Nómba 22 - Bokyi Bible

Otu Bálek o/twóm ba-kó Bálim

¹ Banet-Ézerel ba/ce kashú ne bucen ebe ba-ba-bi oshê ké ndege-esí mú Mówep, ké esim-kace ńké Jódan nyí esû edabyí, fáráng ne Jéríku.

² Ké nkéré otu mú Mówep, mú odabángê Otu Bálek, mú wǎn-Zípo, o/jwo chwǒm ńkyí banet-Ézerel ba/chi banet-Ámórit ne eringe nyí banet-Ézerel ba/jê,

³ bushî bu/róng ǎ ne banet emen kángkáng.

⁴ Banet-Mówep ba-raa ne batu-ashí ḿbé Médyan ba/fu, dyibóng-banju banet ńdyín dyi-man n ne kángkáng byěm ḿbyí mbyi bě nyín fáráng, wǎ otyép-mpong mú mu o-ryí i biǐbyâa ké kyikit-aro. Ké bubwô ámbu kâng, Otu Bálek

⁵ o-twóm banet-kyitwóm o/fu, bakó Bálim mú wǎn-Bwô, mú o/mû ké oshê mú Péto, fáráng ne kace ńké Yuférétyis, ké esí nyí Áma. Ba/basét Bálim kyitwóm ńkyí Otu Bálek o/twóm ba/fu, Otu Bálek o/fu, nyǐ mu o-ryuu ng o/fu, wo anyît a/fu, kyirim-oshê ńkyí kyi/fím ḿbú oshê-Éjip baa/bê, ne mbé mbe ba-pwôo ng byiryibyiryi ba-câ kángkáng byikit, ba-kan n ba/fu, mbé bakoo esí eten.

⁶ Mbé ba/jê ba-shwôm bě, ne ké bubwô ámbu, kamgbe, wo abâ a-ba-fé kyibî-nshwam a-kye banet ḿbén ké bubwô emen. Kakíri ké bubwô ámbu kâng, be byi/chi byi-man ekpógê kámbé byi-nwa ne mbé ba-byí bě ké esí. Nyǐ mu o-nyît ng o/fu, ojware o-kyú u ne banet â wo a/sét banet ámbe ejá nyí ojware, ne â a/fé kyibî-nshwam a-kye kámbé, kyibî kyi-róng ng kámbé.

⁷ Banet-ashí ḿbé Mówep ne ḿbé Médyan ba-kúng kâng akpuga nyí badakye ké kyibî-nshwam efé ánkyi ba-dim ba-kâm Bálim ba-da-sét ǎ kyitwóm ńkyí Otu Bálek o/twóm.

⁸ Bálim o-sét kámbé o/fu, rí n̂g nyín, ne nencí n/chi n-sét běn nang ebóng chwǒm ńkyí Óburúkpâbí o/chi o-sét mě. Ké bubwô ámbu kâng, mbé ba/waa ányi ne Bálim.

⁹ Osówo o/bê o-kâm Bálim, o-bí Bálim o/fu, banyinchéng ḿbé mbe něen ne wo ba-chi i ebóng banet.

¹⁰ Bálim o-faa o/fu, Otu Bálek mú Mówep nké o/twóm kámbé kyikit ejí o/fu, baba-sét mě ba/fu,

¹¹ kyirim-oshê ńkyí kyi/fím ḿbú Éjip kii/pwôo kyi-káng esí eten emúmú. Nyǐ mu o-ryuu ng o/fu, me nfé kyibî-nshwam n-kye kámbé ké bubwô emen, eringe nyí nyǐ o/chi o-man ekpógê, o-ró kámbé ba-byí.

¹² Osówo o-raa ne Bálim o/fu, *dachi a-ca ne banyinchéng ḿbén ké kyikû* ne *dafé kyibî-nshwam a-kye banet ḿbé Ézerel* ké nǎ, me nké nn/jware kámbé.

