Nómba 20 - Bokyi Bible

Byěm ḿbyí byi/chi ké Kádyishi

¹ Ké mbwôp kashú-otukáku, kángkáng banet ḿbé Ézerel ba/ribi ké kyikim-dyikán ńkyí badakó Zîn, ba-bi oshê ké Kádyishi. Ányi nké Myíryam o/kpú ba-ryii ǎ.

² Omu o/mû o*fí ké kyikit ńkyí mbé ba/bi oshê*. Ké bubwô ámbu kâng, ba/cibi kyikit kyibónge ba-wâng Músis ne Éron,

³ ba-shwôn ne mbé ba/fu, kyi/mû kyi/chi kyi-nwa kyi-shwôm â be byi/mû byi/kpú ké bushú-mpyep mú Óburúkpâbí odakyú ne báten-banet-Ézerel ké kyikû.

⁴ Ebóng ńkyí ben ba/bê ne be nyín ké kyikim-dyikán eringe nyí be ne byitú eten byidakpú nyín.

⁵ Ebóng ńkyí ben ba/fîm bě ké Éjip ba-bâ ne be ké kyibî-kyikit ńkyín, ńkyí byiryíng byi*fí*. Esang-byichí e*fí*. Byichí ḿbyí badakó fyîk ne pamagáránit byi*fí*. Bato ba*fí*. Nang omu mú ojwábáng o*fí*.

⁶ Músis ne Éron ba-byí ké burwám-banet ba-da-bwom ké ocím-dyifyi-mpyep mú Óburúkpâbí odakyú. Ba-tíngê kyísí, ne busan ḿbú ragerage ḿbú bu/fím ké bushú ḿbú Óburúkpâbí bu-byí bu-kâm kámbé.

⁷ Óburúkpâbí o-raa ne Músis o/fu,

⁸ kúng ochí mú mu ké kashú-mkpukpu-byěm ejí, ne wo kâng ne Éron ba/chi ba-cibi kángkáng banet kyikit kyibónge. Ányi ké bushú ebe kángkáng, ba/chi ba-raa ne buká ḿbé bu/bwom áku éné, ne omu o/chi o-byí ké mbú. Ké bukwóp ḿbún, wo a/chi a-chi omu o-byí ké buká ámbu, mú banet ne byitú ebe badajwáp.

⁹ Músis o-dim o-da-kúng ochí ámu wǎ eringe nyí Óburúkpâbí o/kye busa.

¹⁰ Nyǐ ne Éron ba-cibi banet-oshê kángkáng ké bushú-buká ámbu, ne Músis o-raa o/fu, fwôo n̂g atông ba-jwo, ben mú bambíri bunwa ne Osówo. Ben bamu ba-ryuu ng ba/fu, be byichi omu o-byí ké buká ḿbún byi-kye bên?

¹¹ Músis kâng o-yip ochí ámu kyíbóng o-díp buká ámbu kampén kafee, ne omu o-byí ké mbú chwóó, ne kángkáng banet ne byitú ba-jwáp.

¹² Nké Óburúkpâbí o/raa ne Músis ne Éron o/fu, ké bubwô ḿbú ben ba*da/fé dyityém chwóó ne me* ńdyí badatông busa ejí ḿbú bunong ké bushú-banet-Ézerel* ben baa*tông to kámbé bukwóp* ba-ribi ké esí nyí me n/ryí ocím n/fu, n-kyâ kámbé*.

¹³ Ńkyín kyi/chi ké kyikit ńkyí badakó Meryíba, ńkyí banet ḿbé Ézerel ba/shwôn ne Óburúkpâbí, ne ńkyí nyǐ o/tông kámbé o/fu, nyǐ mu ne kiǐtí-busa.

Otu mú Édom o*da/bángê Banet-Ézerel ba-shwôm*.

