Nómba 32 - Bokyi Bible

Byikû-Banet ḿbyí byidakyú ké Kyicê-Jódan ńkyí Esû edabyí

¹ Byikû-banet ḿbyí Rúben ne Gât byi/mû ne byitú chwóó. Ké nkéré mbé ba/ri eringe nyí esí nyí Jáze ne Gyílet nyi e-nwa ng byitú ebe,

² mbé ba/dim ba-kâm Músis ne Elyǎza ne banet-ashí-oshê ḿbé áku ba-raa ba/fu,

^3-4 kyikim-esí ńkyín, ńkyí Óburúkpâbí o/chwáp banet-Ézerel ba-koo, ńkyí eshê nyí Átarot ne Dyíbon ne Jáze ne Nyímara ne Néshibon ne Élyâle ne Síbama ne Nébo ne Bwôn nyi e-nwa ng byitú eten, ne be byimu ne byitú chwóó.

⁵ Kamgbe, kye n̂g bě esí ńnyín e-firi nyí eten, ne *da n̂g bě echi byi-nyáng kace ńké Jódan* byi-da-kyú áku*.

⁶ Músis o-faa kámbé o/fu, ben bamu ba-ryuu ng ba/fu, ba-kyú u nyín? mú bánen-banet-Ézerel ba/chi ba-dim byití edanwa?

⁷ Ebóng ńkyí bamu ba-jwâa ng banet-Ézerel asa ba-mîng kace-Jódan enyáng ba-ribi ké esí nyí Óburúkpâbí o/kye kámbé.

⁸ Éné nké banchí enen ba/chi, ké nkéré n/twóm kámbé ké Kádyishi-Bánya n/fu, bada-kyé kyikû kyi-kim ne esí ányi.

⁹ Mbé ba/ce tete ba-byí ké owo mú Éshikol, ba-ri esí ányi. Nké ké nkéré mbé ba/fyi, mbé ba/fé banet-Ézerel bushî, ba-né enung ké esí nyí Óburúkpâbí o/kye kámbé.

¹⁰ Kafâ ka/sa Óburúkpâbí dyicí ándyi, ne o-ryí ocím o/fu,

¹¹ me n/ryí ocím n-sem dyizîn ejí n/fu, ké nǎ, mbé ba*da mě ekye ofê* onyinchéng nang obónge mú oo/kán kyi-fím ké aje bujam kyi-jâ kyíbóng, mú o/dim ké Éjip, o*fí nang obónge mú o/chi o-ribi ké esí nyí me n/ryí Ébarahâm ne Ázik ne Jekôp ocím*.

¹² Ńkyín kyi/ta nang yeě nang yeě, kyi*da/shwôm Kálep mú wǎn-Jéfúne* mú onet-Kénez* ne Jóshwa mú wǎn-Nûn*. Mbé ba/kye Óburúkpâbí ofê.

¹³ Óburúkpâbí o/mû o/sa kafâ ne banet-Ézerel, ne o/chi kámbé ba-yêe ké kyikim-dyikán ké bajam-aje bafee tete otáng-banet ḿbé ba/chi kyibî ké bushú emen ba-kpú.

¹⁴ Ne kántîk, ben baa/kúng kyikit ńkyí banchí enen, ben bwǎn-bafî ḿbé banchi byibî, ḿbé baa/kpá byiko ḿbyí badachi kafâ esa ńké Óburúkpâbí ka-chîróng banet-Ézerel ké byiko.

¹⁵ Â ben banet ḿbé Rúben ne Gât ba/né ece ne nyǐ ké kyikû kántîk, nyǐ o-chî ng emîng banet ḿbén kángkáng ké kyikim-dyikán, ne ben nké ba/chi ba-cen kámbé ne bukyû.

¹⁶ Mbé ba-fárâng Músis, ba-raa ba/fu, mîng bě kpá byi-kúng aká byi-bi bankám nyín byi-fé ebû eten, ne eshê to nyí shwaneshwane byi-fé banet eten.

¹⁷ Ne be kâng byi/chi byi-kpá byiko ḿbyí byidadim ne báten-banet-Ézerel byití enwa, byi-bwóp kámbé kashú ké bunwa ekye tete byi-chwáp kámbé ba-kyú ké esí nyí e/chi e-firi nyí ebe. Banet eten kâng ba/chi ba-kyú nyín ké eshê nyí shwaneshwane eringe banet ḿbé esí ńnyín baa*man echi kámbé chwǒm*.

¹⁸ Be bii*ba/chi byi-bwa dyijê* tete kángkáng banet-Ézerel ḿbé áku ba-koo esí nyí ba/kyii ba-kye kámbé.

¹⁹ Be bii*ba/chi byi-cibi ne mbé byi-koo esí* ké esim-Jódan nyí áku* ké nǎ, be bii/koo kyicê ńkyí eten ké kyicê-Jódan ńkyí esû edabyí.

