Nómba 19 - Bokyi Bible

Atông nyí ba/shí Mpong mú Shíshét

¹ Óburúkpâbí o/kye Músis ne Éron busa o/fu,

² bakye banet-Ézerel byije ḿbyín. O/fu, babâ ne mpong mú shíshét, mú o*fí ne kyinêm* ne o*da/chi ne bǎmkpóngé nang kabónge*.

³ Ba/chi ba-kúng kámú ba-kye Elyǎza mú nchi kyifen-Osówo. [Ba-kúng kámú ba-byí ké kafâ-oshê ba-da-ju kámú kyíjí ké bushú ḿbé Elyǎza.]

⁴ Elyǎza kâng o/chi o-kúng kyicê-baróng-mpong ámu o-lip kafwa ké mbé o-myî kámbé kampén káchâtkányi ké kyicê ńkyí mpyep mú Óburúkpâbí odakyú.

⁵ Ba/chi ba-shí kámú omúmú, cibicibi ne ekwop ne enyam ne baróng ne efong ké bushú-nchi kyifen-Osówo.

⁶ Elyǎza kâng o/chi o-kúng kaare-séda kakíri ne kyire-kajang ne bucat ḿbú shíshét o-fé kámbyí ké kafâ-okwâ ámu.

⁷ Ké nkéré oo/chi ńkyí ánkyi, nyǐ o/chi o-soo byídí emen o-pwó omu ké byiko emen byimúmú, ne nyǐ kâng o-man n enung ké kafâ-oshê. Nké nyǐ o-waa ng onet mú bada ǎ eciring tete dyikurúku.

⁸ Onet mú o/shí mpong ámu o-man o-soo to byídí emen o-pwó omu ké byiko emen byimúmú. Nké nyǐ to o-waa ng onet mú bada ǎ eciring tete dyikurúku.

⁹ Onet kâng mú ba*fí ba-ciring ng ǎ* o/chi o-wuri atông nyí ba/shí mpong ámu o-tî kányí ké kyikit-ociring ńkyí kyi*fí ké kafâ-oshê* eringe nyí banet-Ézerel badakûce áku, ba-kúng ng kányí ba-chi i omu mú badachi kyifen ńkyí ociring efîm. Ba-chi i kyifen ńkyín eringe kyidafîm byibî.

¹⁰ Onet ámu mú o/wuri atông ányi o-man o-soo byídí emen. Nké nyǐ o-waa ng onet mú bada ǎ eciring tete dyikurúku. Kyije ńkyín kyi/chi kyi-waa banet-Ézerel ne bacinbánet ḿbé mbe ba-kyú u ne mbé shwaneshwane ké kángkáng nkéré mú mu o-bâ.

Kyikwóm-Okúséta

¹¹ Nang yeě nké o/ta kyikwóm-okúsí, onet ámu o-waa ng onet mú bada ǎ eciring ké ací káchâtkányi.

¹² Nyǐ o-man o-soo byiko emen ké omu mú ociring efîm, â ací a/rí achât, ne â kyi/byí ací káchâtkányi, baa*ciring ǎ to*. Nké â nyǐ o*da/soo byiko emen ké ací achât* nang ké ací káchâtkányi* nyǐ o-waa ng onet-ociring.

¹³ Nang yeě nké o/ta kyikwóm-okúsí ne o*da/soo byiko emen* o-waa ng onet mú bada ǎ eciring, ké nǎ, ba*da ǎ epwó ne omu mú ociring efîm*. Nyǐ o/bên mpyep mú Óburúkpâbí odakyú, ne Osówo oo*kúng ǎ to wǎ onet mú emen*.

¹⁴ Â onet o/kpú ké kafâ-mpyep mú badabi ké kyídí, nang yeě mú o/mû ké kafâ-mpyep ámu ké nkéré onet ámu o/kpú, ne nang yeě mú o/nung ké mǔ, o-firi ng onet mú bada ǎ eciring ké ací káchâtkányi.

¹⁵ Kyiféng nang kyirá ńkyí nkyi ké kafâ-mpyep ámu, ńkyí [ba*da/cít kiinkíbí ké nkyí*] kyi-firi ng to chwǒm ńkyí banet badaciring.

¹⁶ Â onet o/ta onet mú ba/ju ǎ ojǔng, nang o/kpú bukyû buyén kyíjí, nang o/ta kyikúú-onet nang dyikun, onet ámu o-firi ng onet mú bada ǎ eciring ké ací káchâtkányi.

¹⁷ Ne ba-fîm ociring ámu, ba/chi ba-kpare atông nyí mpong mú shíshét, mú ba/shí, nyí adafîm byibî, ba-fé ké katí, ba-fé omu mú ba/tó abeabe ké kace.

¹⁸ Kyi-kim ne onet mú o/kpú ké kafâ-mpyep kâng, onet mú ba*fí ba-ciring ng ǎ* o/chi o-kúng kyire-kajang o-lip kánkyí ké omu ámu o-myî kámú ké mpyep ámu ne ké kángkáng byěm ḿbyí mbyi ké mǔ, ne banet ḿbé ba/mû ányi. Kyi-kim ne onet mú o/ta chwǒm-ociring kâng, onet mú ba*fí ba-ciring ng ǎ* o/chi o-kúng omu o-myî onet mú o/ta kyikúú-onet nang kyikwóm-okúsí nang dyikun.

¹⁹ Ké ací achât ne ké ací káchâtkányi, onet mú ba*fí ba-ciring ng ǎ* o/chi o-kúng omu o-myî onet mú mbe ba-ciring ng ǎ. Ké ací káchâtkányi, nyǐ o/chi o-chi onet ámu kyifen ńkyí ociring efîm, mú o/chi o-soo byídí emen, o-pwó omu ké byiko emen, ne o-firi onet mú baa*ciring ǎ to* ké nkéré dyikurúku dii/fyi.

²⁰ Nang yeě mú o/firi onet mú bada ǎ eciring, ne o*da/soo ne byiko emen* o-waa ng onet-ociring, ké nǎ, ba*da ǎ epwó ne omu mú ociring efîm*. Nyǐ o/bên mpyep mú Óburúkpâbí odakyú, ne Osówo oo*kúng ǎ to wǎ onet mú emen*.

²¹ Ben ba/chi ba-tî kyije ńkyín ké kángkáng nkéré mú mu o-bâ. Onet mú odamyî omu mú ociring efîm o-man o-soo byídí emen to. Nang yeě nké o/ta omu ámu o-waa ng onet mú bada ǎ eciring tete dyikurúku.

²² Nang ebóng chwǒm ńkyí onet mú bada ǎ eciring o/ta kyi-firi ng chwǒm-ociring, ne kyi-waa ng éné tete dyikurúku.