Nómba 30 - Bokyi Bible

Byije byi-kim ne Ocím eryí

¹ Músis o/sét banet-ashí ḿbé byikû-banet ḿbyí Ézerel o/fu,

² Óburúkpâbí o/kye busa o/fu, â onet o/ryí ocím o-sem ǎ o/fu, nyǐ o-kyâ Óburúkpâbí chwǒm, nang o/ryí ocím o/fu, nyǐ o-cíp ng esong, nang o/fu, nyǐ o-sem m bato, onet ámu oo*man o-bên ocím emen mú o/ryí*. Nké o-man o-chi kángkáng byěm ḿbyí nyǐ o/fu, nyǐ o-chi i.

³ Â búsé ḿbé bu/tôong bu-kyú u ké kyise ńkyí bonchí emen bu/ryí ocím bu-sem Óburúkpâbí bu/fu, mbú bu-kyâ ǎ chwǒm, nang bu/ryí ocím bu/fu, mbú bu-cíp ng esong, nang bu/fu, mbú bu-sem m bato,

⁴ mbú bu-man bu-chi kángkáng byěm ḿbyí mbú bu/ryí ocím, kyi*da/shwôm â bonchí emen o/né kámú* ké nkéré mú o/jwo kyi-kim ne mǔ*.

⁵ Nké â bonchí emen o/né ocím ámu ké nkéré nyǐ o/jwo kyi-kim ne mǔ, búsé ámbu bu-man n ebên kámú. Óburúkpâbí o-man ǎ epwoo, ká nǎ, bonchí emen nké o*da ǎ ebángê o-tî kámú*.

⁶ Â onyinyi mú mu dyikpe o/ryí ocím o-sem Óburúkpâbí, nang o/tigi otígí nang o*da/tigi otígí* nang o/ryí ocím o/fu, nyǐ o-cíp ng esong, nang o/fu, nyǐ o-sem m bato ne o-da-bé otyép,

⁷ nyǐ o-man o-chi kángkáng byěm ḿbyí nyǐ o/ryí ocím, kyi*da/shwôm â otyép emen o/né kámú* ké nkéré o/jwo kyi-kim ne mǔ*.

⁸ Nké â otyép emen o/né kámú ké nkéré o/jwo kyi-kim ne mǔ, nyǐ o-man n ebên kámú. Óburúkpâbí o-pwoo ng ǎ.

⁹ Onyǐnkú nang onyinyi mú oo/man dyibé ne otyép emen, o-man o-tî ocím nang orá mú nyǐ o/ryí o-sem Óburúkpâbí, nang mú o/ryí o/fu, nyǐ o-cíp ng esong, nang o/fu, nyǐ o-sem m bato.

¹⁰ Â onyinyi mú mu o-bé ng otyép o/ryí ocím o-sem Óburúkpâbí, nang o/ryí ocím mú odacíp esong, nang mú odasem bato,

¹¹ nyǐ o-man o-chi kángkáng byěm ḿbyí nyǐ o/ryí ocím, kyi*da/shwôm â otyép emen o/né kámú* ké nkéré o/jwo kyi/kim ne mǔ*.

¹² Nké â otyép emen o/né ocím ámu ké nkéré o/jwo kyi-kim ne mǔ, nyǐ o-man n ebên kámú. Óburúkpâbí o/chi o-pwoo ǎ, ké nǎ, otyép emen o*da ǎ ebángê o-tî kámú*.

¹³ Otyép emen mu ne busa ḿbú odafu ocím ámu mú onyi emen o/ryí okyú shwaneshwane ne ḿbú odafu oo*kyú*.

¹⁴ Nké â ké orî-dyicí mú nyǐ o/jwo kyi-kim ne ocím ámu, ne o*da/né* onyi emen ámu o-man o-chi kángkáng byěm ḿbyí nyǐ o/ryí ocím. Mú onyinchéng oo/bángê ké ocím eryí ámu, ké nǎ, nyǐ o*da/né kámú ké dyicí ńdyí o/jwo kyi-kim ne mǔ*.

¹⁵ Nké â o/bwa o-né kámú ké nkéré kaa/rí, nyǐ o-man o-ri busông ḿbú ocím ámu ebên.

¹⁶ Byije něen ḿbyí Óburúkpâbí o/kye Músis byi-kim ne ocím eryí mú onyinyi-dyikpe mú mu o-kyú u ké kyise ńkyí bonchí emen, nang mú mu ne otyép odaryí.