¹³ Ké orî-dyicófóróng, Bálim o-dim o-kâm banet-kyitwóm-Otu Bálek o-raa ne mbé o/fu, bwa n̂g esim dyijê. Óburúkpâbí o*da/bángê o/fu, me nca ne ben*.

¹⁴ Ké bubwô ámbu, mbé ba/bwa esim ba-kâm Otu Bálek ba-sét ǎ ba/fu, Bálim oo/né ebê ne mbé.

¹⁵ Otu Bálek kâng o-twóm banet-ashí ḿbé ba/jê ba-shwôm ḿbé ba/mû biǐtí-banet ba-shwôm ḿbé mbwôp kashú.

¹⁶ Mbé ba/ce ba-kâm Bálim ba-da-sét kyitwóm ńkyí Otu Bálek o/twóm, o/fu, kamgbe, *damîng chwǒm nang kyibónge kyi-chi ǒ a-mîng ebê kyikit ejí*.

¹⁷ Me n/chi n-kye ǒ eyáré chwóó, n-chi nang ebóng chwǒm ńkyí wo a/fu, me nchi. Kamgbe, bâ a-ba-fé kyibî-nshwam a-kye banet ḿbén ké bubwô ejí.

¹⁸ Nké Bálim o-faa o/fu, nang Otu Bálek o-bwa o-kye mě kángkáng basyílyíba ne bagûl ḿbé mbe ké kyibám-butu emen, me mm*ba/chi m-man ené ńkyí Osówo Óburúkpâbí ejí o/sét mě* nang ké kaǎnyín-chwǒm*.

¹⁹ Nké rí n̂g nyín wǎ eringe nyí ḿbé áku ba/rí, eringe nyí me n/chi n-nyît â Óburúkpâbí mu ne chwǒm kyikíri ńkyí oda mě esét, nang o*fí ne nkyí*.

²⁰ Ké buchú ámbu, Osówo o/bê o-kâm Bálim, o-raa o/fu, â banyinchéng ḿbén ba/bê ǒ efu, wo aca ne mbé ké kyikû, kpá byiko ḿbyí adace, nké chi ńkyí nda ǒ esét nké nke.

²¹ Ké bubwô ámbu kâng, ké orî-dyicófóróng, Bálim o-yú kaanyam-atû emen o-dim ne banet-ashí ḿbé Mówep ké kyikû.

Bálim ne Kaanyam-Atû Emen

²² Osówo o/mû o-sa ng kafâ, ké nǎ, Bálim o/mû mu o-wâa ng, ne ké nkéré mú Bálim mu o-yú u kaanyam-atû emen o-câ ne bǎmgbán emen ashí afee ké kyikû, orím mú Óburúkpâbí o/bwom o-ku ǎ ké bukwóp.

²³ Ké nkéré mú kaanyam-atû ka/ri orím mú onong ányi cip ne kashwám ké bubwô, ka/mîng bukwóp ka-pyángê ka-jâ ké kafâ-byifát. Bálim o-mín kánké o-bwa ne nké ké ndûm.

²⁴ Orím mú onong ámu kâng o-da-bwom ké kyikit ńkyí bukwóp bu*da/nere* ńkyí ké otyém ne otyém byifát byifee, ne bakô emen bamúmú ba/mû ne ero nyí ba/chi ké aká.

²⁵ Ké nkéré kaanyam-atû ánke ka/ri orím mú onong ámu, nké ka/pyángê ka-jêem ké bukô-oro ámu, ka-sît Bálim kyiká ké oro. Bálim o-chîmín kánké.

²⁶ Orím mú onong ámu o-chîshwôm kashú, o-da-bwom ké kyikit-bukwóp ńkyí nkyi kaǎsídi, ńkyí mpât o*fí nang kaǎnyín* mú onet odapyángê ké kyicê nang kyirá*.

