Obadyâ 1 - Bokyi Bible

¹ Nyín byiraa ḿbyí Obadyâ o/sét wǎ mkpábé mú odasét byiraa-Osówo, ḿbyí Osówo Óburúkpâbí o/sét kyi-kim ne oshê mú Édom. Óburúkpâbí oo/twóm onet-kyitwóm o-ca ké kángkáng eshê, ne be to bii/jwo kyitwóm emen. O/fu, kpá n̂g byiko, byi-da-nwa byití ne Édom.

Óburúkpâbí o/chi o-kye Édom Busông

² Óburúkpâbí o/sét Édom o/fu, n/chi n-chi ǒ a-firi kyeekyee, kángkáng banet ba/chi ba-shú ǒ.

³ Byiko eyên etông bii/nîm ǒ. Dyityém-oshê eyên ndyi buká ḿbú budashwane, ḿbú badabwom ba-nwa byití. Oshê eyên mu nyáám kyíbóng-eku, ne ké bubwô ámbu, amu a-raa ng ké byiko eyên a/fu, yeě oda mě eman eshû kyísí.

⁴ Nang ké a/bi oshê eyên kyíbóng kyíbóng éné wǎ dyiju-kiinkwa, ńdyí ndyi wǎ ndyi kyikit kyibónge ne ékpére, me m-bú ng ǒ n-twóp kyísí.

⁵ Â banet-kajii ba/bê ne buchú, ba-kúng ng ńkyí mbe ba-ryuu ng nké nke. Â banet ba/bóng byirim-byichí, ba-mîng ng boǒnyín. Nké banet-bushwôn eyên baa/bên ǒ kángkáng, nang kaakit ka*da/waa*.

⁶ Banet-Édom ḿbé bwǎn-Éso, baa/wuri esang enen kángkáng.

⁷ Kángkáng banet-kyikwáré enen baa/nîm běn, ba-kpógê běn, ba-ró běn ké oshê enen. Bacín enen ḿbé ba/mû ba-ryí i byiryíng kyikit kyibónge baa/kuu kaǎtám ba-tî běn. Mbe ba-raa ng kyi-kim ne ben ba/fu, kángkáng byinyídíng ebe ḿbyí ba/mû ne mbyí byi/jé nyá.

⁸ Ké dyicí ńdyí n/chi n-kye běn busông, n/chi n-ju banet-byinyídíng enen, m-bên kángkáng byinyídíng enen.

⁹ Bannwa byití ḿbé Táman ba/chi ba-firi ne bushî, ne n/chi n-ju kángkáng basúja ḿbé Édom.

Dyishí ńdyí Óburúkpâbí o/chi o-kye Édom Busông

¹⁰ Ké nǎ, ben ba/jii bwǎn-bané enen ḿbé kyikû-banet ńkyí Jekôp kajii, ba-ju kámbé, n/chi n-ju běn n-fé běn éshwân nyí e/chi e-waa ne banyá.

¹¹ Ben ba/bwom ké bukô ké dyicí ándyi ńdyí banet-bushwôn ba/sé afyi nyí oshê ebe. Ben ba/mû ba/bên jangjang ne banet-bushwôn ámbe ḿbé ba/wuri esang nyí Jerúsélem ba-dim ne nyǐ ba-da-kyii barî.

¹² Ben ba/mû baa*ba/chi ba-jêe kyi-kim ne afaníkong nyí a/róng bwǎn-bané enen ké Júda*. Ben ba/mû baa*ba/chi ba-kyú ké bunyîn-dyityém ké dyicí ńdyí afaníkong a/róng kámbé*. Ben ba/mû baa*ba/chi ba-jwó kámbé ké bafip ebe*.

¹³ Ben ba/mû baa*ba/chi ba-nung ké oshê mú banet ejí* ba-jêe kyi-kim ne busông ebe* ba-koo esang ebe ké dyicí ńdyí afaníkong ebe*.

¹⁴ Ben ba/mû baa*ba/chi ba-bwom ké akam-bukwóp ba-kám banet ḿbé ba/mû mbe ba-chêe ng*. Ben ba/mû baa*ba/chi ba-bwa esim ne mbé ba-kye banet-bushwôn ebe ké dyicí ńdyí afaníkong ebe*.

Osówo o/chi o-pan Ejíí Mpan

¹⁵ Dyicí dii/fárâng ńdyí me Óburúkpâbí n/chi m-pan kángkáng eshê mpan. Édom, ńkyí wo aa/chi n/chi n-chi ǒ to. Wo a/chi a-koo ńkyí wo aa/kye.

¹⁶ Banet ejí baa/jwáp kiiruuruu-mmîk-busông ké kaku-ociring ejí. Nké kángkáng eshê nyí e/fárâng kámbé e/chi e-jwáp mmîk-busông ḿbú budaruu bu-shwôm. Mbé ba/chi ba-jwáp kámbú kángkáng ba-kpú.

Dyikpóge ńdyí Ézerel e/chi e-kpógê

¹⁷ Nké ké kaku ńké Záyon, kyicê-banet ba/chi ba-fem, ne kyikit ánkyi kyi/chi kyi-kyú kyikit-ociring. Banet ḿbé Jekôp ba/chi ba-chîkoo esí ebe nyí e/já kámbé.

¹⁸ Banet ḿbé Jekôp ne ḿbé Josêf ba/chi ba-kyú wǎ okwâ. Ba/chi ba-ju banet-Édom ḿbé bwǎn-Éso wǎ eringe nyí okwâ odashí biǐbyâa. Onet-kyikû-banet ńkyí Éso o*fí nang obónge mú o/chi o-fem*. Me Óburúkpâbí nké n/raa.

¹⁹ Banet ḿbé ba/fím kyicê-Júda ńkyí busyísen ba/chi ba-koo Édom, ḿbé ba/fím ké byikû-eku nyí kyicê ńkyí esû edaríbî ba/chi ba-koo Fyilíta. Banet ḿbé Ézerel ba/chi ba-koo esí nyí Éferem ne Samérya. Banet ḿbé Běnjámin ba/chi ba-koo Gyílet.

²⁰ Basúja ḿbé banet ḿbé kyicê-Ézerel ńdyí bushûyû, ḿbé ba/mû ba/kám kámbé ké byití ba-dim ne mbé, ba/chi ba-fyi ba-ba-koo Fonésha tete ba-ribi ké Záréfat, ké kyicê ńkyí bushûyû. Banet ḿbé ba/kám kámbé ké Jerúsélem ké byití ba-dim ne mbé, ḿbé mbe ké Sádyis, ba/chi ba-koo eshê nyí kyicê-Júda ńkyí busyísen.

²¹ Banet ḿbé Jerúsélem ámbe ba/chi ba-kpógê Édom e-firi ké bubwô ebe. Me Óburúkpâbí oyén o/chi o-kyú Otu ebe.