Okwan 2 - Bokyi Bible

¹ Me n*fí chwǒm kyikíri* kyi-cibi ne ekong-byichí nyí nyi ké Sháron* ne ekong-kiǐbyâa nyí nyi ké ewo*. Mú onyinchéng o-faa o/fu,

² onet-kyijé ejí mu ké burwám-banyinyi wǎ ekong-kiǐbyâa nyí nyi ké byiwong. Mú onyinyi o/chîfaa o/fu,

³ onet-kyijé ejí mu ké burwám-banyinchéng wǎ dyisín-kyichí ńkyí badakó ápil, ńkyí nkyi ké burwám-byichí ḿbyí ké dyikán. Me nkyi kyi-nyîn n mě ekyú ké kiǐríribí-kyichí ánkyi, ne byirim emen mbyi byi-nyîn n mě ké ocím.

⁴ Nyǐ o/bê ne me ké ócâm-dyijî emen ne o/tông mě kyijé kanong kanong.

⁵ Kye mě byirim-byichí ḿbyí badakó rézen n-ryí n-chîfiri ne busa, a-kye mě byirim-byichí ḿbyí badakó ápil n-ryí enyam-byiko ejí e-bâa, ké nǎ, kyijé eten echi kii/koo mě busa.

⁶ Bubwô-eku emen mbu mě ké dyishí ne bubwô-etyebéng emen mbu bu-tare ng mě ké byiko.

⁷ Banyinyi-Jerúsélem, ryí n̂g mě ocím ba-sem ké dyizîn ńdyí enyam nyí edakwáng e-shwôm wǎ etong ba/fu, ben baa*ba/chi ba-két bě kyijé eten echi*. Mú onyinyi o/chîfaa o/fu,

Nnyinyěng-Okwan

⁸ me mu n-jwo ng ejá nyí onet-kyijé ejí. Nyǐ mu o-zóngê e o-pyiryi ng eku o-bâ o-kâm mě.

⁹ Onet-kyijé ejí mu wǎ etong, mu wǎ kyisu-otyép-enyam ńkyí kyidakwáng kyi-shwôm. Nyǐ nké mu áku cip ké bukô-ekpe. Nyǐ mu o-tún n ké mbwo-kyise.

¹⁰ Onet-kyijé ejí mu o-pem m ne me. Mú onyinchéng o-faa o/fu, onet-kyijé ejí, bâ kâng. Bâ ne me ké kyikû, ǎ onet-kyijé ejí.

¹¹ Kyifang kii/shwôm, baǎmú baa/mîng ena,

¹² ne ekong-byichí ké dyikán ee/paam. Nyín nkéré mú ekwan ekwán. Banet mbe ba-jwo ng ekwan nyí ámalê ké dyikán.

¹³ Byirim-byichí ḿbyí badakó fyîk bii/kpet ebwam. Bufú boo/sú ne kyinung ńkyí ekong-byichí nyí nyi e-byí i. Onet-kyijé ejí, bâ kâng. Bâ ne me ké kyikû, ǎ onet-kyijé ejí.

¹⁴ Wo amu wǎ karúú ńké nke ka-rem m kyikit-buká bu/járê. Mîng mě n-ri bushú eyên ḿbú bunong bunong n-jwo ejá eyên to nyí edanyîn.

¹⁵ Kám enyam nyí nyi e-bên n bě ekong-byichí nyí nyi e-byí i ké byifát eten. Mú onyinyi o/chîfaa o/fu,

¹⁶ onet-kyijé ejí o/já mě, ne me to n/já ǎ. Nyǐ mu o-nen n ebû emen ké biǐbyâa,

¹⁷ tete bufú-dyicófóróng bu-kpet etugi tete kyifip to kyi-rím. Bwa esim, ǎ onet-kyijé ejí, wǎ kyisu-otyép-enyam ńkyí kyidakwáng kyi-shwôm, ńkyí nkyi ké [eku nyí Béta.]