²⁷ Ńdyí kaanyam-atû ka/chîri orím mú onong ámu, nké ka/cít kyísí. Kafâ ka-bírî Bálim, ne o-kúng kachí emen o-kpet emín kánké.

²⁸ Óburúkpâbí kâng o-kye kaanyam-atû ánke busa ḿbú kadaman eraa kyiraa, ne ka-raa ne Bálim ka/fu, me n/chi ǒ ebóng. Ebóng ńkyí aa/mín mě něen ka/firi kampén kachât.

²⁹ Bálim o-faa o/fu, ké nǎ, wo aa/chi mě n-firi wǎ enyam-onet. Â me m/mû ne kashwám m/mû n-ju ng ǒ.

³⁰ Kaanyam-atû ánke ka-faa ka/fu, me nn*chi ochíchí-kaanyam-atû ánke kabónge ńké amu a-yú u ké dyikpen eyên dyimúmú? Me m/mû nn/chi ǒ kpá dyizong ńdyín nang kabónge? Nyǐ o-faa o/fu, aa*wááng*.

³¹ Óburúkpâbí kâng o-mîng Bálim o-ri orím mú onong ányi cip ne kashwám ké bubwô. Bálim o-tím arông kyísí.

³² Orím mú onong ámu o-bí ǎ o/fu, ebóng ńkyí aa/mín kaanyam-atû eyên něen kampén kachât. Me m/bê ǒ ebaku ké bukwóp, ké nǎ, [bucen ḿbún bu*da/kwárê ḿbú adace*.]

³³ Nké kaanyam-atû eyên ka/ri mě, ne ka/pyángê kampén ka/firi kachât. Â ka/mû ka*da/pyángê* me m/mû n-ju ng ǒ m-mîng kánké.

³⁴ Bálim o-faa o/fu, me nn/chi kyibî. Me m/mû n*fí n-nyît ng n/fu, wo amu a-bwom m ké bukwóp a/fu, a-nwa ng ne me*. Nké kántîk, â wo a/kabe a/fu, kyi*da/nwa ńkyí me ndace* me m-bwa ng esim dyijê.

³⁵ Nké orím mú onong ámu o/raa o/fu, cen a-ca ne banyinchéng ḿbén. Nké sét ńkyí me n/sét ǒ n/fu, sét nké nke. Bálim kâng o-cim ne banyinchéng ámbe ké kyikû.

Otu Bálek o/koo Bálim Kanong

³⁶ Ké nkéré Otu Bálek o/jwo ba/fu, Bálim mu o-bâ, nyǐ o/dim edakwárê ne nyǐ ké oshê mú Âa, mú mu ké kace ńké Ánon, ké buti ḿbú Mówep.

³⁷ Otu Bálek o-raa ne Bálim o/fu, ebóng ńkyí a*da/bê* ké nkéré n/twóm n/fu, bâ ké mbwôp kashú*. Wo a/mû a/kabe a/fu, me mm*ba/chi m-man ǒ ekye ńkyí kyida ǒ ekwárê*?

³⁸ Bálim o-faa o/fu, nké mm/bê. Nké kántîk, ebóng busa ḿbú me mu ne mbú. Ńkyí me ndasét kyi*da/shwôm ńkyí Osówo o/fu, me nsét*.

³⁹ Bálim kâng o-dim ḿbú oshê mú Húzot ne Otu Bálek ké kyikû.

⁴⁰ Otu Bálek o-ju bampong ne etám-ebû ké oshê ámu o-kúng kyicê-enyam o-kye Bálim ne banet-ashí ḿbé ba/mû ne nyǐ.

Mbwôp Kashú-Byiraa ḿbyí Bálim o/sét wǎ Mkpábé mú odasét Byiraa-Osówo

⁴¹ Ké orî-dyicófóróng, Otu Bálek o/kúng Bálim ba-dim ne nyǐ kyíbóng-kaku ńké Bámot-Bâl eringe nyí Bálim odari kyicê-banet ḿbé Ézerel.