¹⁴ Músis o-twóm banet-kyitwóm ké Kádyishi ba-ca ba-kâm otu mú Édom. Mbé ba-sét otu mú Édom ba/fu, kyitwóm ńkyín kyi/fím ne byikû-banet ḿbyí Ézerel, ḿbyí bwǎn-bané eyên. Wo amu a-nyît ng afaníkong nyí be bii/ri,

¹⁵ ne eringe nyí banchí eten ḿbé kpákpá ba/ce ké Éjip ba-da-kyú áku ké bajam-aje. Banet-Éjip ba/tî banchí eten ḿbé kpákpá ne be wǎ básóng,

¹⁶ ne be byi/tii byi-kó Óburúkpâbí byi/fu, ochwáp bě. Nyǐ o/jwo bukyû eten ḿbú byi/tii, ne o-twóm orím mú onong obónge, mú o/tông bě kiǐfáng byi-dim ké Éjip. Kántîk, be byimu ké Kádyishi, oshê mú mu ké buti ḿbú kyikim-esí eyên.

¹⁷ Kamgbe, kye bě busa byi-cen byi-shwôm ké kyikim-esí eyên. Be ne byitú eten bii*mîng ndûm byi-ján ké byifát enen* ne be bii*ba/chi byi-jwáp omu ké ajwáng enen*. Be byi/chi byi-cen ké [ndûm mú bancen busî badacen ké mǔ] tete byi-shwôm kyikim-esí eyên.

¹⁸ Nké banet ḿbé Édom ba/faa ba/fu, be bii*bángê ba-cen ba-shwôm ké oshê mú eten*. Â ba/kan, byi/chi byi-kye běn bunwa.

¹⁹ Banet ḿbé Ézerel ba-raa ba/fu, be byi-cen n ké ndûm ámu nké nke, ne â be nang byitú eten nké byi/jwáp omu enen nang orá, be byi/chi byi-ré dyifwá ké mǔ. Ńkyí byimu byi-ryuu ng, mîng n̂g bě byi-cen byi-shwôm.

²⁰ Banet-Édom ba-chîraa ba/fu, be bii*bángê* ne mbé ba-byí ne bannwa byití chwóó bunwa edakye banet-Ézerel.

²¹ Ké bubwô ḿbú banet-Édom ba*fí ba-bángê e kámbé ba-cen ba-shwôm ké kyikim-esí ebe* banet-Ézerel ba/pín esim ba-cen bukwóp bukíri.

Bukyû ḿbú Éron

²² Kángkáng banet-Ézerel ba-dim ké Kádyishi ba-ba-ribi ké kaku ńké badakó Hôo,

²³ ké buti ḿbú Édom. Ányi nké Óburúkpâbí o/raa ne Músis ne Éron o/fu,

²⁴ Éron oo*ba/chi o-chînung ké kyikim-esí ńkyí me n/ryí ocím n/fu, n-kyâ banet-Ézerel*. Nyǐ o/chi o-kpú, ké nǎ, ben ashí afee ba/bírî bunwa ne me ké kyikit ńkyí badakó Meryíba.

²⁵ Kúng Éron ne Elyǎza mú wǎn emen ba-yú kyíbóng-kaku ńké Hôo.

²⁶ Pii Éron byídí ḿbyí nchi kyifen-Osówo â ba/byí áku, a-fé Elyǎza. Éron o/chi o-kpú ányi.

²⁷ Músis o/chi ńkyí Óburúkpâbí o/kye busa. Mbé ba/yú kyíbóng-kaku ńké Hôo ké bushú ḿbú kángkáng banet.

²⁸ Ne Músis o-pii Éron byídí ḿbyí nchi kyifen-Osówo ké byiko o-fé Elyǎza. Éron o-kpú áku kyíbóng-kaku ánke, ne Músis ne Elyǎza ba-shû kyísí ba-bwa esim.

²⁹ Oshê omúmú ba-jwo ba/fu, Éron oo/kpú, ne mbé ba-ta ǎ dyikán ké ací bujam esim diǐkpú.