Nómba 4 - Bokyi Bible

Bǎmkpóngé ḿbé Banet-Lyíva, ḿbé Kyikû-Banet ńkyí Kóhat

¹ Óburúkpâbí o/sét Músis o/fu,

² opan ocím-banet ḿbé Lyíva, ḿbé kyikû-banet ńkyí Kóhat ké byikim ké byikim ne ké byikû ké byikû,

³ o-sáng azîn nyí kángkáng banyinchéng kyi-fím ké ḿbé baa/byí aje bujam esim diǐkpú kyi-ribi ké ḿbé baa/byí bajam-aje bafee esim diǐkpú, ḿbé ba/kwárê ké bǎmkpóngé echi ké mpyep mú Óburúkpâbí odakyú.

⁴ Bǎmkpóngé ebe ba/kim ne bachíchí-byěm-ociring.

⁵ Óburúkpâbí o/sét Músis o/fu, ké nkéré mú nkéré oo/fyi mú badajaa oshê, Éron ne bwǎn emen ḿbé banyinchéng ba/chi ba-nung ké mpyep mú Óburúkpâbí odakyú, ba-faa ékpígí nyí nyi ké bushú-mkpukpu-byěm-Osówo ba-cít kányí ké mkpukpu ámu.

⁶ Ba/chi ba-cít kámú ekwop-enyam nyí enong enong, ba-paam kyídí ńkyí bulûbulu ba-tát ké mǔ, ne ba-fé echí nyí badakûyip kámú.

⁷ Ba/chi ba-paam kyídí ńkyí bulûbulu ba-tát ké ókpákpúrúk mú badatî berêt, mú ba/chi kyifen ba-kye Óburúkpâbí, ba-twôom kâng acáng nyí burwan ne nyí eyáré ekye ne etyu nyí badafé bato-eyáré ekye ké nkyí. Berêt o/chi o-kyú kángkáng nkéré ké ókpákpúrúk.

⁸ Ba/chi ba-paam kyídí ńkyí shétshét ba-cít byěm ḿbyín kángkáng, ba-cít kámú ekwop-enyam nyí enong enong, ne ba-fé kâng echí nyí badayip kámú.

⁹ Ba/chi ba-kúng kyídí ńkyí bulûbulu ba-cít kyikwap-etyuryíkáng etwôom ne etyuryíkáng emen ne chwǒm ńkyí badaníbî okwâ ne byiféng emen ne kángkáng ḿbyí mbe ba-fâ bakút-ólif.

¹⁰ Ba/chi ba-bwá kyikwap-etyuryíkáng etwôom ánkyi ne kángkáng byěm emen ké ekwop-enyam nyí enong enong ba-fé kánkyí ké echí nyí badayip kánkyí.

¹¹ Ké nnyinyěng, ba/chi ba-paam kyídí ńkyí bulûbulu ba-cít ókpákpúrúk-kyifen-Osówo echi mú ba/chi ké gûl, ba-fé kámú ké ekwop-enyam nyí enong enong, ne ba-fé kánkyí ké echí nyí badayip kánkyí.

¹² Ba/chi ba-kúng kángkáng byěm ḿbyí badakúng ne ba-chi byifen ké nfût-ociring ba-bwá kámbyí ké kyídí ńkyí bulûbulu, ne ba-cít kámbyí ké ekwop-enyam nyí enong enong, ba-twôom kámbyí ké echí nyí badayip kámbyí.

¹³ Ba/chi ba-wuri atông nyí ké kyikit-kyifen echi ńkyí enyam eshí ba-paam kyídí ńkyí shíshét ba-cít ké nkyí.

¹⁴ Batwôom ké nkyí kángkáng byěm ḿbyí badakúng ba-chi byifen, wǎ acáng nyí badayip okwâ ne egiryimgbáng-asháng ne basóburu ne acáng nyí aryên. Mbé ba-fé kâng kánkyí ké ekwop-enyam nyí enong enong, ne ba-fé echí nyí badayip kánkyí.

¹⁵ Ké nkéré mú nkéré oo/fyi mú badajaa oshê, banet-kyikû-banet ńkyí Kóhat ba/chi ba-yip byěm-ociring ámbyi ké nkéré mú Éron ne bwǎn emen baa/cít kámbyí ne kángkáng byěm emen. Banet ḿbé Kóhat ba*dachi ba-ta byěm-ociring ámbyi*. Mbé ba/chi ba-kpú â ba/ta kámbyí. Bǎmkpóngé ḿbé banet ḿbé Kóhat éné, nang nkéré orá nké ba/dim ne mpyep mú Óburúkpâbí odakyú.

¹⁶ Bǎmkpóngé ba-kim ne mpyep mú Óburúkpâbí odakyú omúmú, ne bakút ḿbé badafé ké etyuryíkáng, ne burwan ne eyáré nyí esang-byichí, ne bakút ḿbé badapwó onet ké dyishí ne kángkáng byěm byikíri ké mpyep mú Óburúkpâbí odakyú ḿbyí byi/já Óburúkpâbí, ba/já Elyǎza mú wǎn-Éron, mú nchi kyifen-Osówo.

¹⁷ Óburúkpâbí o-raa ne Músis ne Éron o/fu,

¹⁸ *da n̂g emîng banet ḿbé Kóhat

¹⁹ ba-fárâng ké bachíchí-byěm-ociring ḿbyín* ba-kpú*. Eringe ńkyín kii*ba/chi kyi-chi* Éron ne bwǎn emen ḿbé banyinchéng ba/chi ba-ca ké kafâ ba-da-kyii nang yeě nang yeě bǎmkpóngé ḿbé emen, ba-sét onet ámu chwǒm ńkyí nyǐ odayip.

