Nómba 34 - Bokyi Bible

Bati-Esí nyí Kínan

¹ Óburúkpâbí o/sét Músis

² byije ḿbyín o/fu, osét banet-Ézerel, o/fu, â ba/ribi ké esí-Kínan nyí me mu n-kyâ běn, bati-esí enen ba/chi ba-kyú něen.

³ Buti ḿbú kyicê ńkyí busyísen bu/chi bu-fím ké kyikim-dyikán ńkyí Zîn bu-cen ké buti ḿbú Édom. Mbú bu/chi bu-kpet ké kyicê ńkyí esû edabyí, ké dyishí-baya ńdyí busyísen, ḿbé badakó Bukyû.

⁴ Mbú kâng bu/chi bu-pín bu-jâ kyicê ńkyí busyísen, ḿbú kyikit ńkyí badayú kaku ké Ákárabim bu-ca kashú bu-shwôm Zîn tete bu-byí kyicê ńkyí busyísen, ké Kádyishi-Bánya. Ne mbú kâng bu/chi bu-pín ké otyém ne otyém-kyicê-bushûyû ne kyicê ńkyí esû edaríbî bu-jâ ḿbú Háza-Ráda, bu-shwôm bu-jâ Ázimon.

⁵ Ányi nké bu/chi bu-pín bu-jâ ké owo mú mu ké buti ḿbú Éjip, ne bu-da-nyere ké baya ḿbé Medeterényan.

⁶ Buti ḿbú kyicê ńkyí esû edaríbî bu/chi bu-kyú ké baya ḿbé Medeterényan.

⁷ Buti ḿbú kyicê ńkyí bushûyû bu/chi bu-cen bu-fím ké baya ḿbé Medeterényan bu-ribi ké kaku ńké Hôo,

⁸ ne bu-fím ányi bu-byí ké kyikit ńkyí badayú kaku ké Hámat. Bu/chi bu-ca kashú bu-ribi ké Zédat,

⁹ bu-shwôm bu-jâ Zíforon, bu-da-nyere ké Háza-Énan.

¹⁰ Buti ḿbú kyicê ńkyí esû edabyí bu/chi bu-cen bu-fím ké Háza-Énan bu-byí ké Shéfam.

¹¹ Bu/chi bu-jâ kâng kyicê-busyísen, ké Hábel, ké kyicê ńkyí esû edabyí, ńkyí Âan, ne bu-ca kashú ḿbú eku nyí ké bukô-baya ḿbé Gályílyi, ḿbú kyicê ńkyí esû edabyí.

¹² Bu-fím kâng ányi bu-jâ kyicê ńkyí busyísen, bu-cen ké kace ńké Jódan bu-byí ké baya ḿbé badakó Bukyû. Bati ḿbén nké ba/chi ba-kyú bati-esí enen banyii.

¹³ Músis kâng o-raa ne banet-Ézerel o/fu, nyín něen esí nyí ben ba/chi ba-koo ké ámám etwóp, nyí nyi esí nyí Óburúkpâbí o/kye byikû-banet kátángekányi ne kyicê.

¹⁴ Byikû-banet ḿbyí Rúben ne Gât ne kyicê-kyikû-banet ńkyí Manáse, ńkyí ké kyicê ńkyí esû edabyí baa/koo esí nyí ebe ba-kyii ké ocím-byikû-banet ebe,

¹⁵ ké esim-Jódan nyí nyi ké kyicê ńkyí esû edabyí, fáráng ne Jéríku.

Banet-Ashí ḿbé Bǎmkpóngé ḿbé Esí ányi ekyii ba/já Kámbé

¹⁶ Óburúkpâbí o-raa ne Músis o/fu,

¹⁷ Elyǎza ne Jóshwa ba/chi ba-kyii esí ányi ba-kye banet-Ézerel.

¹⁸ Kúng to onet-dyishí obónge ké kyikû ké kyikû ba-chwáp kámbé esí ekyii.

^19-28 Nyín něen banet ḿbé Óburúkpâbí o/cá. Ké kyikû-banet ńkyí Júda, onet-dyishí o/mû Kálep mú wǎn-Jéfúne, ké kyikû-banet ńkyí Syímyon, onet-dyishí o/mû Shelúmyel mú wǎn-Amyíhut, ké kyikû-banet ńkyí Běnjámin, onet-dyishí o/mû Elyídat mú wǎn-Kyíselon, ké kyikû-banet ńkyí Dǎn, onet-dyishí o/mû Búkyi mú wǎn-Jógilyi, ké kyikû-banet ńkyí Manáse, onet-dyishí o/mû Hányel mú wǎn-Éfit, ké kyikû-banet ńkyí Éferem, onet-dyishí o/mû Kémwel mú wǎn-Shífyítan, ké kyikû-banet ńkyí Zébélon, onet-dyishí o/mû Ézafan mú wǎn-Pának, ké kyikû-banet ńkyí Ézaka, onet-dyishí o/mû Pátyel mú wǎn-Ázan, ké kyikû-banet ńkyí Ásha, onet-dyishí o/mû Ahíhut mú wǎn-Shélomyi, ké kyikû-banet ńkyí Nafatályi, onet-dyishí o/mû Pédahel mú wǎn-Amyíhut.

²⁹ Banet ḿbén nké Óburúkpâbí o/kye kámbé bǎmkpóngé ḿbé badakyii esí ba-kye banet-Ézerel ké esí nyí Kínan.