Nómba 3 - Bokyi Bible

Bwǎn ḿbé Éron

¹ Nyín něen kyikû-banet ńkyí Éron ne Músis ké nkéré mú Óburúkpâbí o/raa ne Músis ké kaku ńké Sána.

² Éron o/mû ne bwǎn ashí anyii ḿbé banyinchéng, ne ba/mû ba-bángê e Nádap, mú mu okínkán, ne Abyíhu ne Elyǎza ne Étama.

³ Ba/jware kámbé ba-firi banchi kyifen-Osówo.

⁴ Nké Nádap ne Abyíhu ba/kpú ké nkéré mbé ba/kye Óburúkpâbí eyáré-okwâ nyí Óburúkpâbí o/mû o*da/sét kámbé o/fu, bakye ǎ* ké kyikim-dyikán ńkyí kaku ńké Sána. Mbé ba/mû ba*fí ne bwǎn* ké bubwô ámbu, Elyǎza ne Étama ba/chi bǎmkpóngé ḿbé banchi kyifen-Osówo ké nkéré mú Éron o/tôong okpó.

Ba/fîm Banet-Lyíva ba/fu, bakyú Bǎmgbán-Banchi Kyifen-Osówo

⁵ Óburúkpâbí o-raa ne Músis o/fu,

⁶ kó kyikû-banet ńkyí Lyíva ba-bâ ba-kâm ǒ, a-chi kámbé ba-firi bǎmgbán ḿbé Éron mú nchi kyifen ejí.

⁷ Mbé ba/chi ba-chi bǎmkpóngé ḿbé mpyep mú ejí, ba-chi bǎmkpóngé ba-kye banchi kyifen ejí ne kángkáng banet ḿbé Ézerel.

⁸ Mbé ba/chi ba-kûtún kángkáng byěm ḿbyí mpyep mú ejí, ba-chi bǎmkpóngé ba-kye banet-Ézerel ḿbé áku.

⁹ Bǎmkpóngé ḿbé banet-Lyíva badachi ba*fí bakíri* kyi-cibi ne mbé bakyú wǎ bǎmgbán ḿbé Éron ne bwǎn emen*.

¹⁰ Wo a/chi a-jware Éron ne bwǎn emen ba-kúng bǎmkpóngé ḿbé nchi kyifen ejí. Baju onet nang orá okíri mú o/kan o/fu, nyǐ o-chi i éné.

¹¹ Óburúkpâbí o-raa ne Músis o/fu,

^12-13 banet-Lyíva kántîk ba/firi ḿbé ejí. Ké nkéré mú me n/ju kángkáng bákpá-bwǎn ḿbé banet-Éjip, me n/cá ókpá-wǎn-onyinchéng ké kyikû-banet ńkyí Ézerel nang kyirá, ne ókpá mú kyitú nang kyirá n/fu, byikyú ḿbyí ejí. Kántîk, ńkyí m/mû n/chi n-kúng bákpá-bwǎn-banyinchéng ḿbé banet-Ézerel wǎ ḿbé ejí, me nn/kúng banet-Lyíva. Mbé ba/chi ba-firi ḿbé ejí. Me n-chi i Óburúkpâbí.

Ba/pan Ocím-Banet ḿbé Lyíva

¹⁴ Ké kyikim-dyikán ńkyí kaku ńké Sána, Óburúkpâbí o/kye Músis busa o/fu,

¹⁵ osáng azîn-banet ḿbé Lyíva ké byikim ké byikim ne ké byikû ké byikû. Osáng onyinchéng nang orá kyi-fím ké mú oo/rí otukáku obónge kyi-jâ kyíbóng,

¹⁶ ne Músis o/chi éné.

