Nómba 25 - Bokyi Bible

Banet-Ézerel ké Pôo

¹ Ké nkéré banet-Ézerel ba/mû ba/bi oshê ké owo mú Akákya, banyinchéng ba/kpet erí ne banyinyi ḿbé Mówep ḿbé ba/mû ányi.

² Banyinyi ámbe ba/kó kámbé ba-ca ajî-byifen echi ḿbyí ba/mû ba-kyâ orím-bukye mú Mówep ofê. Banet ḿbé Ézerel ba/ryí byiryíng ámbyi ba-kye

³ orím-bukye-Bâl mú Pôo ofê. Ké bubwô ámbu, Óburúkpâbí o/mû o/sa kafâ ne mbé,

⁴ ne o-raa ne Músis o/fu, ké ofê ejí, kúng kángkáng banet-ashí ḿbé Ézerel a-shwân kámbé [ne esû wááng,] ne me n/chi m-mîng kafâ esa ne banet-Ézerel.

⁵ Músis o-raa ne banet-ashí-oshê o/fu, nang yeě ké burwám enen oju onyinchéng nang orá mú o/fím kyikû-banet eyên, mú o/firi nkye Bâl mú Pôo ofê.

⁶ Onet-Ézerel obónge o/kúng onyinyi-Médyan o-da-nung ké mpyep emen mú badabi ké kyídí, Músis ne oshê kángkáng ba/ri ǎ ké nkéré mbé mbe ba-tii ng bukyû ké ocím-dyifyi-mpyep mú Óburúkpâbí odakyú.

⁷ Ké nkéré Fyinéhas mú wǎn-Elyǎza, mú wǎn-Éron, mú nchi kyifen-Osówo o/ri ńkyín, nyǐ o/bûu nensang o-dim o-mîng burwám-banet. O-kúng kyíbye,

⁸ o-nung o-kâm mú onyinchéng ámu ne mú onyinyi ké kafâ-mpyep, o-tím kámbé ashí afee kyíbye kyi-nung ké byiko. Ké bubwô ámbu, kyibî-orwôm mú o/mû o-ju ng banet-Ézerel o/man.

⁹ Nké mǔ o/mû oo/wá o-ju égot-banet etánge etánge ké byikit bujam esim byinyii.

¹⁰ Óburúkpâbí o-raa ne Músis o/fu,

¹¹ ké bubwô-chwǒm ńkyí Fyinéhas o/chi, kafâ ka*fí to ka-sa ng mě ne banet-Ézerel*. Nyǐ o*da/bángê o/fu, bakye osówo okíri ofê* kyi-cibi ne me*. Bubwô ámbu nké n*da/ju kámbé ké kafâ esa ejí*.

¹² Ké bubwô ámbu, sét ǎ a/fu, me mu n-ryí i ocím ne nyǐ mú o/chi o-waa ké kángkáng nkéré mú mu o-bâ.

¹³ Nyǐ ne bwǎn emen ba-waa ng banchi kyifen ejí ne banyá, ké nǎ, nyǐ o*da/bángê chwǒm kyi-kan bujinjang ne me* ne oo/chi m-pwoo banet-Ézerel ké byibî ebe.

¹⁴ Onet-Ézerel mú ba/ju ǎ ne onyinyi-Médyan o/mû o-bángê e Zímiryi, mú wǎn-Sálu, ne o/mû onet-dyishí-kyikim-banet ńkyí kyikû-banet ńkyí Syímyon.

¹⁵ Onyinyi ámu o/mû o-bángê e Kúzebyi. Zû mú bonchí emen o/mû onet-dyishí-kyikim-banet ńkyí banet ḿbé Médyan.

¹⁶ Óburúkpâbí o-kye Músis busa o/fu,

¹⁷ kye banet-Médyan bunwa a-ju kámbé,

¹⁸ ké bubwô-kyibî-chwǒm ńkyí ba/chi běn ké nkéré ba/nîm běn ké Pôo, ne ké bubwô ḿbú Kúzebyi mú ba/ju ǎ ké nkéré kyibî-orwôm kyi/ju banet ké Pôo.