Nómba 5 - Bokyi Bible

Banet ḿbé badaciring Kámbé

¹ Óburúkpâbí o-raa ne Músis o/fu,

² kye banet-Ézerel busa ba-ró nang yeě mú mu ne kyibî-orwôm, nang mú chwǒm wǎ baróng mbe ba-byí i ǎ ké byiko, nang mú oo/bên byiko emen, ké nǎ, o/ta kyikwóm-okúsí, o-byí ké kafâ-oshê.

³ Ró kángkáng banet ḿbén ḿbé badaciring kámbé ba-byí, eringe nyí mbé baa*bên oshê* mú me mu n-kyú u ké burwám-banet ejí*.

⁴ Banet-Ézerel ba/chi ńkyí Óburúkpâbí o/sét, ne ba/ró banet ámbe kángkáng ba-byí ké kafâ-oshê.

Dyifwá eré ké Byibî-Byěm ḿbyí ba/chi

⁵ Óburúkpâbí o/sét Músis

⁶ o/fu, osét banet-Ézerel o/fu, â onet nang orá mú o*fí o-fâ dyityém emen ne Óburúkpâbí* o/chi onet kyibî-chwǒm,

⁷ o-man o-sét kyibî emen ńkyí o/chi, o-ré dyifwá kerededet, o-chîsû onet ámu mú nyǐ o/chi ǎ kyibî kyikit kyibónge ké byikit byitánge ḿbyí dyifwá ándyi.

⁸ Nké â onet mú nyǐ o/chi ǎ kyibî oo/kpú, ne o*fí ne wǎn-boné mú bada ǎ eré dyifwá ándyi* oré kándyí o-kye Óburúkpâbí dyi-firi ńdyí nchi kyifen-Osówo. Ké dyifwá ńdyín eré, o/chi o-cibi otyítǎm mú badakúng ba-chi kyifen ńkyí nkyi kyi-fîm m kyibî ńkyí onet mú o/chi kyibî ánkyi.

⁹ Eyáré to nyí kiǐtí nang erá nyí banet-Ézerel mbe ba-yárê ng Óburúkpâbí e/já nchi kyifen-Osówo mú mbé mbe ba-kyâ ǎ kányí.

¹⁰ Nchi kyifen-Osówo nang orá okúng eyáré nyí ba/kye ǎ e-firi nyí emen.

Byiraa byi-kim ne Batyép ḿbé mbe ne Kyibî-Okabe kyi-kim ne Banyi Ebe

¹¹ Óburúkpâbí o/sét Músis o/fu,

^12-14 osét banet-Ézerel o/fu, kyi-man n echi ńkyí onyinchéng odafiri ne kyibî-okabe o/fu, onyi emen o*fí o-fâ dyityém ne nyǐ*. O/fu, onyi emen oo/bên byiko emen, ké nǎ, o/rí ne onyinchéng okíri. Nké otyép emen mu o-kabe ng o/fu, kakíri kyi*fí ntûntû* ké nǎ, kakíri onyi emen oo/tî kánkyí ké kadip. Ntûesé o/mû o*fí* ne onet o*da ǎ ekám ké nkéré mu o-chi i kánkyí*. Kakíri kyi-man n echi otyép o-kyú ne kyibî-okabe kyi-kim ne onyi emen, nang ké onyi emen o/fé dyityém ne nyǐ.

¹⁵ Nang ké bukwóp burá, onyinchéng ámu oyip onyi emen ba-kâm nchi kyifen-Osówo. O/chi o-kúng eyáré-kyílogaram-filáwa-bályi obónge nyí badachi berêt, nké o*dachi o-pwó bakút-ólif ké mǔ* o-fé nang burwan ké mǔ* ké nǎ, eyáré ányi e/fím ne otyép mú mu ne kyibî-okabe kyi-kim ne onyi emen, nyí mu o-ryuu ng o/fu, ntûntû obyí wááng.

