyên.

³ Óburúkpâbí oo*mîng banet ḿbé mbe ba-chi i kanong ba-kyú esong* ne oo*bángê bambên atyém ba-já ńkyí mbé mbe ba-ryuu ng*.

⁴ Dyidare dyi-chi i ǒ a-kyú kyikpu, nké busa ké bǎmkpóngé echi bu-chi i ǒ a-kyú ne esang.

⁵ Onet mú mu ne bubong o-fuu ng byiryíng ké nkéré bii/kán. Nké nkyi chwǒm-éshwân ńkyí adarê ké nkéré-byiryíng efuu.

⁶ Osówo o-jware ng onet mú mu kanong, nké bunyîn-ejá ḿbú mbên dyityém mbu bu-cít ng kyibî-dyityém emen.

⁷ Ozîim mú banet ḿbé mbe kanong o-chi i njware, nké kaa*rí ne ba-ráp bambên atyém*.

⁸ Banet ḿbé mbe ne bubong ba-koo ng bacê ḿbé banong. Nké banet ḿbé mbe ba-raa ng byiraa-enyam ényam ba/chi ba-tánê.

⁹ Banet ḿbé mbe ba-sét ng ntûntû ba-kyú kanong, nké ba/chi ba-kám bansêt byisédéng.

¹⁰ Onet mú o*fí o-bángê e ntûntû esét* mu o-cen n ne afaníkong, [nké onet mú o*fí o-shî ng ebîn banet* mu o-cen n ne bunyîn-dyityém.]

¹¹ Ejá nyí onet mú mu o-chi i kanong nyi e-kyâ dyikpen, nké nyí mbên dyityém nyi e-cít ng kyibî-dyityém emen.

¹² Busa-dyityém bu-cen n ne afaníkong, nké kyijé kyi-pwoo ng kángkáng byibî.

¹³ Banet ḿbé mbe ne bubong ba-raa ng byiraa-bubong, nké kyi/kwárê ńkyí badakye enyam-banet busông.

¹⁴ Banet ḿbé mbe ne bunong ba-já ng kángkáng byinyídíng ḿbyí badaman ejá, nké ké nkéré enyam-banet e-kú e-raa ng, ányi afaníkong a/firi fáráng.

¹⁵ Esang e-ku ng nfang-onet ké afaníkong, kyikpu kyi-ju ng onet-kyikpu.

¹⁶ Kanong echi ka-ryí i mpún mú dyikpen. Byibî echi byi-ryí i mpún mú byibî.

¹⁷ Banet ḿbé mbe ba-jwo ng bacê ba/chi ba-kpen, nké banet ḿbé mbe ba-né ng ejwo ba/chi ba-tánê.

¹⁸ Onet mú mu o-rôo ng dyityém-busa emen o-chi i nsêt byisédéng. Nang yeě nké mu o-ram m eram o-chi i enyam-onet.

¹⁹ Kyiraa eraa chwóó kyi-cen n ne kyibî echi. Â wo amu ne bubong, a-cíbî ng pyêp.

²⁰ Byiraa ḿbyí onet mú mu o-chi i kanong mbyi wǎ étingétingé-akpuga. Okabe mú mbên dyityém o*da/byí chwǒm*.

²¹ Byiraa ḿbyí onet mú mu o-chi i kanong byi-chwáp ng banet chwóó, nké a-man n eju byiko eyên ké enyam eróng.

²² Ojware mú Óburúkpâbí o-chi i ǒ a-firi nfang-onet, [bǎmkpóngé echi a-fé busa baa*chi ǒ a-firi nfang-onet a-shwôm*.]

²³ Nkyi enyam ńkyí adakyú ne bunyîn-dyityém ké byěm echi ḿbyí bii*nwa* nké banet ḿbé mbe ne byinyídíng ba-jêe ng ké nkéré mú ba/chîjá bubong.

²⁴ Banet ḿbé mbe ba-chi i kanong ba-já ng ńkyí mbé mbe ba-ryuu ng, nké bambên atyém ba/chi ba-já ńkyí mbé badashî ba-shwôm.

²⁵ Afú nyí aryên a-bâ ng etugi bambên atyém a-pwó kú, nké banet ḿbé baa*sét byisédéng* ba-bwom m ne banyá.

²⁶ *Dabángê onet-dyidare o-chi ǒ bǎmkpóngé*. Kyi-kû ng ǒ eruu wǎ kiiruuruu-bukye ké asháng eyên ne kyi-sa ng ǒ wǎ arúkwâ ké achi eyên.

²⁷ Chi ńkyí Óburúkpâbí mu o-sét ng ne a/chi a-kpen a-tíbî, nké bambên atyém mbe ba-kpú u ne nkéré ebe o-kûfyi.

²⁸ Okabe mú banet ḿbé mbe ba-chi i kanong o-kyâ kámbé bunyîn-dyityém, nké mú bambên atyém oo*ba/chi o-byí kámbé dyishí*.

²⁹ Óburúkpâbí mu o-ku ng banet ḿbé mbe ba-sét ng ntûntû, nké o-ju ng ḿbé mbe ba-chi i ńkyí kii*nwa*.

³⁰ Banet ḿbé mbe ba-chi i kanong ba-bwom m ne banyá, nké bambên atyém baa*kpen ké esí ńnyín*.

³¹ Banet ḿbé mbe ba-chi i kanong ba-raa ng byiraa-bubong, nké ba/chi ba-chi banet ḿbé mbe ba-raa ng byibî ba-cíbî pyêp.

³² Banet ḿbé mbe ba-chi i kanong ba-tông ng dyityém ecángê ké byiraa ebe, nké kángkáng nkéré bambên atyém ba-raa ng byibî-byiraa.