Nómba 23 - Bokyi Bible

¹ Bálim o-raa ne Otu Bálek o/fu, bi mě byikit-kyifen-Osówo echi káchâtkányi nyín, a-bâ mě to ne batyép-mpong káchâtkányi ne etyítǎm káchâtkányi.

² Otu Bálek o-chi eringe nyí ba/sét ǎ. Nyǐ ne Bálim ba-kúng otyép-mpong obónge obónge ne otyítǎm obónge obónge ba-chi byifen ké byikit-kyifen-Osówo echi byimúmú.

³ Bálim kâng o-raa ne Otu Bálek o/fu, bwom nyín ké bukô-byifen ḿbyí a/chi, me n-ca n-da-ri â Óburúkpâbí o/chi o-bâ o-kâm mě, nang oo*bê o*. Me n/chi n-sét ǒ nang ebóng chwǒm ńkyí nyǐ oda mě esét. Bálim kâng o-dim kǎnchí ḿbú kyíbóng-kaku,

⁴ ne Osówo o/byí o-kâm ǎ. Bálim o-raa ne Osówo o/fu, me mm/bi byikit-kyifen echi eyên ámbyi káchâtkányi, ne nn/ju mpong ne ebû ké mbyí byimúmú n-chi byifen.

⁵ Óburúkpâbí o-sét Bálim ńkyí o/chi o-sét, ne o-twóm ǎ o-bwa esim o-kâm Otu Bálek ne kyitwóm.

⁶ Bálim kâng o-bwa esim o-ri ké Otu Bálek o/tôong cip ne kángkáng banet-ashí-Mówep ké bukô-byifen ḿbyí o/chi.

⁷ Bálim o-sét kyitwóm ńkyín wǎ mkpábé mú odasét byiraa-Osówo o/fu, Otu Bálek mú otu-Mówep oo/kúng mě ké [Syírya,] ké eku nyí kyicê ńkyí óbyísû odabyí, o-bâ ne me o/fu, bâ a-ba-raa ké bubwô ejí. Fé kyibî-nshwam a-kye banet-Ézerel.

⁸ Me n-cen n nǎ ne n-fé kyibî-nshwam n-kye chwǒm ńkyí Osówo o*da/shú*. N-raa nang kyi-kim ne bukyû, â Óburúkpâbí o*da/raa kyi-kim ne mbú*.

⁹ Me mu m-bwom m ké aká nyí nyáám n-ri kámbé. Me m-bwom m ké eku n-tún n kámbé. Mbé ba-chi i oshê mú odakyú kǎnchí. Mbé mbe ba-nyît ng ba/fu, Osówo o/jware kámbé o-shwôm banet-bushûyû.

¹⁰ Bwǎn ḿbé Ézerel ba/jê wǎ édúkǎndú. Mbé baa*nwa epan*. Mîng mě n-kúlî ací ejí wǎ onet mú Osówo. Mîng mě m-kpú ké bunyîn-dyityém wǎ banet ḿbé mbe ba-chi i kanong.

¹¹ Otu Bálek kâng o-raa ne Bálim o/fu, wo aa/chi mě ebóng. Me n/kó ǒ a-bâ nyín n/fu, afé kyibî-nshwam a-kye banet-bushwôn ejí. Nké wo aa/bwa a-jware ojwáráng kámbé.

¹² Bálim o-faa o/fu, me m-man n esét ńkyí Óburúkpâbí o/sét mě o/fu, me nsét nké nke.

Nnyinyěng-Byiraa ḿbyí Bálim o/sét wǎ Mkpábé mú odasét Byiraa-Osówo

¹³ Otu Bálek o-raa ne Bálim o/fu, bâ ne me byi-dim ké kyikit kyikíri ńkyí adabwom a-ri kyicê-banet-Ézerel kyikíri nké nke. Fé kyibî-nshwam nyín ké bubwô ejí a-kye kámbé.

¹⁴ O-kúng Bálim ba-dim ḿbú kyifát ńkyí Zófim, kyíbóng-kaku ńké Pyísaga. Nyǐ o-bi to byikit-kyifen-Osówo echi káchâtkányi ányi o-ju otyép-mpong obónge obónge ne otyítǎm obónge obónge ké byikit ámbyi byimúmú.

