Nómba 18 - Bokyi Bible

Bǎmkpóngé ḿbé Banchi Kyifen-Osówo ne Bǎmgbán Ebe

¹ Óburúkpâbí o-raa ne Éron o/fu, wo ne bwǎn eyên ḿbé banyinchéng ne bǎmgbán-nchi kyifen-Osówo nké badaman ba-ri busông ké kyibî nang kyirá kyi-kim ne bǎmkpóngé echi ké mpyep mú me ndakyú. Wo ne bwǎn eyên kǎnchí nké ba/chi ba-ri busông ké kyibî nang kyirá kyi-kim ne bǎmkpóngé ḿbé nchi kyifen-Osówo.

² Kó bwǎn-bané eyên ḿbé banet-Lyíva ba-bâ ba-kâm ǒ ba-ba-chi bǎmkpóngé ne wo, eringe nyí bada ǒ echwáp ne bwǎn eyên ba-kûchi bǎmkpóngé ké mpyep ejí.

³ Mbé ba/chi ba-chi ǒ bǎmkpóngé ḿbé ba/já kámbé, ne bǎmkpóngé ḿbé ba/já kámbé ké mpyep ejí. Nké mbé baa*man ba-ta byěm-ociring ḿbyí mbyi ké nfût-ociring* ba-ta nang kyikit-kyifen-Osówo echi*. Â ba/ta, mbé cibicibi ne wo ba/chi ba-kpú.

⁴ Mbé ba/chi ba-chi bǎmkpóngé ne wo ba-chi kángkáng byěm ḿbyí byi/já kámbé ké kángkáng bǎmkpóngé ké kafâ-mpyep ámu. Nké onet mú o*da/kwárê* o*dachi o-chi bǎmkpóngé ne wo*.

⁵ Wo ne bwǎn eyên nké ba/chi ba-chi bǎmkpóngé ḿbé ba/kim ne nfût-ociring ne kyikit-kyifen ejí echi, eringe nyí kafâ ejí kaa*sa mě to ne banet-Ézerel*.

⁶ Me nké n/cá bwǎn-bané eyên ḿbé banet-Lyíva ké burwám-banet-Ézerel wǎ eyáré n-kye ǒ. Mbé ba/já mě eringe nyí mbé badakûchi bǎmkpóngé ebe ké mpyep ejí.

⁷ Nké wo ne bwǎn eyên kǎnchí nké badachi kángkáng bǎmkpóngé ḿbé nchi kyifen-Osówo, ḿbé ba/kim ne kyikit-kyifen-Osówo echi ne ḿbé ké ochíchí-nfût-ociring. Byěm ḿbyín mbyi bǎmkpóngé eyên, ká nǎ, me nn/kye ǒ eyáré nyí bǎmkpóngé-nchi kyifen-Osówo. Ba/chi ba-ju nang yeě mú o*da/kwárê* nké o/fárâng byěm-ociring.

Byěm ḿbyí byi/já Banchi Kyifen-Osówo

⁸ Óburúkpâbí o-raa ne Éron o/fu, zîim a/fu, me mu n-kyâ ǒ kángkáng biǐtí-eyáré ḿbyí mbe ba-kyâ mě, ḿbyí ba*da/shí wǎ byifen echi*. Me mu n-kyâ ǒ ne bwǎn eyên kámbyí wǎ kyicê-eyáré ńkyí kyi/já běn ne banyá.

⁹ Ké kiǐtí-eyáré-ociring nyí ba*da/shí ké kyikit-kyifen-Osówo echi* eyáré nyí e/já ǒ nyi eyáré nyí esang-byichí ne eyáré nyí byibî efîm ne eyáré-afwá eré. Nang ebóng chwǒm ńkyí ba/kye mě wǎ eyáré-ociring, kyi/já ǒ wo ne bwǎn eyên ḿbé banyinchéng.

¹⁰ Wo a-man a-ryí byěm ḿbyín ké kyikit-ociring, ne banyinchéng mbé mbe badaryí kámbyí. Kúng kámbyí wǎ byěm-ociring.

¹¹ Biǐtí-eyáré ekíri to nang erá nyí banet-Ézerel ba/kye mě e/chi e-firi nyí eyên. Me mu n-kyâ ǒ kányí, wo ne bwǎn eyên ḿbé banyinchéng ne ḿbé banyinyi ké kángkáng nkéré mú mu o-bâ. Nang yeě nké mu onet-kyikû eyên mú ba*fí ba-ciring ng ǎ* o-man n eryí kámbyí.

¹² Me mu n-kyâ ǒ kángkáng bambwôp kashú-byiryíng wǎ bakút-ólif ne bato ne esang-byichí ḿbyí byinong byinong, ḿbyí banet-Ézerel mbe ba-kyâ mě kángkáng dyije, n/fu, byifiri ḿbyí eyên.

¹³ Mbyí kángkáng byi/já ǒ wo. Nang yeě mú mu onet-kyikû eyên mú ba*fí ba-ciring ng ǎ* o-man n eryí kámbyí.

¹⁴ Nang ebóng chwǒm ńkyí banet-Ézerel ba/kúng ba-kye mě kyi-firi kiǐtí-eyáré-ociring kyi/já ǒ wo.

¹⁵ Mbwôp kashú-wǎn mú onet o/fwon, nang mú kyitú kyi/fwon, mú banet-Ézerel ba/yárê mě, o/já ǒ wo. Nké a-man a-koo akpuga nyí badakye ké dyishí-mbwôp kashú-wǎn ámu ne ba-ré dyifwá ńdyí emen, ne a-man a-koo to akpuga nyí badakye ké dyishí-mbwôp kashú-wǎn-kyitú mú o*fí ne ociring*.

