Nómba 31 - Bokyi Bible

Óburúkpâbí o/kye Busa o/fu, bakye Banet-Médyan Busông

¹ Óburúkpâbí o-raa ne Músis o/fu,

² kye banet ḿbé Médyan busông ké ńkyí mbé ba/chi banet-Ézerel. Ké nkéré mú wo aa/chi éné, wo a/chi a-kpú.

³ Músis o-raa kâng ne banet-Ézerel o/fu, kpá n̂g byiko-byití eringe nyí ben badaman enwa ne banet-Médyan ba-kye kámbé busông ké ńkyí mbé ba/chi Óburúkpâbí.

⁴ Ké kyikû-banet-Ézerel nang kyirá, fîm m̂ égot-banet etánge ba-twóm byití.

⁵ Ba-fîm kâng égot-banet etánge etánge ké kyikû ké kyikû, ne ocím-banet kángkáng o/byí égot etánge etánge ké byikit diǐkpú ne byifee, ḿbé ba/kpá byiko-byití enwa.

⁶ Músis o-twóm kámbé byití, o-tî Fyinéhas mú wǎn-Elyǎza mú nchi kyifen-Osówo, mú o/mû onet-dyishí mú banet ḿbé badatún byěm-Osówo ne biintán-byití o/fu, okyú onet-dyishí-basúja.

⁷ Mbé ba-kye banet ḿbé Médyan bunwa wǎ eringe nyí Óburúkpâbí o/kye Músis busa, ba-ju kángkáng banyinchéng,

⁸ cibicibi ne batu ḿbé Médyan ashí atánge, Otu Ébyi ne Otu Rékem ne Otu Zû ne Otu Hôo ne Otu Réba. Mbé ba/ju to Bálim mú wǎn-Bwô.

⁹ Banet ḿbé Ézerel ba-kám banyinyi ne bwǎn ḿbé Médyan, ba-koo byitú ebe ne kángkáng esang ebe.

¹⁰ Ba-shí eshê ebe ne boǒshê ebe kángkáng.

¹¹ Ba-kúng kángkáng byěm ḿbyí mbé ba/koo ké byití, cibicibi ne banet-mgbogobá ne byitú

¹² ba-ba-kye Músis ne Elyǎza ne banet-Ézerel kángkáng, ḿbé ba/mû ké ndege-esí mú Mówep, ké esim-kace ńké Jódan nyí esû edabyí, fáráng ne Jéríku.

Basúja ba/fyi Byití

¹³ Músis ne Elyǎza ne kángkáng banet-ashí ḿbé áku, ḿbé oshê ba-byí kyíjí ké oshê ba-dim edakwárê ne basúja.

¹⁴ Kafâ ka/sa Músis ne banet-ashí-basúja ḿbé badanyán égot-basúja etánge ne bajam-basúja batánge, ḿbé ba/fyi byití.

¹⁵ Nyǐ o-bí kámbé o/fu, ebóng kyi/chi ne ba*da/ju ḿbé banyinyi*.

¹⁶ Zîim m̂ ba/fu, kyi/mû banyinyi nké ba/chi ńkyí Bálim o/sét, ne ké Pôo, mbé nké ba/chi banet-Ézerel ba-né dyityém efé ne Óburúkpâbí. Nkyí nké kyi/cen ne kyibî-orwôm kyi-róng banet-Óburúkpâbí.

¹⁷ Kántîk kâng, ju n̂g wǎn-onyinchéng nang orá nang orá ne onyinyi nang orá mu baa/rí ne nyǐ.

¹⁸ Nké kúng n̂g kángkáng bwǎn-banyinyi ne kángkáng banyinyi ḿbé ba*da/nyît ne onyinchéng* ba-firi ḿbé enen.

¹⁹ Nang yeě ké burwám enen kángkáng mú o/ju onet, nang o/ta kyikwóm-okúsí, o-man o-waa kyíjí, oo*nung ké kafâ-oshê* tete ací káchâtkányi. Ké ací achât, ne ké ací káchâtkányi, soo n̂g byiko enen ké omu mú ociring efîm ne ḿbyí banyinyi ḿbé ben ba/kám.

²⁰ Ba-man ba-soo to kyídí nang kyirá ne kángkáng byěm ḿbyí ba/chi ké ekwop-enyam nang ké eríp-ebúbǔu nang ké kyichí.

²¹ Elyǎza o-raa ne banet ḿbé ba/fyi byití o/fu, byije ḿbyí Óburúkpâbí o/kye Músis byi/fu,

^22-23 kángkáng byěm ḿbyí bii*ba/chi byi-shí* wǎ gûl ne syílyíba ne borôn ne mbôl, ba/chi ba-soo kámbyí ké kafâ-okwâ ké kaǎnyín-nkéré. Byěm ḿbyí áku kángkáng ba/chi ba-soo kámbyí ké omu mú ociring efîm.

²⁴ Ké dyicí ńdyí ací káchâtkányi, ba-man ba-soo byídí enen, ne ben kâng baa*kyú to banet-ociring* ne ba-mîng běn ba-nung ké kafâ-oshê.

Ba/kyii Byěm ḿbyí ba/koo ké Byití

²⁵ Óburúkpâbí o-raa ne Músis o/fu,

²⁶ wo ne Elyǎza cibicibi ne banet-ashí-oshê ḿbé áku, pan n̂ ocím-byěm kángkáng ḿbyí ba/koo ké byití, cibicibi ne banet-mgbokobá ne byitú.

²⁷ Kyii n̂g ḿbyí ba/koo ké byití jangjang ké byikit byifee. Kyikit kyibónge kyi/já basúja, ne ńkyí kyibónge kyi/já banet-oshê.