¹⁶ Nchi kyifen-Osówo o/chi o-kúng mú onyinyi ámu o-chi ǎ o-bwom ké bushú-kyikit-kyifen echi ńkyí badashí enyam.

¹⁷ Nchi kyifen-Osówo ámu o/chi o-fé omu-ociring ké mkpin, o-kpere ecing nyí nyi ké dyibe-esí-mpyep mú Óburúkpâbí odakyú o-fé kányí ké omu ámu eringe odachi kámú o-kûruu.

¹⁸ O/chi o-firi kâng eji nyí onyinyi ámu, ne o-kúng eyáré-filáwa-bályi o-fé mú onyinyi ámu ké abwô. Nchi kyifen-Osówo ámu o/chi o-kám mkpin mú mu ne omu ámu mú ruuruu, mú odacen ne kyishû.

¹⁹ Nchi kyifen-Osówo ámu kâng o/chi o-chi onyinyi ámu o-bángê ne ejá-ocím eryí ne Osówo nyí nchi kyifen-Osówo odafu, â wo a*da/chi kyinam* kyishû ńkyí omu mún odabê ne nkyí kii*chi ǒ chwǒm*.

²⁰ Nké â wo a/chi kyinam,

²¹ kyi/bát Óburúkpâbí ochi dyizîn eyên dyi-firi chwǒm-kyishû ké burwám-banet eyên. Kyi/bát ochi akwop eyên a-sît, dyifít eyên dyi-mut.

²² Kyi/bát omu mún onung ǒ ké dyifít o-chi kándyí dyi-mut, o-chi to akwop eyên a-sît. Onyinyi ámu o/chi o-faa o/fu, me m/bángê, kyi/bát Óburúkpâbí ochi éné.

²³ Nchi kyifen-Osówo ámu o/chi o-sáng kâng kyishû ánkyi kyísí ne o-kúng ńkyí o/sáng éné o-fé ké mkpin-omu ámu mú ruuruu.

²⁴ Ne o-kûchi mú onyinyi o-jwáp omu ámu mú o/chi o-chi ǎ o-jwo kyibî-bubân,

²⁵ nchi kyifen-Osówo o/chi o-koo eyáré-filáwa-bályi ányi nyí mú onyinyi o/níbî ké abwô, o-kye Óburúkpâbí kányí wǎ eyáré-dyityém, ne o-bâ ne eyáré ányi ké kyikit-kyifen-Osówo echi.

²⁶ Nchi kyifen-Osówo ámu kâng o/chi o-kpere dyikwâ-eyáré ányi o-shí kányí ké kyikit-kyifen-Osówo echi, eringe nyí kyidatông kyi/fu, oo/kúng eyáré ányi kángkáng o-kye Óburúkpâbí. Ké nkuli kyikû, nyǐ o/chi o-chi mú onyinyi o-jwáp omu ámu.

²⁷ Â mú onyinyi ámu o/chi kyinam, omu ámu o/chi o-chi ǎ o-jwo bubân kanong kanong, ne dyifít emen dyi/chi dyi-mut, akwop emen a-sît. Dyizîn emen dyi/chi dyi-firi kyishû ké burwám-banet emen.

²⁸ Nké â nyǐ o*da/chi chwǒm* chwǒm kii*chi ǎ* ne o/chi o-man n efwon bwǎn.

^29-30 Nyín kyije kyi-kim ne byiraa ḿbyí ké nkéré orêm o-kú o-chi i onyinchéng, ne o-firi ne kyibî-okabe o/fu, onyi emen oo/chi kyinam. Ba/chi ba-chi mú onyinyi o-bwom ké bushú-kyikit-kyifen-Osówo echi, ne nchi kyifen-Osówo o/chi o-chi byěm ḿbyín kángkáng.

³¹ Otyép emen o*fí ne dyifwá ńdyí odaré* nké â mú onyinyi o/chi kyibî, o/chi o-ri busông ḿbú kyibî ánkyi.