Okwan 3 - Bokyi Bible

¹ Kángkáng dyicí, me m/mû n-ri ng onet mú mu o-jê ng mě ké burê ké nkéré n-kú n-rê ng ké karíng ejí. Me m/mû n-kyé ng ǎ, nké n*da ǎ eman eri*.

² Me n/yêe ké oshê omúmú ne ké byiká-oshê ne ké bantim-byikit. Me n/kyé onet mú mu o-jê ng mě. Me n/kyé, nké n*da ǎ eri*.

³ Banet ḿbé mbe ba-bám m oshê ba/ri mě. Me m-bí kámbé n/fu, ben ba/ri onet-kyijé ejí?

⁴ Me n/ri ǎ ńdyí m-mîng ng kámbé m-bâ. Me n/níbî ǎ, n*da ǎ ebángê o-dim* tete n-kúng ǎ byi-dim ké kyise ńkyí boné ejí, ké nfût mú ba/mû ba/fwon mě.

⁵ Banyinyi-Jerúsélem, ryí n̂g mě ocím ba-sem ké dyizîn ńdyí enyam nyí edakwáng e-shwôm etong ba/fu, ben baa*ba/chi ba-két bě kyijé eten echi*. Mú onyinyi o/chîfaa o/fu,

Ekwan Echât

⁶ ebóng chwǒm kyi/fím ké kyikim-dyikán nkyi kyi-bâ něen wǎ okpí-arúkwâ ne kyinung ńkyí burwan ḿbú badakó mîi ne faránkínsen ne kángkáng bakút-kyinung ḿbé bancen kasî mbe ba-shee ng.

⁷ Otu Sólómon nké ba/tû ǎ ké kakyúng-butu emen mu o-bâ. Bajam-basúja bachât ḿbé ba/nwa ba-shwôm basúja ké Ézerel nké mbe ba-bám m ǎ.

⁸ Mbé kángkáng ba-nyît ng kanong kanong eringe nyí badanwa byití ké kashwám, ne ba-chi i bachíchí-bannwa byití. Nang yeě mu ne kashwám ké osín bwábwá o-bám m â bunwa bu/chi bu-róng ne buchú.

⁹ Baa/tû Otu Sólómon ké kakyúng-butu ńké ba/chi ké kyichí ńkyí kyinong kyinong.

¹⁰ Baa/mwane syílyíba ké byikwap emen kángkáng. Ba/cít kánké ne kyídí ńkyí ba/tím kánkyí ké bacat-gûl. Bukyúng emen ba/cít kámbú ne kyídí ńkyí nkyi shíshét, ńkyí banyinyi-Jerúsélem ba/tím ne kyijé.

¹¹ Banyinyi-Záyon, bâ n̂g ba-ba-ri Otu Sólómon. Nyǐ o/cít etam-butu nyí boné emen o/cít ǎ ké dyishí, ké dyicí-dyibé emen ńdyí bunyîn-dyityém ne ojêe.