Nómba 16 - Bokyi Bible

Kóra ne Datân ne Ábyíram ba/bírî Bunwa ne Músis

^1-2 Kóra mú wǎn-Éza, mú o/fím kyikim-banet ńkyí Kóhat, ńkyí banet-Lyíva, o/rêe dyityém ńdyí odabírî bunwa ne Músis. Banet ashí achât, Datân ne Ábyíram ḿbé bwǎn-Élyap, ne Óne mú wǎn-Pélet, ḿbé ba/fím kyikû-banet ńkyí Rúben, ne égot-biǐtí-banet-ashí-Ézerel ḿbé áku ebónge esim bajam-banet bafee esim diǐkpú, ḿbé oshê ba/cá ba/mû ne Kóra ké kyikû.

³ Mbé ba/cibi kyikit kyibónge ké bushú-Músis ne Éron ba-sét kámbé ba/fu, ben baa/jang ekúng byiko enen kyíbóng ba-shwôm. Kángkáng banet ḿbé oshê mún ba/já Óburúkpâbí, ne Óburúkpâbí mu ne be kángkáng. Ebóng kyi/chi kâng, ǎ Músis, ńkyí wo aa/kúng byiko eyên a-shwôm burwám-banet ḿbé Óburúkpâbí.

⁴ Ké nkéré Músis o/jwo ńkyín, nyǐ o/tíngê kyísí o-fé nshwam.

⁵ Ne o-raa kâng ne Kóra ne banet emen o/fu, nencí ké dyicófóróng, Óburúkpâbí o/chi o-tông běn onet mú o/já ǎ. Nyǐ o/chi o-mîng onet mú o/já ǎ, ányi kyi/byí, onet mú nyǐ o/cá ǎ, o-fárâng ǎ ké kyikit-kyifen emen echi.

^6-7 Nencí ké dyicófóróng, wo ne banet eyên, kúng n̂g acáng nyí badayip okwâ ba-fé amánge-okwâ ne burwan ké nyǐ, ba-kúng kányí ba-ca ne nyǐ ké kyikit-kyifen-Osówo echi. Be byi/chi byi-ri kâng onet ké burwám eten mú Óburúkpâbí o/cá. Ben banet-Lyíva nké baa/kúng byiko enen kyíbóng ba-shwôm.

⁸ Músis o-raa ne be Kóra o-ca kashú o/fu, fwôo n̂g atông ba-jwo, ben banet-Lyíva.

⁹ Ben ba/kabe ba/fu, nkyi kaǎnyín-chwǒm ńkyí Osówo mú Ézerel o/fîm běn ké burwám-banet ḿbé áku o-tî cát eringe nyí ben bada ǎ efárâng ba-chi bǎmkpóngé enen ké mpyep mú Óburúkpâbí odakyú ba-bwom ké bushú-oshê omúmú ba-chi kámbé bǎmkpóngé dí.

¹⁰ Óburúkpâbí oo/kye běn ne kángkáng banet-Lyíva ḿbé áku ofê mún, ne kántîk, ben ba-kú ba-kan n ba/fu, ba-koo ng to bǎmkpóngé ḿbé nchi kyifen-Osówo.

¹¹ Â ben bamu ba-shwôn n ne Éron, Óburúkpâbí ké ntûntû nké wo ne banet eyên bamu ba-bírî ne bunwa ne nyǐ.

¹² Músis kâng o-twóm, o/fu, bakó Datân ne Ábyíram ba-bâ. Nké mbé ba/fu, be bii*bê*.

¹³ Kyi*da ǒ ekwárê ńkyí a/fîm bě byi-mîng banínǒng-esí nyí Éjip a-bâ bě eju nyín ké kyikim-dyikán dí*. Amu a-chî ng eryuu a/fu, a-chi i bě básóng eyên dí.

¹⁴ Wo ké ntûntû a*da/bê ne be ké esí nyí edanwa byiryíng* a-kye bě nang byifát* nang asín-byichí*. Kántîk, wo amu a-kan n a/fu, a-nîm m bě. Be bii*bâ*.