^17-20 Lyíva o/mû ne bwǎn-banyinchéng ashí achât, Géshon ne Kóhat ne Merári, ḿbé ba/mû banchí ḿbé kpákpá, ḿbé kyikû-banet ḿbyí mbyi byi-bángê e azîn ebe. Géshon o/mû ne bwǎn-banyinchéng ashí afee, Lyíbyinyi ne Shímye. Kóhat o/mû ne bwǎn-banyinchéng ashí anyii, Amáram ne Éza ne Héboron ne Ózel. Merári o/mû ne bwǎn-banyinchéng ashí afee, Mahályi ne Múshi. Mbé nké ba/mû banchí ḿbé kpákpá, ḿbé byikû-banet ḿbyí mbyi byi-bángê e azîn ebe.

²¹ Byikû ḿbyí Lyíbyinyi ne Shímye nké byi/fím ne Géshon.

²² Ocím-banyinchéng kángkáng mú ba/sáng kámbé azîn kyi-fím ké ḿbé baa/rí otukáku obónge kyi-jâ kyíbóng o/mû égot etánge etánge ké byikit káchâtkányi esim-égot efee ne bajam-banet batánge.

²³ Ba/fu, kyikû-banet ńkyín kyibi boompyep ebe ké esim-mpyep mú Óburúkpâbí odakyú, ké kyicê ńkyí óbyísû mu o-ríbî ng o-jâ,

²⁴ ne Elyǎsap mú wǎn-Láwel o/mû onet-dyishí ebe.

²⁵ Bǎmkpóngé ḿbé badatún mpyep mú Óburúkpâbí odakyú ba/já kámbé, cibicibi ne byídí byifee ḿbyí badacít kámú, ne ékpígí nyí ocím-dyifyi,

²⁶ ne byídí ḿbyí oro mú o/wâng mpyep ámu ne kyikit-kyifen-Osówo echi, ne ékpígí nyí ocím-dyifyi mú oro. Kángkáng bǎmkpóngé ba-kim ne byěm ḿbyín ba/já kámbé.

²⁷ Byikû ḿbyí Amáram ne Éza ne Héboron ne Ózel nké byi/fím ne Kóhat.

²⁸ Ocím-banyinchéng kángkáng mú ba/sáng kámbé azîn kyi-fím ké ḿbé baa/rí otukáku obónge kyi-jâ kyíbóng o/mû égot etánge etánge ké byikit nyíryinyi esim-égot echât.

²⁹ Ba/fu, kyikû-banet ńkyín kyibi boompyep ebe ké kyicê-busyísen-mpyep mú Óburúkpâbí odakyú,

³⁰ ne Ézafan mú wǎn-Ózel o/mû onet-dyishí ebe.

³¹ Bǎmkpóngé ḿbé badatún mkpukpu-byěm-Osówo ba/já kámbé, cibicibi ne ókpákpúrúk, ne kyikwap-etyuryíkáng etwôom, ne byikit-kyifen-Osówo echi, ne byěm ḿbyí banchi kyifen-Osówo mbe ba-kúng ng ba-chi i byifen ké nfût-ociring, ne ékpígí nyí ocím-dyifyi mú ochíchí-nfût-ociring. Kángkáng bǎmkpóngé ba-kim ne byěm ḿbyín ba/já kámbé.

³² Elyǎza mú wǎn-Éron, mú nchi kyifen-Osówo nké o/mû onet-dyishí-banet-Lyíva. Nyǐ nké o/mû onet-dyishí mú banet ḿbé mbe ba-chi i bǎmkpóngé ké nfût-ociring.

³³ Byikû ḿbyí Mahályi ne Múshi nké byi/fím ne Merári.

³⁴ Ocím-banyinchéng kángkáng mú ba/sáng kámbé azîn kyi-fím ké ḿbé baa/rí otukáku obónge kyi-jâ kyíbóng o/mû égot etánge etánge ké byikit nyâchât esim-égot ebónge.

³⁵ Ba/fu, kyikû-banet ńkyín kyibi boompyep ebe ké kyicê-bushûyû-mpyep mú Óburúkpâbí odakyú, ne Zúryel mú wǎn-Abyíhal o/mû onet-dyishí ebe.