²⁰ Nké banet ḿbé Kóhat ba/chi ba-kpú, â ba/nung ké mpyep mú Óburúkpâbí odakyú, [ba-ri ké banchi kyifen-Osówo mbe ba-nap ng byěm-ociring ḿbyí badadim.]

Bǎmkpóngé ḿbé Banet-Lyíva, ḿbé Kyikû-Banet ńkyí Géshon

²¹ Óburúkpâbí o-sét Músis o/fu,

²² opan ocím-banet ḿbé Lyíva, ḿbé kyikû-banet ńkyí Géshon ké byikim ké byikim ne ké byikû ké byikû,

²³ o-sáng azîn nyí kángkáng banyinchéng kyi-fím ké ḿbé baa/rí aje bujam esim diǐkpú, kyi-byí ké ḿbé baa/rí bajam-aje bafee esim diǐkpú, ḿbé ba/kwárê ké bǎmkpóngé echi ké mpyep mú Óburúkpâbí odakyú.

²⁴ Bǎmkpóngé ḿbé ba/já kámbé, ḿbé byěm ḿbyín něen eyip,

²⁵ mpyep mú Óburúkpâbí odakyú, ne byídí byifee ḿbyí badacít kámú, ne ekwop-enyam nyí badacít kámú, ne ékpígí nyí ké dyifyi-mpyep ámu,

²⁶ ne byídí ne erí ḿbyí oro mú o/wâng mpyep ámu ne kyikit-kyifen echi, ne ékpígí nyí ké ocím-dyifyi ńdyí oro, ne kángkáng byěm ḿbyí badakúng ne ba-cibi byěm ḿbyín kyikit kyibónge. Mbé ba/chi ba-chi kángkáng bǎmkpóngé ḿbé ba/kim ne byěm ḿbyín.

²⁷ Músis ne Éron ba-man ba-ri ba/fu, banet-Géshon mbe ba-chi i kángkáng bǎmkpóngé ebe, ba-tû kángkáng byěm ḿbyí Éron ne bwǎn emen ba/kye kámbé.

²⁸ Bǎmkpóngé ḿbé ba/já banet ḿbé Géshon éné. Mbé ba/chi ba-chi kámbé wǎ eringe nyí Étama mú wǎn-Éron, mú nchi kyifen-Osówo odasét kámbé.

Bǎmkpóngé ḿbé Banet-Lyíva, ḿbé ké Kyikû-Banet ńkyí Merári

²⁹ Óburúkpâbí o/sét Músis o/fu, opan ocím-banet ḿbé Lyíva, ḿbé ké kyikû-banet ńkyí Merári, ké byikim ké byikim ne ké byikû ké byikû,

³⁰ o-sáng azîn nyí kángkáng banyinchéng kyi-fím ké ḿbé baa/rí aje bujam esim diǐkpú kyi-byí ké ḿbé baa/rí bajam-aje bafee esim diǐkpú, ḿbé ba/kwárê ké bǎmkpóngé echi ké mpyep mú Óburúkpâbí odakyú.

³¹ Mbé nké badayip kángkáng byichí ne efang ne byikwap ḿbyí mpyep mú Óburúkpâbí odakyú,

³² ne byikwap ne byikû-byikwap ne byíkîm-biǐré ne erí ḿbyí oro, ne kángkáng byěm ḿbyí badakúng ne ba-cibi byěm ḿbyín kyikit kyibónge. Ba/chi ba-tî nang yeě bachíchí-byěm ḿbyí odakûtû.

³³ Bǎmkpóngé ḿbé ba/já banet ḿbé Merári, ḿbé mpyep mú Óburúkpâbí odakyú, ba/mû éné. Mbé ba/chi ba-chi kámbé wǎ eringe nyí Étama mú wǎn-Éron, mú nchi kyifen-Osówo odasét kámbé.

Ba/pan Ocím-Banet mú Banet-Lyíva

^34-48 Wǎ eringe nyí Óburúkpâbí o/kye busa, Músis ne Éron ne banet-ashí ḿbé Ézerel ba/pan ocím-banet ḿbé byikû-banet-Lyíva byichât, ḿbyí Kóhat ne Géshon ne Merári. Mbé ba/chi kánkyí ké byikim ké byikim ne ké byikû ké byikû, ba-sáng azîn nyí kángkáng banyinchéng kyi-fím ké ḿbé baa/rí aje bujam esim diǐkpú kyi-byí ké ḿbé baa/rí bajam-aje bafee esim diǐkpú, ḿbé ba/kwárê ké bǎmkpóngé echi ké mpyep mú Óburúkpâbí odakyú. Ocím-banet o/mû něen. Ké kyikû-banet ńkyí Kóhat, ocím-banet o/mû égot etánge etánge ké byikit byifee ne égot echât esim-bajam-banet káchâtkányi esim diǐkpú. Ké kyikû-banet ńkyí Géshon, ocím-banet o/mû égot etánge etánge ké byikit byifee, ne égot echât esim-banet bujam esim diǐkpú. Ké kyikû-banet ńkyí Merári, ocím-banet o/mû égot etánge etánge ké byikit byichât ne égot ebónge. Ocím-banet omúmú ké byikû-banet ámbyi byichât kángkáng o/mû égot etánge etánge ké byikit nyíryinyi ne égot efee esim-bajam-banet kátángekányi.

⁴⁹ Ba/sáng dyizîn ńdyí onyinchéng nang orá wǎ eringe nyí Óburúkpâbí o/kye Músis busa, ne ké busa ḿbé Óburúkpâbí o/kye Músis, ba/kye onyinchéng nang orá bǎmkpóngé ḿbé emen ḿbé odachi.