Nómba 6 - Bokyi Bible

Byije ḿbyí byi/kim ne Banet ḿbé ba/kúng Byiko Ebe ba-kye Óburúkpâbí

¹ Óburúkpâbí o/sét Músis o/fu,

² osét banet-Ézerel o/fu, nang onyinchéng nang onyinyi mú o/ryí Osówo ocím mú shwaneshwane o/fu, nyǐ o-kúng ng byiko emen o-kye Óburúkpâbí o-firi onet mú odabángê Názárit,

³ o-man o-mîng bato ejwáp ḿbé badabwóm. O*dachi o-jwáp dyizong-chwǒm nang dyibónge* ńdyí ba/chi ké byirim-byichí ḿbyí badakó gerêp* o-ryí nang kyirim emen* nang ńkyí kyikpó nang ńkyí jwómjwóm*.

⁴ Ké kyikim-nkéré kyimúmú ńkyí o/tôong ké ocím emen eryí, nyǐ oo*man o-ryí chwǒm nang kyibónge ńkyí kyi/fím ké byichí ámbyi* nang esang emen* nang biikwobe-byirim emen*.

⁵ Â nyǐ o/tôong ké ocím mú o/ryí Osówo o/fu, nyǐ o/kúng byiko emen o-kye ǎ, nyǐ oo*man o-két eji emen* o-pwát nang kyiti*. Ocím mú nyǐ o/ryí Osówo oo*nwa ebên* ké nkéré omúmú mú nyǐ oo/kúng byiko emen o-kye Óburúkpâbí* ne o-man o-mîng eji emen ne kyiti emen byi-kán n byi-câ.

^6-7 Eji emen, ányi ekap nyí edatông e/fu, nyǐ oo/kúng byiko emen o-kye Osówo, ne ké bubwô ámbu, o*dachi o-bên byiko emen ké kyikwóm-okúsí efárâng* nang ńkyí bonchí emen* nang ńkyí boné* nang ńkyí wǎn-boné*.

⁸ Ké nkéré omúmú mú nyǐ oo/ryí ocím ámu, nyǐ oo/já Óburúkpâbí.

⁹ Â eji emen nyí e/já Óburúkpâbí e/bên, ké nǎ, nyǐ o/bwom fáráng ne onet mú o/waa ányi ké abe o-myii o-kpú, nyǐ o-man o-mîng tete kyi-byí ací káchâtkányi ne o-pwát dyishí ne kyiti emen, ne ké bubwô ámbu, nyǐ o/chi o-chîfiri onet mú baa*ciring ǎ to*.

¹⁰ Ké ací nyíryinyi, nyǐ o-man o-bâ ne ámalê afee nang bootǒmtǒm bufee o-kye nchi kyifen-Osówo ké ocím-dyifyi mú mpyep mú Óburúkpâbí odakyú.

¹¹ Nchi kyifen-Osówo ámu o/chi o-kúng abónge o-chi kyifen-byibî efîm, ne nyí abónge o-chi kyifen ńkyí badashí kyirim-enyam kyimúmú, eringe nyí bada ǎ echi kyifen ńkyí byiko esoo ba-kye ǎ ké bubwô ḿbú nyǐ o/fárâng kyikwóm-okúsí. Ké dyicí ándyi dyibónge, onet ámu o/chi o-chîkúng eji emen o-kye Óburúkpâbí,

¹² o-chîkúng byiko emen o-kye Óburúkpâbí o-chî ǎ ejá ké kyikim-nkéré ńkyí kyifyîfî. Kyikim-nkéré ńkyí o/mû o/já Óburúkpâbí kii/tánê, ké nǎ, eji emen nyí nyǐ o/mû o/kúng o-kye Osówo e/mû ee/bên. Nyǐ o/chi o-bâ ne wǎn-etám-ebû mú oo/rí dyije o-chi kyifen ńkyí dyifwá eré.

