Nómba 2 - Bokyi Bible

Eringe nyí ba/nap Banet-Ézerel ké Kafâ-Oshê Ebe

¹ Óburúkpâbí o/sét Músis ne Éron o/fu,

² ké nkéré banet-Ézerel ba-kú ba-bi ng boompyep ebe, onyinchéng nang orá obi boompyep emen ké kyikit ńkyí ba/tî ekap nyí kyikû-banet emen ne kyikim-banet emen. Babi boompyep ebe ba-wâng mpyep mú Óburúkpâbí odakyú ba-fé ké kafâ.

^3-9 Banet ḿbé Júda ba/chi ba-bi boompyep ebe ké kyikit ńkyí ekap ebe, ké byikim ké byikim, ké kyicê-mpyep mú Óburúkpâbí ńkyí óbyísû odabyí. Banet-ashí ebe ba/mû něen. Ké kyikû-banet ńkyí Júda, onet-dyishí o/mû Náshwon mú wǎn-Amínádap, ne ocím-banet emen o/mû égot etánge etánge ké bajam-byikit bachât esim-byikit onyiryiká ne byinyii esim-égot echât. Ké kyikû-banet ńkyí Ézaka, Netánel mú wǎn-Zúwa nké o/mû onet-dyishí, ne ocím-banet emen o/mû égot etánge etánge ké bajam-byikit bafee esim-byikit diǐkpú ne byinyii esim-égot efee. Ké kyikû-banet ńkyí Zébélon, onet-dyishí o/mû Élyap mú wǎn-Hélon, ne ocím-banet emen o/mû égot etánge etánge ké bajam-byikit bafee esim onyiryiká ne byifee esim-égot efee. Ocím-banet omúmú ké byikû-banet ḿbyín byichât o/mû égot etánge etánge ké bajam-byikit kátángekányi esim-byikit nyâchât esim-égot-banet efee. Kyikû-banet ńkyí Júda nké kyidabwóp kashú ké nkéré mú ba/chi ba-jaa oshê ebe.

^10-16 Banet ḿbé Rúben ba/chi ba-bi boompyep ebe ké kyikit ńkyí ekap ebe, ké byikim ké byikim, ké kyicê ńkyí busyísen. Banet-ashí ebe ba/mû něen. Ké kyikû-banet ńkyí Rúben, Elyízu mú wǎn-Shédu nké o/mû onet-dyishí, ne ocím-banet emen o/mû égot etánge etánge ké bajam-byikit bafee esim nyâchât ne égot efee esim-bajam-banet batánge. Ké kyikû-banet ńkyí Syímyon, Shelúmyel mú wǎn-Zúryishadyâ nké o/mû onet-dyishí, ne ocím-banet emen o/mû égot etánge etánge ké bajam-byikit bafee esim-byikit onyiryiká ne byinyii esim-égot ne kyicê. Ké kyikû-banet ńkyí Gât, Elyǎsap mú wǎn-Dúwel nké o/mû onet-dyishí, ne ocím-banet emen o/mû égot etánge etánge ké bajam-byikit bafee esim-byikit byitánge esim-égot-banet efee. Ocím-banet omúmú ké byikû-banet ḿbyín byichât o/mû égot etánge etánge ké bajam-byikit káchâtkányi esim-byikit diǐkpú ne din ne égot-banet efee ne bajam-banet bafee esim diǐkpú. Kyikû-banet ńkyí Rúben nké ba/chi ba-jaa ké boompyep ebe ba-nye banet ḿbé Júda.

¹⁷ Banet ḿbé Lyíva nké ba/chi ba-tû mpyep mú Óburúkpâbí odakyú ba-cen n ba-câ ké otyém ne otyém mú byikû-banet ḿbyí mbwôp kashú byifee ne ḿbyí nryî esim byifee. Kyikû-banet nang kyirá kyi/chi kyi-cen wǎ eringe nyí ba/bi boompyep ebe ké bunye ké bunye.

^18-24 Banet ḿbé Éferem ba/chi ba-bi boompyep ebe ké kyikit ńkyí ekap ebe, ké byikim ké byikim, ké kyicê ńkyí óbyísû odaríbî. Banet-ashí ebe ba/mû něen. Ké kyikû-banet ńkyí Éferem, Elyíshama mú wǎn-Amyíhut nké o/mû onet-dyishí, ne ocím-banet emen o/mû égot etánge etánge ké bajam-byikit bafee esim-égot efee ne bajam-banet batánge. Ké kyikû-banet ńkyí Manáse, Gamályel mú wǎn-Pédazu nké o/mû onet-dyishí, ne ocím-banet emen o/mû égot etánge etánge ké byikit bujam esim diǐkpú ne byifee esim-égot ebónge. Ké kyikû-banet ńkyí Běnjámin, Abyídan mú wǎn-Gyídyonyi nké o/mû onet-dyishí, ne ocím-banet emen o/mû égot etánge etánge ké byikit bujam esim onyiryiká esim-égot efee. Ocím-banet omúmú ké byikû-banet ḿbyín byichât o/mû égot etánge etánge ké bajam-byikit batánge esim nyíryinyi ne bajam-banet batánge. Kyikû-banet ńkyí Éferem kyi/chi kyi-cen kyi-nye ńkyí Rúben.

^25-31 Banet ḿbé Dǎn ba/chi ba-bi boompyep ebe ké kyikit ńkyí ekap ebe, ké byikim ké byikim, ké kyicê ńkyí bushûyû. Banet-ashí ebe ba/mû něen. Ké kyikû-banet ńkyí Dǎn, Ahéze mú wǎn-Amyíshadyâ nké o/mû onet-dyishí, ne ocím-banet emen o/mû égot etánge etánge ké bajam-byikit bachât esim byifee ne égot-banet echât esim bajam-banet batánge. Ké kyikû-banet ńkyí Ásha, Págyel mú wǎn-Ókaran nké o/mû onet-dyishí, ne ocím-banet emen o/mû égot etánge etánge ké bajam-byikit bafee ne din esim-égot efee ne bajam-banet batánge. Ké kyikû banet ńkyí Nafatályi, Ahíra mú wǎn-Énan nké o/mû onet-dyishí, ne ocím-banet emen o/mû égot etánge etánge ké bajam-byikit bafee esim diǐkpú ne byichât ne égot efee. Ocím-banet omúmú ké byikû-banet ḿbyín byichât o/mû égot etánge etánge ké bajam-byikit káchâtkányi esim onyiryiká ne byifee ne égot-banet echât. Kyikû-banet ńkyí Dǎn nké kyidaryí esim ké bucen.

³² Ocím-banet-Ézerel omúmú ḿbé ba/sáng kámbé azîn ké byikim ké byikim ne ké azu ké azu o/mû égot etánge etánge ké égot-byikit echât esim-byikit byichât ne égot-banet efee esim bajam-banet bafee esim diǐkpú.

³³ Wǎ eringe nyí Óburúkpâbí o/kye Músis busa, ba*da/sáng banet-Lyíva azîn ne banet-Ézerel ḿbé áku*.

³⁴ Banet-Ézerel kâng ba-chi kángkáng byěm ḿbyí Óburúkpâbí o/fu, Músis ochi. Nang yeě o/bi boompyep emen ké kyikit ńkyí ekap nyí banet emen, nang yeě o/cen to ké burwám-banet emen.