²⁰ Músis o-faa o/fu, â ńkyí bamu ba-raa ng nkyi běn ké kafâ, kpá n̂g byiko nyín kâng ké bushú-Óburúkpâbí ḿbyí badadim byití.

²¹ Kángkáng bannwa byití enen ba/chi ba-nyáng kace-Jódan, ne ké busa ḿbú Óburúkpâbí, ba-kye banet-bushwôn eten bunwa tete Óburúkpâbí o-kpógê kámbé,

²² o-koo esí ebe. Ké nkéré ńkyí ányi kii/shwôm, ben ba-man n ebwa esim, ké nǎ, ben baa/chi ńkyí ben ba/ryí Óburúkpâbí ocím ne bánen-banet-Ézerel. Óburúkpâbí o/chi o-bángê kâng o/fu, esí nyí kyicê-Jódan ńkyí esû edabyí kyi/já běn ben.

²³ Nké â ben ba*da/tî ocím mú ben ba/ryí* me n-kuri ng běn ekó n/fu, bamu ba-chi i kyibî ké bushú ḿbú Óburúkpâbí. *Da n̂g echi ba-nîm byiko enen*. Óburúkpâbí o-kyâ běn busông ké kyibî enen.

²⁴ Ké bubwô ámbu, bi n̂g eshê enen ba-tî banet enen, ba-bi to bankám ba-tî ebû enen. Nké chi n̂g ńkyí ben ba/ryí ocím.

²⁵ Banet ḿbé Gât ne Rúben ba-raa ba/fu, bonchí, be byi-chi i eringe nyí wo a/sét.

²⁶ Banyi eten ne bwǎn eten ne bampong eten ne ebû eten byi/chi byi-waa nyín ké eshê nyí Gyílet.

²⁷ Nké be kángkáng bii/kpá byiko ḿbyí byití ké busa ḿbú Óburúkpâbí. Be byi-nyáng ng Jódan byi-da-nwa byití wǎ eringe nyí wo a/sét.

²⁸ Músis kâng o-kye Elyǎza ne Jóshwa ne banet-ashí ḿbé áku busa o/fu,

²⁹ â banet ḿbé Gât ne Rúben ba/nyáng kace-Jódan ba-kpá byiko-byití ké busa ḿbú Óburúkpâbí, ne â mbé ba/chwáp běn ba-kpógê, kye n̂g kámbé kâng esí nyí Gyílet e-firi myí ebe.

³⁰ Nké â mbé ba*da/nyáng kace-Jódan* ba-dim byití ne ben* kyii n̂g esí nyí Kínan ba-kye barî cibicibi ne mbé.

³¹ Banet ḿbé Gât ne Rúben ba-faa ba/fu, bonchí, be byi-chi i wǎ eringe nyí Óburúkpâbí o/kye busa.

³² Ké busa ḿbú emen, be byi/chi byi-nyáng kace-Jódan byi-nung ké esí nyí Kínan byi-dim byití eringe nyí esí nyí kyicê-Jódan ńkyí esû edabyí edawaa nyí eten.

³³ Músis kâng o-kyii kángkáng kyikim-esí ńkyí Otu Síhon mú banet-Ámórit ne ńkyí Otu Ôok mú banet-Báshan o-kye byikû-banet ḿbyí Gât ne Rúben ne kyicê-kyikû-banet ńkyí Manáse.

³⁴ Kyikû-banet ńkyí Gât ba/bwât eshê nyí shwanshwan, nyí Dyíbon ne Átarot ne Áro ne

³⁵ Átorot-Shófan ne Jáze ne Jogbéha

³⁶ ne Bét-Nyímara ne Bét-Háran ba-bi.

³⁷ Kyikû-banet ńkyí Rúben ba/bwât Héshibon ne Élyâle ne Kyiryǎtyam

³⁸ ne Nébo ne Bâl-Myôn, mú ba/yángê kámú dyizîn, ne Síbama ba-bi. Mbé ba/kye eshê nyí mbé ba/bwât ba-bi azîn nyí afyîfî.

³⁹ Kyikim-banet ńkyí Mákyi mú wǎn-Manáse ba-kye esí nyí Gyílet bunwa ba-koo kányí. Ba-ró banet ḿbé Ámórit ḿbé ba/mû ba-kyú u ányi.

⁴⁰ Ké bubwô ámbu, Músis o/kye kyikim-banet ńkyí Mákyi esí nyí Gyílet, ne mbé ba-kûkyú ké nyǐ.

⁴¹ Onet-kyikû-banet ńkyí Manáse obónge mú odabángê Jáyi o-kye eshê ekíri bunwa o-koo kányí, ne o-fé kányí dyizîn ńdyí badakó eshê nyí Jáyi.

⁴² Onet obónge mú odabángê Nóba o/kye oshê mú Kénat ne boǒshê ḿbú bu/wâng kámú bunwa, o-koo kámú, o-fé kámú dyizîn ńdyí emen nyǐ oyén.