Nómba 29 - Bokyi Bible

Eyáré nyí Dyijî-Kyifen ńkyí Dyije ńdyí Dyifyîfî

¹ Ké mbwôp kashú-dyicí ńdyí etukáku káchâtkányi, cibi n̂g kyikit kyibónge ba-kye Óburúkpâbí ofê. *Da n̂g echi bǎmkpóngé*. Ké dyicí ándyi, jwá n̂g biintán.

² Chi n̂g kyifen-byirim-enyam eshí ńkyí kyidanyîn kyinung, ba-kye Óburúkpâbí kyisu-otyép-mpong ne otyítǎm ne bwǎn-etyítǎm káchâtkányi ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

³ Kye n̂g eyáré-esang-byichí nyí filáwa mú onong onong, mú ba/chwáp bakút-ólif, ba-fé bakyílogaram-filáwa bachât ké otyép-mpong ámu ne bakyílogaram-filáwa bafee ké otyítǎm

⁴ ne kyílogaram obónge ké wǎn-otyítǎm nang orá.

⁵ Kye n̂g to otúbû obónge wǎ kyifen-byibî efîm, ne ké bukwóp ḿbún, ba/chi ba-chi banet kyifen ńkyí byiko esoo.

⁶ Kye n̂g ḿbyín cibicibi ne kyifen-byirim-enyam eshí ńkyí badachi kángkáng nkéré ké mbwôp kashú-dyicí ńdyí otukáku, ne eyáré-esang-byichí emen, ba-chi to kyifen-byirim-enyam eshí ńkyí badachi kángkáng dyicí, cibicibi ne eyáré-esang-byichí emen ne eyáré-bato emen. Eyáré-byiryíng ńnyín e-chi i kyinung ńkyí kyidanyîn Óburúkpâbí.

Eyáré nyí Dyijî-Kyifen ńkyí Byibî efîm

⁷ Cibi n̂g kyikit kyibónge ba-kye Óburúkpâbí ofê ké dyicí ńdyí ací diǐkpú, ké etukáku káchâtkányi. *Da n̂g eryí byiryíng* ne *da n̂g echi bǎmkpóngé*.

⁸ Chi n̂g kyifen-byirim-enyam eshí ńkyí kyidanyîn kyinung ba-kye Óburúkpâbí kyisu-otyép-mpong ne otyítǎm ne bwǎn-etyítǎm káchâtkányi ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

⁹ Kye n̂g eyáré-esang-byichí nyí filáwa mú onong onong, mú ba/chwáp bakút-ólif, ba-fé bakyílogaram-filáwa bachât ké otyép-mpong ámu ne bakyílogaram-filáwa bafee ké otyítǎm

¹⁰ ne kyílogaram-filáwa obónge ké wǎn-otyítǎm nang orá.

¹¹ Kye n̂g to otúbû obónge wǎ kyifen-byibî efîm, cibicibi ne otúbû mú kyifen ńkyí kyidasoo banet byiko, ne kyifen-byirim-enyam eshí ńkyí badachi kángkáng dyicí, cibicibi ne eyáré-esang-byichí emen ne eyáré-bato emen.

Eyáré nyí Dyijî-Kyifen ńkyí Boompyep ebi

¹² Cibi n̂g kyikit kyibónge ba-kye Óburúkpâbí ofê ké dyicí ńdyí ací onyiryiká, ké etukáku káchâtkányi. Chi n̂g dyijî-kyifen ńkyín ké ací káchâtkányi, ké ofê mú Óburúkpâbí, ne *da n̂g echi bǎmkpóngé*.

¹³ Ké mbwôp kashú-dyicí, kye n̂g Óburúkpâbí eyáré-byiryíng nyí eda ǎ enyîn kyinung, byisu-batyép-mpong diǐkpú ne bachât ne etyítǎm efee ne bwǎn-etyítǎm diǐkpú ne banyii ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

¹⁴ Kye n̂g eyáré-esang-byichí nyí filáwa mú onong onong, mú ba/chwáp bakút-ólif, ba-fé bakyílogaram-filáwa bachât ké otyép-mpong nang orá ne bakyílogaram-filáwa bafee ké otyítǎm nang orá,

¹⁵ ne kyílogaram-filáwa obónge ké wǎn-otyítǎm nang orá, cibicibi ne eyáré-bato nyí badakye.