¹⁵ Bálim o-raa ne Otu Bálek o/fu, bwom nyín ké bukô-byifen ḿbyí a/chi, ne me n/chi n-kâm Osówo áku.

¹⁶ Óburúkpâbí o-kâm Bálim o-sét ǎ ńkyí o/chi o-sét, ne o-twóm ǎ o-bwa esim o-kâm Otu Bálek, o/fu, osét ǎ kyitwóm ánkyi.

¹⁷ Bálim o-bwa kâng esim o-da-ri Otu Bálek ké o/tôong ányi cip ne banet-ashí-Mówep ké bukô-byifen ḿbyí o/chi. Otu Bálek o-bí Bálim ńkyí Óburúkpâbí o/sét,

¹⁸ ne Bálim o-faa o-sét kyitwóm ńkyí mkpábé mú odasét byiraa-Osówo, o/fu, bâ, ǎ Otu Bálek mú wǎn-Zípo, a-ba-jwo ńkyí me nda ǒ esét.

¹⁹ Osówo o*fí wǎ banet* ḿbé badasét byisédéng*. Nyǐ o*fí wǎ onet* mú odayángê dyityém emen*. Nang ebóng ńkyí nyǐ o/ryí ocím, mu o-chi i kánkyí. Ńkyí nyǐ odaraa kyi-chi i éné.

²⁰ Baa/sét mě ba/fu, me njware banet, ne â Osówo o/kye ojware, me mm*man to ekoo ojware ámu o-bwa esim ne mǔ*.

²¹ Me nn/ri n/fu, dyikpen ńdyí Ézerel ńdyí ndyi dyi-bâ dii*ba/chi dyi-bâ kámbé ne busông* nang afaníkong*. Osówo Óburúkpâbí ebe mu ne mbé. Mbé mbe ba-sét ng ba/fu, nyǐ o-chi i Otu ebe.

²² Osówo oo/fîm kámbé ba-byí ké Éjip. Nyǐ mu o-nwa ng o-kyâ kámbé wǎ kyibî-enyam. [

²³ Kiǐré-bukye kyi*fí* nang bucí bu*fí* ḿbyí ba-nwa ne oshê mú Ézerel*.] Kántîk, banet ba/chi ba-raa kyi-kim ne Ézerel ba/fu, ri n̂g ńkyí Osówo oo/chi kámbé.

²⁴ Oshê mú Ézerel mu wǎ ekpang. Nyǐ ee*jang* tete e-ju e-ryí, tete e-jwáp baróng ḿbé enyam nyí nyǐ ee/ju.

²⁵ Otu Bálek o-raa ne Bálim o/fu, wo aa/né kyibî-nshwam efé a-kye banet-Ézerel, nké *dachi a-bwa to a-jware kámbé*.

²⁶ Bálim o-faa o/fu, me n*da ǒ esét n/fu, me n-chi i nang ebóng chwǒm ńkyí Óburúkpâbí o/sét mě*?

Byiraa ḿbyí Bálim o/sét ké Kampén Kachât wǎ Mkpábé mú odasét Byiraa-Osówo

²⁷ Otu Bálek o-raa o/fu, bâ ne me ké kyikû. Me n/chi n-kúng ǒ byi-dim kyikit kyikíri. Kakíri Osówo o/chi o-bángê ǒ a-fé kyibî-nshwam ányi ké bubwô ejí a-kye kámbé.

²⁸ Nyǐ kâng o-kúng Bálim ba-dim kyíbóng-kaku ńké Pôo, ńké ka/bírî kashú ké kyicê ńkyí kyikim-dyikán.

²⁹ Bálim o-sét ǎ o/fu, bi mě byikit-kyifen-Osówo echi káchâtkányi nyín, a-bâ mě to me batyép-mpong káchâtkányi ne etyítǎm káchâtkányi.

³⁰ Otu Bálek o/chi eringe nyí ba/sét ǎ, o-kúng otyép-mpong obónge obónge ne otyítǎm obónge obónge o-chi byifen ké byikit-kyifen-Osówo echi ámbyi byimúmú.