Nómba 28 - Bokyi Bible

Eyáré nyí badakye Kángkáng Nkéré

¹ Óburúkpâbí o-raa ne Músis o/fu,

² osét banet-Ézerel ba-kû ǎ ekye eyáré-byiryíng nyí eda ǎ enyîn, ké nkéré mú kyi/nyîn ǎ.

³ Ńnyín něen eyáré-byiryíng nyí badakye Óburúkpâbí, nyí badashí kángkáng dyicí, bwǎn-etyítǎm bafee ḿbé baa/rí dyije dyibónge, ḿbé ba*fí ne kyinêm*.

⁴ Kúng n̂g wǎn-otyítǎm obónge ba-chi kyifen ké dyicófóróng, mú nnyinyěng ké dyikurúku. Ba/chi ba-kye

⁵ nang orá ne eyáré nyí kyílogaram-filáwa obónge mú ba/chwáp ne lyíta-bakút-ólif ḿbé banong obónge.

⁶ Ńnyín ányi eyáré nyí badakye kángkáng dyicí, nyí badashí emúmú, nyí n/tî kyije emen ké kaku ńké Sána, wǎ eyáré-byiryíng nyí kyinung emen kyidanyîn Óburúkpâbí.

⁷ Ba/chi ba-pwó to lyíta-bato obónge ké kyikit-kyifen-Osówo echi wǎ eyáré ekye, cibicibi ne wǎn-otyítǎm.

⁸ Ké dyikurúku, chi n̂g kyifen ké wǎn-otyítǎm mú nnyinyěng ké dyizong-bukwóp bubónge ḿbú ba/chi ké dyicófóróng, cibicibi ne eyáré-bato emen. Nkyí to kyi-chi i eyáré-byiryíng nyí edanyîn Óburúkpâbí kyinung.

Eyáré nyí Dyicí-Ékwâbashi

⁹ Ké dyicí-ékwâbashi, kye n̂g bwǎn-etyítǎm bafee ḿbé baa/rí dyije, ḿbé ba*fí ne kyinêm* ne bakyílogaram-filáwa bafee ḿbé ba/chwáp bakút-ólif, wǎ eyáré-esang-byichí, cibicibi ne eyáré-bato.

¹⁰ Chi n̂g kyifen-byěm eshí ńkyín kángkáng dyicí-ékwâbashi, cibicibi ne eyáré nyí kángkáng dyicí ne eyáré-bato emen.

Eyáré nyí Dyicí ńdyí Otukáku odabyí

¹¹ Chi n̂g kyifen-byěm eshí ba-kye Óburúkpâbí ké kiimkpet kyikû-otukáku nang orá, eyáré nyí byisu-batyép-mpong byifee ne otyítǎm obónge ne bwǎn-etyítǎm káchâtkányi ḿbé baa/rí dyije dyibónge ḿbyí byi*fí ne kyinêm*.

¹² Wǎ eyáré-esang-byichí, fé n̂g filáwa mú ba/chwáp bakút-ólif. Ké otyép-mpong nang orá, kye n̂g bakyílogaram-filáwa bachât. Ké otyítǎm, kye n̂g bakyílogaram bafee,

¹³ ne ké wǎn-otyítǎm nang orá, kye n̂g kyílogaram obónge. Eyáré ńnyín nyí badashí e-chi i eyáré-byiryíng nyí edanyîn Óburúkpâbí kyinung.

¹⁴ Eyáré-bato emen nyi balyíta-bato bafee ké otyép-mpong nang orá, lyíta-bato ne kyicê ké otyítǎm ámu, ne lyíta-bato obónge ké wǎn-otyítǎm nang orá. Ńkyín nké nkyi kyije kyi-kim ne eyáré nyí badashí ké mbwôp kashú-dyicí ńdyí otukáku nang orá ké dyije dyimúmú.

¹⁵ Cibicibi ne eyáré nyí badashí kángkáng dyicí ne eyáré-bato emen, kye n̂g wǎn-otúbû obónge wǎ kyifen-byibî efîm.

