Okwan 1 - Bokyi Bible

¹ Okwan [mú Otu Sólómon] mú mu o-nyîn n o-shwôm ekwan kángkáng.

Mbwôp Kashú-Okwan

² Mú onyinyi o/fu, fé mě byibî-ocím eyên ké ocím ejí. Kyijé eyên nkyi kanong kyi-shwôm bato.

³ Wo amu ne bunyîn-dyityém ké byiko. Dyikô ńdyí dyizîn eyên ndyi dyi-chi i mě n-zîim kánkyí. Onyinyi o*fí mú wo aa*jê ǎ*.

⁴ Yip mě n-dim ne wo, ne be byi/chi byi-chêe. Firi otu ejí, a-kúng mě n-nung ké nfût eyên. Byi/chi byi-kyú ké bunyîn-dyityém, byi-nung ké kyijé echi ńkyí kyidanyîn kyi-shwôm bato. Éné nké amu a-jê ng kángkáng banyinyi.

⁵ Banyinyi-Jerúsélem, me mu n-jîi ng, [nké] me mu n-nwa ng bunong wǎ bampyep ḿbé banet ḿbé Kéda ḿbé ba/bi ké byídí, ne wǎ ékpígí nyí kyise ńkyí Otu Sólómon.

⁶ *Da mě ekúng dángé ké enyam-byiko ejí* ké nǎ, esû ee/shí mě*. Bwǎn-bané ejí ḿbé banyinchéng ba/mû ba-sa ng kafâ ne me ne ba/chi mě n-chi bǎmkpóngé ké kyifát. Me m/mû n*fí ne nkéré mú ndatún byiko ejí*.

⁷ Onet-kyijé ejí, sét mě, wo a-jâ kyicê kyirá ne ebû eyên e-da-ryí baryî. Nyǐ e-jáng ng nyá ké nkéré esû ee/kán. [Ebóng ńkyí me n/chi n-kyé ǒ ké burwám-ebû nyí bambâm ebû bakíri.] Mú onyinchéng o-faa o/fu,

⁸ onyinyi mú o/nwa bunong o-shwôm bábe-banyinyi, wo a*fí a-nyît ng kyikit dí*. Ca a-cen ne ebû ké kyikû a-kyé kyikit-baryî ńkyí ebû eyên edaryí fáráng ne bampyep ḿbé bambâm ebû.

⁹ Wo, ǎ onet-kyijé ejí, amu a-chi i banyinchéng byiko byi-dim kámbé wǎ buma-kabyî-orá budachi byiko byi-dim batyép-bubyî-orá ḿbú mbu bu-tut ng bamútu ḿbé otu mú Éjip.

¹⁰ Eji eyên nyí nyi ǒ reberebe ké kyitông eyên wǎ byibwáng nyi e-nwa ng kanong kanong.

¹¹ Ba/chi ba-chi ǒ kiǐré-gûl ba-fé to byibwáng-syílyíba ké nkyí. Mú onyinyi o/chîfaa o/fu,

¹² otu ejí o/mû sáre ké karíng emen, ne bakút-kyinung ejí ba/mû ba-châ kyinung.

¹³ Onet-kyijé ejí mú o/rí mě ké kakim mu ne kyinung-bakút ḿbé badakó mîi.

¹⁴ Onet-kyijé ejí mu wǎ ekong-byichí nyí enong nyí nyi ké byifát ḿbyí Ngédyi. Mú onyinchéng o-faa o/fu,

¹⁵ onet-kyijé ejí, wo amu a-nwa ng búsé kanong kanong. Achi eyên nyi a-san n ne kyijé kanong kanong. Mú onyinyi o-chîfaa o/fu,

¹⁶ onet-kyijé ejí, wo amu a-nwa ng kyisat kanong kanong ne amu a-chi i kyi-nyîn mě kanong kanong. Biǐbyâa byi/chi byi-kyú bě karíng.

¹⁷ Byichí ḿbyí badakó séda byi/chi byi-kyú bě mbwôm-kyise ne ḿbyí badakó sápurus byi-kyú bě efang-kyise.