³⁶ Ba/kye kámbé bǎmkpóngé ḿbé kángkáng byichí ne efang ne byikwap ḿbyí mpyep mú Óburúkpâbí odakyú. Kángkáng bǎmkpóngé ḿbé ba/kim ne byěm ḿbyín ba/já kámbé.

³⁷ Bǎmkpóngé ḿbé byikwap ne byikû-byikwap ne byíkîm-biǐré ne erí, ḿbyí oro mú emen ba/já to kámbé.

³⁸ Ba/fu, Músis ne Éron ne bwǎn-Éron babi boompyep ebe ké kashú-mpyep mú Óburúkpâbí odakyú, ké kyicê ńkyí óbyísû mu o-byí i. Bǎmkpóngé ḿbé badachi ké nfût-ociring ba-kye banet ḿbé Ézerel ba/já kámbé. Baju onet nang orá okíri mú o/kan o/fu, nyǐ o-chi i éné.

³⁹ Ocím omúmú mú kángkáng banyinchéng ḿbé banet ḿbé Lyíva kyi-fím ké ḿbé baa/rí otukáku obónge kyi-jâ kyíbóng, ḿbé ba/sáng kámbé azîn ké byikû-banet ké byikû-banet wǎ eringe nyí Óburúkpâbí o/kye busa o/mû égot etánge etánge ké byikit bujam esim byifee.

Banet-Lyíva ba/kúng Kyikit ńkyí Bákpá-Bwǎn-Banyinchéng

^40-41 Óburúkpâbí o-raa ne Músis o/fu, kángkáng bákpá-bwǎn-banyinchéng ḿbé Ézerel ba/já mě. Ké bubwô ámbu, sáng dyizîn ńdyí ókpá-wǎn-onyinchéng mú Ézerel nang orá kyi-fím ké mú oo/rí otukáku obónge kyi-jâ kyíbóng. Nké ké kyikit ńkyí ebe, me nn/koo banet-Lyíva ba-firi ḿbé ejí. Me n-chi i Óburúkpâbí. Me nn/koo to kángkáng byitú ḿbyí banet-Lyíva byi-bwom ké kyikit ńkyí kángkáng bambwôp kashú-bwǎn-byitú.

⁴² Músis o/jwo, ne o/sáng azîn nyí kángkáng bákpá-bwǎn-banyinchéng,

⁴³ kyi-fím ké ḿbé baa/rí otukáku obónge kyi-jâ kyíbóng, ne mbé kángkáng ba/mû égot etánge etánge ké byikit bujam ne byifee esim-égot ebónge ne bajam-banet bachât esim-banet diǐkpú ne bachât.

⁴⁴ Óburúkpâbí o-raa ne Músis o/fu,

⁴⁵ kántîk, cá banet-Lyíva ba-firi ḿbé ejí, ba-kúng kyikit ńkyí kángkáng bákpá-bwǎn-banyinchéng ḿbé Ézerel a-cá to byitú ḿbyí banet-Lyíva a-kye mě, byi-kúng kyikit ńkyí bambwôp kashú-bwǎn-byitú ḿbyí banet-Ézerel.

⁴⁶ Ké bubwô ḿbú bákpá-bwǎn-banyinchéng ḿbé Ézerel ba/jê ba-shwôm banet-Lyíva ké égot-banet ebónge ne bajam-banet bachât esim diǐkpú ne bachât, a-man a-ré dyifwá ńdyí bwǎn ḿbé ba/waa kyísí.

⁴⁷ Kye akpuga-syílyíba atánge nyí adatyeem ne akpuga nyí mpyep mú ejí, ké dyishí-wǎn nang orá.

⁴⁸ Kye Éron ne bwǎn emen akpuga ányi.

⁴⁹ Músis o-kúng kâng

⁵⁰ égot-akpuga-syílyíba nyâchât ne bajam nyíryinyi esim atánge

⁵¹ o-kye Éron ne bwǎn emen.