Eyáré nyí Dyijî-Kyifen ńkyí Berêt

¹⁶ Dyijî-kyifen ńkyí Shwôm, ńkyí badachi ké ofê mú Óburúkpâbí, ba/chi ba-chi kánkyí â mbwôp kashú-otukáku mú dyije o/byí o-rí ací diǐkpú ne anyii.

¹⁷ Ké ací-onyiryiká, dyijî-kyifen ńkyí badakye Óburúkpâbí ofê kyikpet, ne kyi-rí i ací káchâtkányi, ne ké ací ányi kángkáng, ben ba/chi ba-ryí berêt mú baa*fé bukye ké mǔ o-mut*.

¹⁸ Ké mbwôp kashú-dyicí-dyijî-kyifen ánkyi, ben cibi n̂g kyikit kyibónge ba-kye Óburúkpâbí ofê. *Da n̂g echi bǎmkpóngé nang babónge*.

¹⁹ Kye n̂g Óburúkpâbí eyáré nyí badashí byitú wǎ eyáré-byiryíng, byisu-batyép-mpong byifee ne otyítǎm obónge ne bwǎn-etyítǎm káchâtkányi ḿbé baa/rí dyije dyibónge. Byitú ḿbyín kángkáng byi*dachi byi-kyú ne kyinêm*.

²⁰ Kye n̂g eyáré-esang-byichí nyí filáwa mú onong onong, mú ba/chwáp bakút-ólif, ba-fé bakyílogaram-filáwa bachât ké otyép-mpong nang orá ne bakyílogaram-filáwa bafee ké otyítǎm

²¹ ne kyílogaram-filáwa obónge ké wǎn-otyítǎm nang orá.

²² Kye n̂g to otúbû obónge wǎ kyifen-byibî efîm, ne ké bukwóp ḿbún, ba/chi ba-chi banet kyifen ńkyí byiko esoo.

²³ Kye n̂g ḿbyín cibicibi ne kyifen-byirim-enyam eshí kángkáng dyicófóróng.

²⁴ Ké dyizong-bukwóp bubónge, kye n̂g Óburúkpâbí eyáré-byiryíng ké kángkáng ací káchâtkányi, nyí eda ǎ enyîn kyinung. Kye n̂g ńkyín cibicibi ne kyifen-byirim-enyam eshí kángkáng dyicí ne eyáré-bato.

²⁵ Ké dyicí ńdyí ací káchâtkányi, cibi n̂g kyikit kyibónge ba-kye Óburúkpâbí ofê. *Da n̂g echi bǎmkpóngé*.

Eyáré nyí Dyijî-Kyifen ńkyí Byiryíng efuu

²⁶ Ké mbwôp kashú-dyicí ńdyí dyijî-kyifen ńkyí byiryíng efuu, ké nkéré ba-kú ba-chi i kyifen-esang-byichí nyí efyîfî ba-kye Óburúkpâbí, ben ba/chi ba-cibi kyikit kyibónge ba-kye Óburúkpâbí ofê. *Da n̂g echi bǎmkpóngé nang babónge*.

²⁷ Chi n̂g kyifen-byirim-enyam eshí ńkyí kyidanyîn Óburúkpâbí kyinung, byisu-batyép-mpong byifee ne otyítǎm obónge ne bwǎn-etyítǎm káchâtkányi ḿbé baa/rí dyije. Byitú ḿbyín kángkáng byi*dachi byi-kyú ne kyinêm*.

²⁸ Kye n̂g eyáré-esang-byichí nyí filáwa mú onong onong, mú ba/chwáp bakút-ólif, ba-fé bakyílogaram-filáwa bachât ké otyép-mpong nang orá ne bakyílogaram-filáwa bafee ké otyítǎm.

²⁹ Ne kyílogaram-filáwa obónge ké wǎn-otyítǎm nang orá.

³⁰ Kye n̂g to otúbû obónge wǎ kyifen-byibî efîm, ne ké bukwóp ḿbún, ba/chi ba-chi banet kyifen ńkyí byiko esoo.

³¹ Kye n̂g ḿbyín ne eyáré-bato cibicibi ne kyifen-byirim-enyam eshí ne esang-byichí nyí kángkáng dyicí.