¹³ Ké nkéré mú nkéré mú nyǐ o/ryí Osówo ocím oo/man, nyǐ o/chi o-chi byifen. Nyǐ o/chi o-ca ké ocím-dyifyi mú mpyep mú Óburúkpâbí odakyú,

¹⁴ o-da-kye Óburúkpâbí byitú byichât ḿbyí byi*fí ne kyinêm* otyép-wǎn-etám-ebû obónge mú oo/rí dyije, mú badakúng ba-chi kyifen ńkyí badashí kyirim-enyam, ne buma-wǎn-etám-ebû bubónge ḿbú boo/rí dyije, ḿbú badakúng ba-chi kyifen-byibî efîm, ne otyítǎm obónge mú badakúng ba-chi kyifen ńkyí okwáre ne Óburúkpâbí.

¹⁵ Nyǐ o/chi o-yárê to kaakye-berêt mú ba*da/fé bukye ké mǔ o-mut* ne byirim-berêt ḿbyí ba/fé bakút-ólif ne bakye-okákárá ḿbé ba/sabe bakút-ólif ké mbé, o-kye to eyáré nyí esang-byichí ne bato.

¹⁶ Nchi kyifen-Osówo o/chi o-kúng kámbyí kángkáng o-kye Óburúkpâbí ne o-chi kyifen-byibî efîm ńkyí badashí kyirim-enyam.

¹⁷ O/chi o-kúng otyítǎm ámu o-chi kyifen o-kye Óburúkpâbí wǎ kyifen-okwáre ne Óburúkpâbí, o-kye to kaakye-berêt ne eyáré nyí esang-byichí ne bato.

¹⁸ Onet ámu mú o/kúng byiko emen o-kye Osówo o/chi o-pwát eji emen ké ocím-dyifyi-mpyep mú Óburúkpâbí odakyú, o-kúng kányí o-fé ké okwâ mú mbe ba-shí i kyifen-okwáre ne Óburúkpâbí.

¹⁹ Ké nkéré mú baa/rám bubwô-otyítǎm ámu kâng, nchi kyifen-Osówo o/chi o-kúng kámbú cibicibi ne kyirim-berêt kyibónge ne bakye-okákárá o-fé ké abwô nyí onet mú o/kúng byiko emen o-kye Osówo.

²⁰ Ké nnyinyěng, nchi kyifen-Osówo ámu o/chi o-kúng kámbyí o-kye Óburúkpâbí wǎ eyáré nyí dyityém. Mbyí byi-chi i eyáré-ociring nyí e/já nchi kyifen-Osówo, cibicibi ne kakim ne kyiká-otyítǎm ḿbyí byi/já nchi kyifen-Osówo, wǎ eringe nyí kyije kyi/sét. Onet mú o/kúng byiko emen o-kye Osówo o-man n ekpet bato ejwáp ké nkéré ńkyín kii/shwôm.

²¹ Nyín byije ḿbyí byi/kim ne onet mú o/kúng byiko emen o-kye Osówo. Nké â onet ámu o/ryí ocím-eyáré ekye nyí e/shwôm nyí ocím emen mú o/ryí Osówo o/fu, okye, nyǐ o-man o-kye kerededet ocím-eyáré mú nyǐ o/ryí ocím o/fu, nyǐ o-kyâ.

Njware mú Nchi Kyifen-Osówo

²² Óburúkpâbí o/kye Músis busa o/fu,

²³ osét Éron ne bwǎn emen o/fu, bakúng ejá ńnyín ne ba-jware banet ḿbé Ézerel, ba/fu,

²⁴ kyi/bát Óburúkpâbí ojware běn o-tún běn kanong.

²⁵ Kyi/bát Óburúkpâbí ocángê dyityém ne ben o-tông běn kanong ńké emen.

²⁶ Kyi/bát Óburúkpâbí otún běn ne ochwâp o-kye běn bunyîn-dyityém.

²⁷ Ne Óburúkpâbí o-raa o/fu, â mbé ba/kúng dyizîn ejí ba-jware banet ḿbé Ézerel, me to n/chi n-jware kámbé.