¹⁶ Ba/chi ba-kûré dyifwá ńdyí bwǎsíng ḿbé baa/byí otukáku obónge, ké ocím-kasî mú odatyeem ne akpuga nyí mpyep mú Óburúkpâbí.

¹⁷ Nké bambwôp kashú-bwǎn-mpong ne ḿbé etám-ebû ne ḿbé ebúbǔu baa*man ba-ré afwá nyí ebe*. Mbé ba/já mě me, ne a/chi a-kúng kámbé a-chi kyifen a-kye mě. Pwó baróng ebe ké kyikit-kyifen ejí echi, a-shí bafwám ebe wǎ eyáré-byiryíng nyí kyinung emen kyida mě enyîn.

¹⁸ Byipang-enyam nyí kiǐtí-eyáré ánkyi wǎ kakim ne kyiká-bubwô-etyebéng byi/já ǒ.

¹⁹ Me mu n-kyâ ǒ wo ne bwǎn eyên ḿbé banyinchéng ne ḿbé banyinyi, ké kángkáng nkéré mú mu o-bâ, kángkáng biǐtí-eyáré nyí banet-Ézerel mbe ba-kyâ mě. Nyín ocím mú oo*nwa ebên* mú nn/ryí ne wo ne bwǎn eyên.

²⁰ Óburúkpâbí o-raa ne Éron o/fu, wo aa*ba/chi a-koo esí nang erá nyí badaryí bukyû ké nyǐ* ne kyikim-esí ńkyí Ézerel kyi*fí ńkyí ba/chi ba-kye ǒ*. Wo a/já mě me Óburúkpâbí.

Byěm ḿbyí byi/já Bǎmgbán-Nchi Kyifen-Osówo

²¹ Óburúkpâbí o-raa o/fu, byiryíng nang byirá ḿbyí banet-Ézerel mbe ba-kyâ, ḿbyí ba/kyii kámbyí ké byikit diǐkpú diǐkpú ba-kye mě kyikit kyibónge, me nn/kye bǎmgbán-nchi kyifen-Osówo kyikit ánkyi kyibónge. Ńkyín kyi/bwom wǎ akpuga ebe ké bǎmkpóngé ebe ḿbé mbe ba-tún n mpyep mú ndakyú.

²² Banet-Ézerel ḿbé áku ba*dachîfárâng mpyep ejí* eringe nyí baa*ba/chi ba-fé byiko ebe bukyû ké kyitông*.

²³ Kyi-fím kántîk kyi-ca kashú, bǎmgbán-nchi kyifen-Osówo nké nke badakûtún mpyep ejí, ne nang ebóng busông kyi-kim ne mǔ bu/já kámbé. Kyije ńkyín kyi-waa ng ne banyá, ne kyi/ta to bwǎn ebe. Bǎmgbán-nchi kyifen-Osówo baa*man ba-kyú ne esí nang erá ké Ézerel*

²⁴ ké nǎ, me nn/kye kámbé kyikim-byiryíng kyibónge ké byikim diǐkpú, ḿbyí banet-Ézerel mbe ba-kyâ mě wǎ kiǐtí-eyáré. Nkyí nké kyi/chi ne n-sét kámbé n/fu, mbé baa*kyú ne esí ké Ézerel*.

Kyicê-Byiryíng ḿbyí Bǎmgbán-Nchi Kyifen-Osówo

²⁵ Óburúkpâbí o/kye Músis busa o/fu,

²⁶ osét bǎmgbán-nchi kyifen-Osówo o/fu, â ba/koo kyikit-byiryíng kyibónge ké byikit diǐkpú ne banet ḿbé Ézerel, ńkyí Óburúkpâbí mu o-kyâ běn wǎ chwǒm ńkyí kyi/já běn, ben ba-man ba-kyii kámbyí byikit diǐkpú ba-kye kyibónge wǎ kiǐtí-eyáré nyí Óburúkpâbí.

²⁷ Kiǐtí-eyáré ńnyín e/chi e-kyú wǎ eyáré nyí nyi eringe ebónge ne eyáré-esang-byichí nyí efyîfî ne bato ḿbé bafyîfî nyí badakye.

²⁸ Ké dyizong-bukwóp ḿbún bubónge, ben to ba/chi ba-kye kiǐtí-eyáré nyí e/já Óburúkpâbí ké kángkáng byikit-byiryíng ḿbyí ba/koo ne banet-Ézerel, kyibónge kyibónge. Ben ba/chi ba-kye Éron kiǐtí-eyáré ńnyín nyí Óburúkpâbí.

²⁹ Fîm m̂ kyicê ńkyí kyi/nwa kyi-shwôm ba-kye.

³⁰ Ké nkéré baa/kye kyicê ńkyí kyi/nwa kyi-shwôm, tî n̂g nyí e/waa wǎ eringe nyí onet-Ézerel odatî nyí e/waa, ké nkéré oo/kye eyáré emen.

³¹ Ben ne byikû-banet enen ba-man n eryí ḿbyí áku nang nyá, ké nǎ, mbyí byi-chi i akpuga enen ké bǎmkpóngé enen ké mpyep mú ndakyú.

³² Baa*róng ké kyibî* â ba/ryí kámbyí* â ba/kye Óburúkpâbí kyicê ńkyí kyi/nwa kyi-shwôm*. Nké nyît n̂g ba/fu, ben ba*dachi ba-bên eyáré-ociring nyí banet-Ézerel ba/kye* ké nǎ, baa/wá eryí kányí* ne ba-kûkye byicê ḿbyí byi/nwa byi-shwôm*. Â ba/chi éné, ba/chi ba-ju běn.