Nómba 8 - Bokyi Bible

Etyuryíkáng etwôom

¹ Óburúkpâbí o-raa ne Músis o/fu,

² sét Éron a/fu, ké nkéré nyǐ o-kú o-twôom m etyuryíkáng ké kyikwap emen, otî kányí eringe nyí kiinwángé kyidasan kyi-jâ ké kashú.

³ Éron o-chi eringe ba/fu, ochi, ne o/tî etyuryíkáng e-bírî kashú kyicê ńkyí kyikwap ńkyí badatwôom etyuryíkáng.

⁴ Ba/chi kyikwap ánkyi ké gûl mú ba/díp odíbíng kyi-fím kyíbóng kyi-tîm kyísí wǎ eringe nyí Óburúkpâbí o/tông Músis.

Ba/jware Banet-Lyíva, ba-soo Kámbé Byiko

⁵ Óburúkpâbí o-raa ne Músis o/fu,

⁶ fîm banet ḿbé Lyíva ké burwám-banet-Ézerel ḿbé áku a-tî kámbé cát, a-soo kámbé byiko,

⁷ ké dyizong-bukwóp ḿbún něen. Myî kámbé omu mú byiko esoo, a-sét kámbé ba-pwát eji ne eríp ké byiko byimúmú, ba-soo to byídí ebe. Mbé kâng ba/chi ba-firi kpárám.

⁸ Mbé ba/chi ba-kúng kâng kyisu-otyép-mpong ne eyáré-esang-byichí nyí filáwa mú badachi berêt, mú baa/chwáp kámú ne bakút-ólif, a-kúng to otyép-mpong okíri obónge mú kyifen-byibî efîm.

⁹ A-kó kâng kángkáng banet-Ézerel a-tî kyikit kyibónge, a-chi banet-Lyíva ba-bwom ké bushú-mpyep mú Óburúkpâbí odakyú.

¹⁰ Banet ḿbé Ézerel ba/chi ba-twôom abwô ebe ké ashí nyí banet-Lyíva,

¹¹ ne Éron kâng o/chi o-jware banet-Lyíva o-kye mě wǎ kiǐtí-eyáré nyí e/fím ne banet-Ézerel, eringe mbé ba/chi ba-chi bǎmkpóngé ḿbé ejí.

¹² Banet-Lyíva kâng ba/chi ba-twôom abwô ebe ké ashí nyí batyép-bampong ámbe bafee. Kúng obónge a-chi kyifen-byibî efîm, ne mú áku a-chi kyifen ńkyí badashí kyirim-enyam, eringe nyí ba/chi ba-chi kyifen ńkyí badasoo banet-Lyíva byiko.

¹³ Jware banet-Lyíva a-kye mě wǎ kiǐtí-eyáré, a-tî kámbé Éron ne bwǎn emen wǎ banet-ashí ebe.

¹⁴ Fîm banet-Lyíva ké burwám-banet-Ézerel ḿbé áku ké dyizong-bukwóp ḿbún a-tî kámbé cát, eringe nyí mbé badafiri ḿbé ejí.

¹⁵ Banet-Lyíva ba/chi ba-firi banet ḿbé ba/kwárê, ḿbé badachi bǎmkpóngé ké mpyep mú ndakyú, ké nkéré mú aa/jware kámbé a-soo kámbé byiko.

¹⁶ Me nn/koo kámbé ké dyishí ńdyí kángkáng bákpá-bwǎn-banyinchéng ḿbé banet-Ézerel, ne mbé baa/já mě me nké nke.

¹⁷ Ké nkéré mú me n/ju kángkáng bákpá-bwǎn ḿbé banet-Éjip, me n/cá ókpá-wǎn-onyinchéng ké kyikû-banet-Ézerel nang kyirá, ne mbwôp kashú-wǎn-kyitú nang orá mú banet-Ézerel byi-firi ḿbyí ejí.

¹⁸ Kántîk, me n-kú n-kúng ng banet-Lyíva m-mîng kángkáng bákpá-bwǎn ḿbé banet-Ézerel,

¹⁹ ne nn/kúng kámbé n-kye Éron ne bwǎn emen wǎ kiǐtí-eyáré nyí e/fím ne banet-Ézerel, n/fu, mbé bachi bǎmkpóngé ké mpyep mú ndakyú, ké bubwô ḿbú banet-Ézerel, ne eringe nyí mbé badaku banet-Ézerel ké afaníkong nyí a/mû a/chi a-róng kámbé â mbé ba/fárâng mpyep-ociring.

²⁰ Ké bubwô ámbu kâng, Músis ne Éron ne kángkáng banet-Ézerel ba/jware banet-Lyíva wǎ eringe nyí Óburúkpâbí o/kye Músis busa.

²¹ Banet-Lyíva ba/soo byiko ebe ne byídí ebe, ne Éron o/jware kámbé wǎ kiǐtí-eyáré o-kye Óburúkpâbí. Éron o/chi kámbé to kyifen ńkyí byiko esoo.

²² Banet-Ézerel ba/chi kángkáng byěm ḿbyí Óburúkpâbí o/kye Músis busa kyi-kim ne banet-Lyíva. Ne ké bubwô ámbu kâng, banet-Lyíva ba-kwárê wǎ banet ḿbé badachi bǎmkpóngé ké mpyep mú Óburúkpâbí odakyú, ne Éron ne bwǎn emen wǎ banet-ashí ebe.

²³ Óburúkpâbí o-raa ne Músis o/fu,

²⁴ onet-Lyíva nang orá, kyi-fím ké aje bujam ne atánge, ochi bǎmkpóngé emen ké mpyep mú ndakyú,

²⁵ o-byí ké bǎmkpóngé ámbe ké nkéré oo/kán o-byí bajam-aje bafee esim diǐkpú.

²⁶ Ké nkéré nyǐ oo/byí, nyǐ o-man n echwáp barî-banet-Lyíva emen ké bǎmkpóngé ebe ké mpyep mú ndakyú. Nké o*dachi o-chi bǎmkpóngé nang babónge ké kakim emen*. Něen nké wo a/chi a-kûkyii bǎmkpóngé ḿbé banet-Lyíva.