Okwan 6 - Bokyi Bible

¹ Ḿbé banyinyi ba/chîfaa ba/fu, onyinyi mú o/nwa o-shwôm kángkáng banyinyi, ókyî eyên oo/jé nyá. Sét bě kyicê ńkyí ókyî eyên o/jé eringe nyí be byida ǒ echwáp a-kyé ǎ. Mú onyinyi o-faa o/fu,

² ókyî ejí oo/wâa ké kyifát emen ké kyikit ńkyí byíkwôn ḿbyí byidanyîn kyinung mbyi byi-kán n. Nyǐ mu o-nen n ebû emen ké dyikán ne mu o-két ng ekong-biǐbyâa.

³ Ókyî ejí o-chi i mú ejí, me to n-chi i mú emen. Nyǐ mu ké biǐbyâa o-nen n ebû emen. Mú onyinchéng o-faa o/fu,

Ekwan Etánge

⁴ ókyî ejí, wo amu a-nwa ng wǎ Jerúsélem, amu a-nwa ng wǎ oshê mú Tyíza [ne amu a-nwa ng a-shwôm wǎ biǐtí-eshê ḿbyín.]

⁵ Bírî achi eyên kú, ké nǎ, nyǐ a*fí a-mîng ng mě n-chi chwǒm*. Eji eyên nyi wǎ dyibóng-ebû nyí nyi e-pyiryi ng e-shû eku nyí Gyílet.

⁶ Asháng eyên nyi a-cé ng kpárádádát wǎ dyibóng-ebû ńdyí ba/kôo kándyí omu abeabe. Busháng nang bubónge bu*da/tánê*. Nyǐ kángkáng a/tyeem.

⁷ Ánán eyên nyi a-san n ké kafâ-kaǎsém eyên ńké a/cít.

⁸ Nang otu o-kyú ne bajam-banyi bachât, ne bajam-banyi ḿbé bwǎsíng, ne ocím-ásé mú oo*nwa epan*

⁹ me onyinyi obónge nké nke mu o-jê ng mě, ne nyǐ mu o-nwa ng wǎ karúú. Nyǐ mu ncen-wǎn-onyinyi mú boné emen. Nyǐ mu wǎn-dyityém-boné. Kángkáng banyinyi mbe ba-tún n ǎ ba-kpee ng ǎ. Banyi-batu ne banyi ḿbé bwǎsíng mbe ba-kwán n ǎ ekwan-akpee.

¹⁰ Yeě něen mú achi emen nyi wǎ kiinwángé ńkyí dyicófóróng. Nyǐ mu o-nwa ng bunong ne mu kpárám. [Nyǐ mu o-san n wǎ óbyísû ne wǎ otukáku.]

¹¹ Me n/shû kaku n-ca dyijî-byichí ḿbyí badakó ámon n-da-ri boosu-byichí ké owo, n-ri eshǎan nyí efyîfî nyí ee/byí ké byichí ne ekong nyí ee/chi ké byichí ḿbyí badakó pamagáránat. [

¹² Me mu n-tím m banê. Wo aa/chi mě n*fí to m-man n ekám byiko kyi-kim ne kyijé* éné wǎ ntut mútu mú mu o-dim m byití. Ḿbé banyinyi ba/chîfaa ba/fu,]

¹³ wǎn-onyinyi mú o/fím Shúlam, [ne ane.] Mîng bě byi-tún ǒ ké nkéré a-kú a-ne ng ane. Mú onyinyi o-faa o/fu, ebóng ńkyí ben bada mě etún ké nkéré n-kú n-ne ng ane ké bushú-banet.