Nómba 27 - Bokyi Bible

Bwǎn-Banyinyi ḿbé Zélófahat

¹ Mála ne Núwa ne Hógala ne Myíka ne Tyíza ba/mû bwǎn-banyinyi ḿbé Zélófahat o/fwon. Zélófahat o/mû wǎn mú Héfe. Héfe o/mû wǎn mú Gyílet, ne Gyílet o/mû wǎn-Mákyi, mú o/mû wǎn mú Manáse, ne Manáse o/mû wǎn mú Josêf.

² Bwǎn-Zélófahat ba-dim ba-da-bwom ké bushú-Músis ne Elyǎza ne banet-ashí-oshê ne oshê omúmú, ké ocím-dyifyi-mpyep mú Óburúkpâbí odakyú, ba-raa ba/fu,

³ bonchí eten o/kpú ké kyikim-dyikán, wǎn-onyinchéng o*da/fwon*. Nyǐ o/mû o*fí ké burwám-banet ḿbé ba/bángê ne Kóra* mú o/mû o/bírî bunwa ne Óburúkpâbí*. Nyǐ o/kpú ké bubwô-kyibî ńkyí emen.

⁴ Ebóng ńkyí dyizîn ńdyí bonchí eten dyidatánê ké Ézerel, ké nǎ, o*fí ne wǎn-onyinchéng*. Kye bě esí ké burwám-bwǎn-bané-bonchí eten.

⁵ Músis o-kúng kyiraa ebe ánkyi o-sét Óburúkpâbí,

⁶ ne Óburúkpâbí o-raa ne nyǐ o/fu,

⁷ ńkyí bwǎn-Zélófahat ḿbé banyinyi ba/bí nkyi kanong. Kye kámbé esí ké burwám-bwǎn-bané-bonchí ebe. Mîng kámbé ba-ryí bukyû ké esí emen.

⁸ Sét banet-Ézerel a/fu, nang nkéré orá nké onet o/kpú o*da/mîng wǎn-onyinchéng* wǎn emen mú onyinyi o/chi o-ryí bukyû ké esí emen.

⁹ Â o*fí ne wǎn-onyinyi* bwǎn-bané emen ḿbé banyinchéng ba/chi ba-ryí bukyû ké esí emen.

¹⁰ Â o*fí ne bwǎn-bané ḿbé banyinchéng* bwǎn-bané ḿbé bonchí emen ba/chi ba-ryí bukyû ké nyǐ.

¹¹ Â o*fí ne bwǎn-bané ḿbé banyinchéng* nang ḿbé ba/fím ne bonchí emen* wǎn-boné emen mú o/fím ne nyǐ o-shwôm, o/chi o-ryí bukyû ké nyǐ, o/chi o-kúng kányí wǎ nyí emen. Banet-Ézerel ba/chi ba-kúng ńkyín wǎ kyije ńkyí me Óburúkpâbí n/kye ǒ busa.

Ba/cá Jóshwa wǎ Onet mú o/chi o-kúng Kyikit ńkyí Músis

¹² Óburúkpâbí o-raa ne Músis o/fu, yú kyíbóng ńké Ábarim a-ri esí nyí me mu n-kyâ banet-Ézerel.

¹³ Ké nkéré aa/ri kányí, wo a/chi a-kpú wǎ eringe nyí Éron mú wǎn-boné eyên o/kpú,

¹⁴ ké nǎ, ben ba/né echi ńkyí me n/kye busa ké kyikim-dyikán ńkyí Zîn. Ké nkéré oshê omúmú ba/shwôn ne me ké Meryíba, wo a/né etông busa ejí ḿbú bunong ké bushú ebe. Ba/fé kace ánke dyizîn, Meryíba, ńké ka/kpet ebyí ké Kádyishi, ké kyikim-dyikán ńdyí Zîn.

¹⁵ Músis o-fé nshwam o/fu,

¹⁶ Osówo Óburúkpâbí mú amu a-kyâ kángkáng byěm dyikpen, me mu n-fâ nshwam n/fu, cá onyinchéng mú o/chi o-man etông banet ḿbén bukwóp

¹⁷ ne o-man n enyán kámbé ké byití, eringe nyí oshê eyên oo*firi wǎ etám-ebû nyí e*fí ne onet-mbâm*.

¹⁸ Óburúkpâbí o-raa ne Músis o/fu, kúng Jóshwa mú wǎn-Nûn, mú o/kwárê, a-twôom ǎ abwô ké dyishí.

¹⁹ Chi ǎ o-bwom ké bushú-Elyǎza ne ḿbú kángkáng banet, ne ányi ké bushú ebe kángkáng, sét a/fu, nyǐ nké odakúng kyikit ńkyí eyên.

²⁰ Kye ǎ kyicê-busa eyên eringe nyí kángkáng banet-Ézerel badachi ńkyí nyǐ o/sét.

²¹ Nyǐ o/chi o-jêem esim ne Elyǎza, mú o/chi o-kûnyît ńkyí mu n-ryuu ng, ké ámám nyí búrim ne túmim etwóp. Ké dyizong-bukwóp ḿbún, Elyǎza o/chi o-tông Jóshwa ne kángkáng banet-Ézerel bukwóp ké kángkáng byěm ḿbyí badachi.

²² Músis o-chi wǎ eringe Óburúkpâbí o/sét ǎ. Nyǐ o/chi Jóshwa o-bwom ké bushú-Elyǎza ne ḿbú kángkáng banet.

²³ Músis o-twôom Jóshwa abwô ké dyishí wǎ eringe nyí Óburúkpâbí o/kye busa, o-sét o/fu, Jóshwa nké o/chi o-kúng kyikit emen.