Okwan 4 - Bokyi Bible

¹ Mú onyinchéng o-faa o/fu, onet-kyijé ejí, wo amu a-nwa ng kanong kanong. Achi eyên nyi a-san n ne kyijé ké dyifít-kyídí-bushú eyên ecít. Eji eyên nyi a-náng ng wǎ dyibóng-ebû ńdyí ndyi dyi-shû ng eku nyí Gyílet.

² Asháng eyên nyi a-cé ng wǎ etám-ebû nyí baa/pwát kányí eríp kántîk ba-kôo kányí omu. Busháng bu*fí nang bubónge ḿbú boo/zûu bu-tánê*. Nyǐ amúmú a/tyeem kerededet.

³ Byibî-ocím eyên mbyi wǎ bucat ḿbú shíshét, nang ké byidanwa bunong ké nkéré a-kú a-raa ng kyiraa. Ánán eyên nyi a-san n ké kafâ-kaǎsém eyên ńké a/cít.

⁴ Kyitông eyên nkyi wǎ kiǐnyáám-kyise-mbâm ńkyí Otu Dívit. [Nkyí nkyi gogégogé] ne byibwáng-kyitông wǎ égot-édem etánge nké ba/kpong ké nkyí.

⁵ Abî eyên nyi wǎ bwǎn-etong ḿbé ba/fwon kámbé afúng ne mbe ba-ryí i byiryíng ké biǐbyâa.

⁶ Me n/chi n-kyú ké kaku ńké burwan ḿbú badakó mîi ne ḿbú badakó faránkínsen tete bufú ḿbú dyicófóróng bu-tugi tete kyifip kyi-man.

⁷ Onet-kyijé, wo amu a-nwa ng bunong kanong kanong ne wo amu kerededet.

⁸ Ókyî ejí, fím ké eku nyí Lebánon a-bâ ne me ké kyikû. Shû kyíbóng-eku nyí Lebánon a-bâ ne me. Shû kyíbóng-eku nyí Ámana ne nyí Séne ne nyí Hémon, nyí ekpang nyi e-kyú u.

⁹ Onet-kyijé ne ókyî ejí, achi eyên ne byibwáng eyên ḿbyí a/fé ké kyitông bii/chi mě n*fí to m-man n ekám byiko*.

¹⁰ Onet-kyijé ne ókyî ejí, kyijé eyên nkyi kyi-kyâ mě bunyîn-dyityém. Kyijé eyên nkyi kanong kyi-shwôm bato. Bakút ḿbé eyên mbe ne kyinung ba-shwôm nang bará.

¹¹ Onet-kyijé ejí, wo amu ne bunyîn-bakút-bukwan ké byibî-ocím eyên. Kabyíbabang eyên nke mě wǎ abî-mpong ne bakút-bukwan. Byídí eyên mbyi ne kángkáng kyinung-bakút-kyinung ḿbé Lebánon.

¹² Onet-kyijé ne ókyî ejí mu wǎ kyifát ńkyí nkyi remê, ńkyí ba/bi ekpe ba-wâng kánkyí. Mu wǎ kaace ńké nke remê.

¹³ Ányi nké byichí mbyi byi-kán n. Mbyí mbyi byi-kán n wǎ dyijî-byichí ḿbyí badakó pamagáránat ne mbyi byi-zím m byirim ḿbyí mbyi byi-nwa ng kanong kanong. Byichí ḿbyí badakó héna ne nât,

¹⁴ ne sáforon ne kálamus ne sínamon nang burwan ḿbú dyizong nang dyirá byi*fí ké bukaa*. Byichí ḿbyí badakó mîi ne ḿbyí badakó álos mbyi byi-kán n ányi cibicibi ne kángkáng byichí ḿbyí byidanyîn kyinung.

¹⁵ Wo a-chi i kyifát ńkyí omu mu o-byí i ne dyijwáng ńdyí omu mú okpó ne buce ḿbú mbu bu-fím m ké Lebánon bu-sen n bu-câ. Mú onyinyi o/chîfaa o/fu,

¹⁶ bufú ḿbú mbu bu-fím m bushûyû, bûu. Bufú ḿbú mbu bu-fím m busyísen, tugi ké kyifát ejí. Chi bufú bu-sú ne kyinung-bakút-kyinung. Mîng ókyî ejí o-bâ ké kyifát emen o-ba-ryí byirim-byichí ḿbyí byinong byinong.