Nómba 24 - Bokyi Bible

¹ Kántîk nké Bálim oo/nyît o/fu, Óburúkpâbí mu o-ryuu ng ǎ o/fu, nyǐ ojware banet-Ézerel. Ké bubwô ámbu, nyǐ o*da/chîce epé esô* wǎ eringe o/mû oo/chi*. O-bírî kashú ḿbú kyikim-dyikán

² o-ri banet-Ézerel ké baa/bi boompyep ké byikû ké byikû. Busa ḿbú Busun-Osówo bu-nung ǎ ké byiko,

³ ne nyǐ o-sét kyitwóm ńkyín wǎ mkpábé-Osówo, o/fu, nyín kyitwóm ńkyí Bálim mú wǎn-Bwô, ne ejá nyí onyinchéng mú [odaman eri kanong kanong.]

⁴ Yeě odaman ejwo ńkyí Osówo mu o-sét ng. Ne achi yǒo, me mu n-ri ng chwǒm-akat ké burê ńkyí kyi/fím ne Osówo mú o/rêe o-shwôm.

⁵ Boompyep ḿbú badabi ké kyídí, ḿbú Ézerel mbu bu-nwa ng bunong

⁶ wǎ etáng-bayêp nyí etangetang, ne wǎ byifát ḿbyí mbyi bukô-kace, ne wǎ kyichí ńkyí badakó álos, ńkyí Óburúkpâbí o/kwón, ne wǎ byichí-séda ḿbyí ké bukô-kace. [

⁷ Banet-Ézerel ba/chi ba-já omu chwóó mú odana, ne ba/chi ba-kwón esang-byichí ebe ké byifát ḿbyí mbyi ne omu kanong kanong.] Otu ebe o/chi o-kyú kiǐtí-onet o-shwôm Otu Ágak, ne butu emen bu/chi bu-káng bu-byí tete.

⁸ Osówo o/fîm kámbé ba-byí ké Éjip. Nyǐ mu o-nwa ng o-kyâ kámbé wǎ kyibî-enyam. Mbé mbe ba-ju ng banet-bushwôn ebe, ba-sé ng kámbé byikúú, ba-shiryi ng abán ebe.

⁹ Oshê-Ézerel mu wǎ ekpang nyí ké nkéré e-kú e-rê ng, onet o*fí mú odakan o/fu, nyǐ o-jwóbê ng kányí*. Nang yeě nké o/jware Ézerel, ba-jware ng ǎ to. Nang yeě nké o/fé kyibî-nshwam o-kye Ézerel, ba/chi ba-fé kyibî-nshwam ba-kye ǎ to.

¹⁰ Otu Bálek o-myii abwô ké busa-dyityém, o-raa ne Bálim o/fu, me n/kó ǒ n/fu, afé kyibî-nshwam a-kye banet-bushwôn ejí, nké kampén ka/firi kachât kántîk ńké wo aa/bwa a-jware kámbé.

¹¹ Ca a-dim dyijê kántîk. Me m/mû n/ryí ocím n/fu, n-kyâ ǒ eyáré. Nké Óburúkpâbí o*da/bángê o/fu, wo akoo kányí*.

¹² Bálim o-faa o/fu, me n/sét banet-kyitwóm ḿbé wo a/twóm ba-bâ ba-kâm mě n/fu,

¹³ nang wo a/bwa a-kye mě kángkáng basyílyíba ne bagûl ḿbé ké kyibám-butu eyên, me mm*man ené ńkyí Óburúkpâbí o/sét* n-chi chwǒm nang kyibónge ké kakim ejí*. Me n-sét ng ńkyí Óburúkpâbí o/fu, me nsét nké nke.

Nkuli Kyikû-Byiraa ḿbyí Bálim o/sét wǎ Mkpábé mú odasét Byiraa-Osówo

¹⁴ Bálim o-raa ne Otu Bálek o/fu, kántîk, me n-kú m-bwa ng esim n-kâm banet ejí. Nké ne n-kûdim, me mu n-kuri ng ǒ ekó kyi-kim ne ńkyí banet-Ézerel ba/chi ba-chi banet eyên ké nkéré mú mu o-bâ ké kashú.

¹⁵ Ne o-sét kâng kyitwóm ńkyín wǎ mkpábé-Osówo o/fu, nyín kyitwóm ńkyí Bálim mú wǎn-Bwô, ne ejá nyí onyinchéng mú [odaman eri kanong kanong.]

¹⁶ Yeě odaman ejwo ńkyí Osówo mu o-sét ng, o-koo bubong ne nyǐ mú mu kyíbóng kyíbóng. Ne achi yǒo, me mu n-ri ng chwǒm-akat ké burê, ńkyí kyi/fím ne Osówo mú o/rêe o-shwôm.

¹⁷ Me n/kan achi ké nkéré mú mu o-bâ ké kashú, ne n/ri oshê mú Ézerel. Otu mú mu wǎ ókpére-dyicófóróng mú ragerage o/chi o-byí ké oshê ámu. Nyǐ o/chi o-fím ké Ézerel o-bâ wǎ kasabang. Nyǐ o/chi o-ju banet-ashí ḿbé Mówep, ne o/chi o-shiryi kángkáng [banet ḿbé Sêt.]

¹⁸ Nyǐ o/chi o-kpógê banet-bushwôn emen ké Édom, o-chi esí ebe e-firi nyí emen, Ézerel e-kpógê ng e-câ kashú.

¹⁹ Oshê mú Ézerel o/chi o-cím kámbé o-fé kyísí, o-ju bankuli kyikû-banet ḿbé ba/mû ba/waa bakpó.

²⁰ Ké chwǒm-akat emen eri kâng, Bálim o/ri banet ḿbé Amálek, ne o-sét kyitwóm ńkyín wǎ mkpábé-Osówo o/fu, oshê-Amálek o/mû ne busa o-shwôm kángkáng eshê. Nké ké nkuli kyikû, mǔ o/chi o-tánê ne banyá.

²¹ Ké chwǒm-akat emen eri, nyǐ o/ri banet ḿbé Kên, ne o-sét kyitwóm ńkyín wǎ mkpábé-Osówo o/fu, kyikit ńkyí ben bamu ba-kyú u ké nkyí kyi*fí ne bushî*. Chwǒm kii*ta kánkyí* wǎ dyiju-kanurung ńdyí ndyi nyáám kyíbóng-kiǐmbém. [

²² Nké ba/chi ba-ju běn ké nkéré banet-Asyírya baa/kám běn wǎ básóng.]

²³ Bálim o/sét kyitwóm ńkyín wǎ mkpábé-Osówo o/fu, [ebóng banet něen ḿbé mbe ba-cibi ng ké kyicê ńkyí bushûyû.]

²⁴ Bannwa byití ba/chi ba-fím ké Sápurus ké bǎnsukyíkang. Mbé ba/chi ba-kpógê Asyírya ne Ebá. Nké mbé to ba/chi ba-tánê ne banyá.

²⁵ Bálim kâng o-kpá byiko o-dim dyijê. Otu Bálek o-dim kiǐfáng ńkyí emen.