²⁸ Ké kyicê ńkyí kyi/já basúja, koo n̂g onet-mgbokobá obónge obónge ké égot-banet efee esim-bajam-banet-mgbokobá batánge ba-kye Óburúkpâbí wǎ akpuga-dyishí. Koo n̂g ocím ámu obónge to ké bampong ne boonyam-atû ne ebû.

²⁹ Kúng n̂g kámbyí ba-kye Elyǎza wǎ eyáré nyí Óburúkpâbí.

³⁰ Ké kyicê ńkyí kyi/já banet-oshê ḿbé áku, fîm m̂ onet-mgbokobá obónge obónge ké bajam-banet-mgbokobá bafee esim diǐkpú. Fîm m̂ ocím ámu obónge to ké bampong ne boonyam-atû ne ebû. Kúng n̂g kámbyí ba-kye bǎmgbán-nchi kyifen-Osówo ḿbé mbe ba-tún n mpyep mú Óburúkpâbí odakyú.

³¹ Músis ne Elyǎza ba-chi wǎ eringe nyí Óburúkpâbí o/kye busa.

^32-35 Ńnyín něen ocím-byěm mú basúja ba/koo ké byití, cibicibi ne ḿbyí mbé ba/tî byiko ebe, égot-ebû etánge etánge ké égot-byikit echât ne bajam-byikit bachât esim onyiryiká, ne égot-bampong etánge etánge ké bajam-byikit bachât esim diǐkpú ne byifee, ne égot-boonyam-atû etánge etánge ké bajam-byikit bachât ne din, ne égot-banyinyi ḿbé ba*da/nyît ne onyinchéng* etánge etánge ké byikit bujam esim diǐkpú ne byifee.

^36-40 Kyicê ńkyí ba/kyii ba-kye basúja kyi/mû égot-ebû etánge etánge ké égot-byikit ebónge ne bajam-byikit nyâchât esim-byikit onyiryiká ne byifee ne égot efee ne bajam batánge, nyí ba/fîm égot echât ne bajam bachât esim onyiryiká wǎ akpuga-dyishí nyí a/já Óburúkpâbí. Ba/kye to basúja égot-bampong etánge etánge ké byikit bujam esim onyiryiká ne din, ḿbé ba/fîm bajam bachât esim diǐkpú ne bafee wǎ akpuga-dyishí nyí a/já Óburúkpâbí. Ba/kye to basúja égot-boonyam-atû etánge etánge ké byikit bujam esim diǐkpú esim-égot efee ne bajam batánge, ḿbú ba/fîm bajam bachât ne din wǎ akpuga-dyishí nyí a/já Óburúkpâbí. Ba/kye to basúja égot-banyinyi ḿbé ba*da/nyît ne onyinchéng* etánge etánge ké byikit onyiryiká ne din, ḿbé ba/fîm bujam esim diǐkpú ne bafee wǎ akpuga-dyishí nyí a/já Óburúkpâbí.

⁴¹ Músis kâng o-kye Elyǎza akpuga-dyishí ányi wǎ eyáré nyí e/já Óburúkpâbí, wǎ eringe Óburúkpâbí o/kye busa.

^42-46 Kyicê ńkyí oshê kyi/mû eringe ebónge ne ńkyí basúja. Kyi/mû égot-ebû etánge etánge ká égot-byikit ebónge ne bajam-byikit nyâchât esim onyiryiká ne byifee ne égot efee esim-bajam batánge, ne égot-bampong etánge etánge ké byikit bujam esim onyiryiká ne din, ne égot-boonyam-atû etánge etánge ké byikit bujam esim diǐkpú ne égot efee ne bajam batánge, ne égot-banyinyi ḿbé ba*da/nyît ne onyinchéng* etánge etánge ké byikit onyiryiká ne din.

⁴⁷ Ké kyicê ńkyín, Músis o/fîm onet-mgbokobá obónge obónge ne kyitú kyibónge kyibónge to ké bajam bafee esim diǐkpú, wǎ eringe nyí Óburúkpâbí o/kye busa, o-kye bǎmgbán-nchi kyifen-Osówo ḿbé mbe ba-tún n mpyep mú Óburúkpâbí odakyú.

⁴⁸ Banet-ashí-basúja kâng ḿbé badanyán égot-basúja etánge ne bajam-basúja batánge ba-dim ba-kâm Músis,

⁴⁹ ba-sét ǎ ba/fu, bonchí, be bii/pan basúja ḿbé ba/mû ké bubwô eten. Onet nang obónge ké burwám ebe o*fí mú o/tánê*.

⁵⁰ Be kâng byi-kú byi-bâ ne byibwáng-gûl ḿbyí kyitông ne abwô ne efwa, ḿbyí be byi/kúng. Be byimu byi-kyâ Óburúkpâbí kámbyí wǎ dyifwá eré ńdyí dyikpen eten, eringe nyí nyǐ oda bě eku.

⁵¹ Músis ne Elyǎza ba-koo byibwáng-gûl ámbyi.

⁵² Kángkáng eyáré nyí banet-ashí-basúja ba/kye e/byí nang égot-bakyílogaram ebónge ké burô.

⁵³ Banet ḿbé ba/mû ba*fí banet-ashí* ba*da/kye byěm ḿbyí mbé ba/kúng ké byití*.

⁵⁴ Músis kâng ne Elyǎza ba-kúng gûl ámu ba-da-fé ké mpyep mú Óburúkpâbí odakyú, eringe nyí Óburúkpâbí odaku banet-Ézerel.