¹⁶ Kye n̂g to etúbû obónge wǎ kyifen-byibî efîm. Kye n̂g ḿbyín ba-cibi ne kyifen-byirim-enyam eshí ńkyí badachi kángkáng dyicí, cibicibi ne eyáré-esang-byichí emen ne eyáré-bato emen.

¹⁷ Ké nnyinyěng-dyicí, kye n̂g byisu-batyép-mpong diǐkpú ne byifee ne etyítǎm efee ne bwǎn-etyítǎm diǐkpú ne banyii ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

^18-19 Kye n̂g kámbyí cibicibi ne kángkáng eyáré nyí áku, nyí badakye ké mbwôp kashú-dyicí.

²⁰ Ké ací achât, kye n̂g byisu-batyép-mpong diǐkpú ne din ne etyítǎm efee ne bwǎn-etyítǎm diǐkpú ne banyii ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

^21-22 Kye n̂g kámbyí cibicibi ne kángkáng eyáré nyí áku, nyí badakye ké mbwôp kashú-dyicí.

²³ Ké ací anyii, kye n̂g byisu-batyép-mpong diǐkpú ne etyítǎm efee ne bwǎn-etyítǎm diǐkpú ne banyii ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

^24-25 Kye n̂g kámbyí cibicibi ne kángkáng eyáré nyí áku, nyí badakye ké mbwôp kashú-dyicí.

²⁶ Ké ací atánge, kye n̂g byisu-batyép-mpong kátángekányi ne etyítǎm efee ne bwǎn-etyítǎm diǐkpú ne banyii ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

^27-28 Kye n̂g kámbyí cibicibi ne kángkáng eyáré nyí áku, nyí badakye ké mbwôp kashú-dyicí.

²⁹ Ké ací nyâchât, kye n̂g byisu-batyép-mpong nyíryinyi ne etyítǎm efee ne bwǎn-etyítǎm diǐkpú ne banyii ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

^30-31 Kye n̂g kámbyí cibicibi ne kángkáng eyáré nyí áku, nyí badakye ké mbwôp kashú-dyicí.

³² Ké ací káchâtkányi, kye n̂g byisu-batyép-mpong káchâtkányi ne etyítǎm efee ne bwǎn-etyítǎm diǐkpú ne banyii ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

^33-34 Kye n̂g kámbyí cibicibi ne kángkáng eyáré nyí áku, nyí badakye ké mbwôp kashú-dyicí.

³⁵ Ké ací nyíryinyi, cibi n̂g kyikit kyibónge ba-kye Óburúkpâbí ofê, ne *da n̂g echi bǎmkpóngé*.

³⁶ Chi n̂g kyifen-byirim-enyam eshí ba-kye Óburúkpâbí wǎ eyáré-byiryíng nyí eda ǎ enyîn kyinung, kyisu-otyép-mpong kyibónge ne otyítǎm obónge ne bwǎn-etyítǎm káchâtkányi ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

^37-38 Kye n̂g kámbyí cibicibi ne kángkáng eyáré nyí áku, nyí badakye ké mbwôp kashú-dyicí.

³⁹ Ḿbyín nké mbyi byije kyi-kim ne byifen-byirim-enyam eshí ne eyáré-esang-byichí ne eyáré-bato ne byifen-okwáre ne Óburúkpâbí, ḿbyí ben badakûkye Óburúkpâbí ké ajî-byifen enen ḿbyí badachi. Chi n̂g ḿbyín cibicibi ne eyáré nyí bamu ba-kyâ ké ocím etî mú ben ba/ryí, nang eyáré nyí e/fím ké dyityém enen.

⁴⁰ Músis kâng o-sét banet-Ézerel kángkáng byěm ḿbyí Óburúkpâbí o/fu, bachi.