Nómba 7 - Bokyi Bible

Eyáré nyí Banet-Ashí ba/kye

¹ Ké dyicí ńdyí Músis o/man mpyep mú Óburúkpâbí odakyú ebi, nyǐ o/jware kámú ne kángkáng byipang emen ké bakút-ociring epwó, o-jware to kyikit-kyifen-Osówo echi ne byipang emen.

² Banet-ashí ḿbé Ézerel kâng, ḿbé ba/mû ba/chi bǎmkpóngé ḿbé ocím-banet epan,

³ ba/bê ne eyáré nyí ebe ba-ba-kye Óburúkpâbí, nyí e/mû bamútu nyâchât ḿbé bampong badatut ne bampong diǐkpú ne bafee. Banet-ashí ba/cibi ashí afee afee ka-kye mútu obónge, ne onet-dyishí nang orá o/kye mpong obónge. Ké nkéré mbé baa/kye kámbyí,

⁴ Óburúkpâbí o-sét Músis o/fu,

⁵ koo eyáré ányi a-tî ké bǎmkpóngé ḿbé ba/chi ba-chi ké mpyep mú Óburúkpâbí odakyú. Kúng kányí a-kye banet ḿbé Lyíva ké ocím-byěm mú odakwárê ne bǎmkpóngé ebe ḿbé mbé ba/chi ba-chi.

⁶ Ké bubwô ámbu kâng, Músis o/kye banet ḿbé Lyíva bamútu ámbe ne bampong ámbe,

⁷ Músis o-kye banet-Géshon bamútu bafee ne bampong banyii,

⁸ o-kye banet-Merári bamútu banyii ne bampong nyíryinyi. Mbé ba/chi kángkáng bǎmkpóngé ebe wǎ eringe nyí Étama mú wǎn-Éron o/sét kámbé.

⁹ Nké Músis o*da/kye banet-Kóhat mútu nang obónge* nang mpong nang obónge* ké nǎ, byěm-ociring ḿbyí mbé badatún, ba-tû ng kámbyí ké byikem, *chí ké mútu*.

¹⁰ Banet-ashí ámbe ba/bê to ne eyáré nyí ba/jware kyikit-kyifen-Osówo echi ba-pwó kánkyí bakút-ociring. Ké nkéré mbé baa/kpá byiko ḿbyí mbé badabê ne eyáré ebe ké kyikit-kyifen-Osówo echi,

¹¹ Óburúkpâbí o-raa ne Músis o/fu, sét kámbé a/fu, kángkáng dyicí, ké ací diǐkpú ne afee, onet-dyishí obónge okûkye eyáré nyí emen nyí kyikit-kyifen-Osówo ejware.

