Nómba 33 - Bokyi Bible

Bucen ḿbú Banet-Ézerel ba/cen kyi-fím ké Éjip kyi-byí Mówep

¹ Byiraa ḿbyín byi/sét azîn nyí byikit ḿbyí banet-Ézerel ba/bi eshê ké nkéré mú ba/dim ba-mîng Éjip, Músis ne Éron ba-tông kámbé kiǐfáng wǎ dyibóng-basúja.

² Ké busa ḿbú Óburúkpâbí, Músis o/sáng dyizîn-kyikit nang kyirá ńkyí mbé ba/bi oshê.

³ Banet-Ézerel ba/dim ba-mîng Éjip ké ací onyiryiká nyí mbwôp kashú-otukáku mú dyije, ké orî-dyicí ńdyí mbwôp kashú-dyijî-kyifen ńkyí Shwôm. Mbé ba/dim ké oshê mú Rámesis, ké busa ḿbú Óburúkpâbí, ké bushú ḿbú banet-Éjip kángkáng,

⁴ ké nkéré banet-Éjip ba/mû mbe ba-ryii ng bákpá-bwǎn ebe ḿbé banyinchéng, ḿbé Óburúkpâbí o/ju. Óburúkpâbí o/chi ńkyín eringe nyí odatông o/fu, nyǐ mu ne busa o-shwôm bakye ḿbé Éjip.

⁵ Banet ḿbé Ézerel ba-dim ké Rámesis ba-da-bi oshê ké Súkot.

⁶ Nnyinyěng-oshê mú mbé ba/bi o/mû ké Étam, ké dyishí-kyikim-dyikán.

⁷ Ba-fím ányi ba-pín ba-bwa esim ḿbú Pyî-Háhirot, ké kyicê ńkyí esû edabyí, ńkyí Bâl-Zéfon, ba-da-bi oshê fáráng ne Myígidol.

⁸ Ba-dim ké Pyî-Háhirot ba-shwôm ké kafâ-baya ḿbé badakó Rêt ba-ribi ké kyikim-dyikán ńkyí Shû. Ké nkéré baa/cen bucen ké ací achât, ba-bi oshê ké Mára.

⁹ Ba-jaa ányi ba-dim ḿbú Élim ba-da-bi oshê ányi, ké nǎ, ajwáng a/mû ányi diǐkpú ne afee ne bayêp to ba/mû ányi bajam bachât esim diǐkpú.

¹⁰ Ba-dim ba-mîng Élim ba-da-bi oshê fáráng ne dyiga ńdyí Suwêz.

¹¹ Nnyinyěng-kyikit ńkyí mbé ba/bi oshê kyi/mû ké kyikim-dyikán ńkyí Sîin.

¹² Mbé kâng ba-dim ba-da-bi oshê ké Dófaka,

¹³ ne ba-jaa ba-da-bi ké Álushi.

¹⁴ Nnyinyěng-kyikit kyi/mû ké Refyídim, kyikit ńkyí omu o/mû o*fí kámbé mú badajwáp*.

^15-37 Kyi-fím ké Refyídim kyi-byí ké kaku ńké Hôo, mbé ba/bi oshê ké byikit ḿbyín něen, ké kyikim-dyikán ńkyí kaku ńké Sána, ne ké Kyíbot-Hátaba, ńkyí badakó to Akun-Enyam eryuu, ne ké Házerot, ne ké Ryítama, ne ké Ryímon-Pérez, ne ké Lyíbana, ne ké Ryísa, ne ké Keheláta, ne ké kaku ńké Shéfe, ne ké Hárada, ne ké Mákelot, ne ké Táhat, ne ké Téra, ne ké Myítaka, ne ké Hashimóna, ne ké Móserot, ne ké Bené-Jákan, ne ké Hôo-Hagyídagat, ne ké Jotabáta, ne ké Abaróna, ne ké Ezón-Gébe, ne ké kyikim-dyikán ńkyí Zîn, ányi ké Kádyishi, ne ké kaku ńké Hôo, ké buti ḿbú esí nyí Édom.

^38-39 Ké nkéré Óburúkpâbí o/kye busa, Éron o/yú kyíbóng-kaku ńké Hôo. Nyǐ o/kpú ké kaku ánke ké mbwôp kashú-dyicí ńdyí etukáku etánge, ké bajam-aje bafee kyi-fím ké nkéré mú banet-Ézerel ba/dim ké Éjip, ányi oo/rí bajam-aje nyâchât esim-aje achât.

⁴⁰ Otu mú Árat, ké kyicê-Kínan ńkyí busyísen, o-jwo ba/fu, banet-Ézerel mbe ba-bâ.

^41-49 Kyi-fím ké kaku ńké Hôo kyi-byí ké ndege-esí mú Mówep, banet-Ézerel ba/bi eshê ké byikit ḿbyín, ké Zamóna, ne ké Púnon, ne ké Óbit, ne ké biǐbwô-byise ḿbyí Ábarim, ké kyikim-esí ńkyí Mówep, ne ké Dyíbon-Gât, ne ké Ámon-Dyibyilatyâm, ne ké kaku ńké Ábarim, fáráng ne kaku ńké Nébo, ne ké ndege-esí mú Mówep, ké esim-kace ńké Jódan nyí esû edabyí, fáráng ne Jéríku, ké otyém ne otyém mú Bét-Jéshímot ne owo mú Akákya.

Byiraa ḿbyí ba/sét Kámbé ne ba-nyáng Kace ńké Jódan

⁵⁰ Ányi ké ndege-esí mú Mówep, ké esim-kace ńké Jódan nyí esû edabyí, fáráng ne Jéríku nké Óburúkpâbí o/sét Músis

⁵¹ o/fu, osét banet-Ézerel o/fu, ké nkéré baa/nyáng kace ńké Jódan ba-ribi ké esí nyí Kínan,

⁵² ba-man ba-ró kángkáng banet ḿbé mbe ba-kyú u ké esí ányi. Bên n̂ kángkáng erím-bakye ebe nyí ba/chi ké aká ne ké biǐré, ne kángkáng byikit ebe ḿbyí mbe ba-kyâ kányí ofê.

⁵³ Koo n̂g esí ányi ba-kyú ké nyǐ, ké nǎ, me nké mu n-kyâ běn kányí.

⁵⁴ Kyii n̂g esí ányi ba-kye byikû-banet ḿbyí Ézerel ké ámám etwóp, ba-kyii esí nyí e/jê ba-kye byikim-banet ḿbyí byi/jê, ne esí nyí e*da/jê* ba-kye byikim-banet ḿbyí byi*da/jê*.

⁵⁵ Nké â ben ba*da/ró banet ḿbé mbe ba-kyú u ké esí ányi* banet ḿbé ba/waa ba-kû ng běn ekye afaníkong wǎ byiwong nké mbyi byi-tím m běn ké byiko, ne mbé ba/chi ba-nwa ne ben.

⁵⁶ Â ben ba*da/ró kámbé ba-byí* me n/chi n-ju běn wǎ eringe nyí m/mû n/nam n/fu, n-ju ng kámbé.