^12-83 Mbé ba/kye eyáré ebe ké otáng něen. Ké mbwôp kashú-dyicí, Náshwon mú wǎn-Amínádap, mú onet-dyishí mú kyikû-banet ńkyí Júda nké o/kye eyáré. Ké nnyinyěng dyicí, Natánel mú wǎn-Zúwa, mú onet-dyishí-kyikû-banet ńkyí Ézaka nké o/kye eyáré. Ké ací achât, Élyap mú wǎn-Hélon, mú onet-dyishí-kyikû-banet ńkyí Zébélon nké o/kye eyáré. Ké ací anyii, Elyízu mú wǎn-Shédu, mú onet-dyishí-kyibû-banet ńkyí Rúben nké o/kye eyáré. Ké ací atánge, Shelúmyel mú wǎn-Zúryishadyâ, mú onet-dyishí-kyikû-banet Syímyon nké o/kye eyáré. Ké ací nyâchât, Elyǎsap mú wǎn-Dúwel, mú onet-dyishí-kyikû-banet ńkyí Gât nké o/kye eyáré. Ké ací káchâtkányi, Elyíshama mú wǎn-Amyíhut, mú onet-dyishí-kyikû-banet ńkyí Éferem nké o/kye eyáré. Ké ací nyíryinyi, Gamályel mú wǎn-Pédazu, mú onet-dyishí-kyikû-banet ńkyí Manáse nké o/kye eyáré. Ké ací kátángekányi, Abyídan mú wǎn-Gyídyonyi, mú onet-dyishí-kyikû-banet ńkyí Běnjámin nké o/kye eyáré. Ké ací diǐkpú, Ahéze mú wǎn-Amyíshadyâ, mú onet-dyishí-kyikû-banet ńkyí Dǎn nké o/kye eyáré. Ké ací diǐkpú ne din, Págyel mú wǎn-Ókaran, mú onet-dyishí-kyikû-banet ńkyí Ásha nké o/kye eyáré. Ké ací diǐkpú ne afee, Ahíra mú wǎn-Énan, mú onet-dyishí-kyikû-banet ńkyí Nafatályi nké o/kye eyáré. Eyáré nyí nang yeě o/bê ne nyǐ e/mû eringe ebónge. Nang yeě o/bê ne egbimgbang-syílyíba ebónge nyí e/mû kyílogaram obónge ne kyicê ké burô, ne dyicáng-syílyíba dyibónge ńdyí dyi/mû égot-bagarâm enyii ké burô. Ba/kan burô ebe eringe nyí badakan byěm ké mpyep mú Óburúkpâbí. Ba/fé filáwa mú badachi berêt, mú ba/chwáp bakút ké mǔ, mú badakúng ba-kye wǎ eyáré-esang-byichí. Ba/bê to ne kaǎcáng-gûl kabónge ńké ka/mû bajam-bagarâm batánge esim diǐkpú ké burô. Ba/fé burwan ké kafâ pwat. Ba-bâ ne kyisu-otyép-mpong kyibónge ne otyítǎm obónge ne wǎn-etám-ebû obónge mú oo/rí dyije, ḿbyí kyifen ńkyí badashí kyirim-enyam. Ba-bâ ne ebúbǔu nyí kyifen-byibî efîm. Ba-bâ ne batyép-bampong bafee ne etyítǎm etánge ne ebúbǔu etánge ne bwǎn-etám-ebû batánge ḿbé baa/rí dyije, ḿbyí badachi kyifen-okwáre ne Óburúkpâbí.

^84-88 Ocím-eyáré omúmú mú banet-ashí ámbe diǐkpú ne afee ba/bê ne nyǐ ba-kye Óburúkpâbí ké kyikit-kyifen-Osówo echi ejware o/mû egbimgbang-syílyíba diǐkpú ne efee ne acáng-syílyíba diǐkpú ne afee. Burô ḿbú acáng ányi amúmú bu/mû bakyílogaram bujam esim káchâtkányi ne kyicê. Boǒcáng-gûl bu/mû diǐkpú ne bufee, ne bumúmú bu/mû kyílogaram obónge ne kyicê ké burô, ḿbú ba/fé burwan pwat. Batyép-bampong ba/mû diǐkpú ne bafee ne etyítǎm diǐkpú ne efee ne bwǎn-etám-ebû diǐkpú ne bafee ḿbé baa/rí dyije, cibicibi ne eyáré-esang-byichí nyí e/mû ké burwám-eyáré ányi nyí badakúng ba-chi kyifen ńkyí badashí kyirim-enyam. Ebúbǔu nyí kyifen-byibî efîm e/mû diǐkpú ne efee. Batyép-bampong ba/mû bujam ne banyii ne bajam-etyítǎm bachât ne bajam-ebúbǔu bachât ne bajam-bwǎn-etám-ebû bachât ḿbé baa/rí dyije, ḿbyí kyifen-okwáre ne Óburúkpâbí.

⁸⁹ Ké nkéré mú Músis o/nung ké mpyep mú Óburúkpâbí odakyú o/fu, nyǐ o-da ng epem ne Óburúkpâbí, Óburúkpâbí o/kyú kyíbóng-kiinkíbí-mkpukpu-byěm-Osówo, ké otyém ne otyém-biǐnyám ámbyi byifee, mu o-raa ng ne nyǐ.