¹⁵ Kafâ ka-sa Músis, ne o-sét Óburúkpâbí o/fu, *dachi a-koo eyáré nang ebónge nyí banyinchéng ḿbén badabê ne nyǐ*. Me n*da/chi onet nang obónge ké burwám ebe kyibî*. Me n*da/koo ne nang kaanyam-atû ebe nang kabónge*.

¹⁶ Músis o-sét Kóra o/fu, nencí, wo ne kángkáng banet eyên ba-man ba-bâ ké mpyep mú Óburúkpâbí odakyú. Éron o/chi o-bwom ányi to.

¹⁷ Nang yeě nang yeě ké burwám enen o/chi o-kúng dyicáng-okwâ emen o-fé burwan ké ndyí ne o-bâ ne ndyí ké kyikit-kyifen-Osówo echi.

¹⁸ Onyinchéng nang orá kâng o/kúng dyicáng-okwâ emen o-fé amánge-okwâ ne burwan ké ndyí o-bwom ké ocím-dyifyi-mpyep mú Óburúkpâbí odakyú ne Músis ne Éron. [

¹⁹ Kóra kâng o-kó kángkáng banet-oshê] ba-bwom ba-bírî Músis ne Éron kashú ké ocím-dyifyi mú mpyep mú Óburúkpâbí odakyú. Ké abe ányi, busan ḿbú ragerage ḿbú bu/fím ké bushú ḿbú Óburúkpâbí bu/byí bu-ta kángkáng banet.

²⁰ Ne Óburúkpâbí o-raa ne Músis ne Éron o/fu,

²¹ *da n̂g ebwom fáráng ne banet ḿbén* ké nǎ, me n/chi m-man ne mbé abeabe.

²² Nké Músis ne Éron ba/tíngê kyísí ba-raa ba/fu, ô Osówo, wo amu a-kyâ kángkáng byěm dyikpen. Wo kafâ ka-sa ng ǒ ne oshê omúmú? â onet obónge o/chi kyibî dí.

²³ Óburúkpâbí o-raa ne Músis o/fu,

²⁴ sét banet-Ézerel a/fu, badim ké boompyep ḿbú Kóra ne Datân ne Ábyíram ba-bwom cát.

²⁵ Músis kâng ne banet-ashí ḿbé Ézerel ba-dim ba-kâm Datân ne Ábyíram.

²⁶ Músis o-raa ne banet-Ézerel o/fu, *da n̂g ebwom fáráng ké boompyep ḿbú bambên atyém-banyinchéng ḿbén* ba-ta chwǒm nang kyibónge ńkyí kyi/ja kámbé*. Â kyi*fí éné* Óburúkpâbí o/chi o-ju běn ne mbé ké kyikû, ké bubwô-byibî ebe kángkáng.

²⁷ Mbé kâng ba-dim ké boompyep ḿbú Kóra ne Datân ne Ábyíram ba-bwom cát. Datân ne Ábyíram ba/mû ba/byí kyíjí, ne ba/mû ba/bwom ké ocím-dyifyi mú boompyep ebe ne banyi ebe ne bwǎn ebe.

²⁸ Músis o-raa ne banet-Ézerel o/fu, něen nké ben ba/chi ba-nyît ba/fu, Óburúkpâbí oo/twóm mě o/fu, me nchi byěm ḿbyín kángkáng, ne ba-nyît to ba/fu, *chí ké okabe mú ejí nké nn/chi kámbyí*.

²⁹ Â banyinchéng ḿbén ba/kpú bukyû buyén ḿbú busông bu*da/fím ne Osówo* Óburúkpâbí kâng o*da mě etwóm*.

³⁰ Nké â Óburúkpâbí o/chi chwǒm-akat, ne esí e-bâa ocím e-myii kámbé ne kángkáng byěm ebe, eringe nyí mbé badajé kyísí okpó ké oshê-bakúsí, ben ba/chi ba-nyît ba/fu, banyinchéng ḿbén baa/né Óburúkpâbí.

³¹ Ńdyí nyǐ o-man n kyiraa o-bâ, esí nyí Datân ne Ábyíram ba/bwom ké nyǐ o/járê,

³² e-myii kámbé ne byikû-banet ebe, cibicibi ne kángkáng banet ḿbé ba/bángê ne Kóra, ne byěm ebe.

³³ Ké bubwô ámbu kâng, ba/jé kyísí bakpó ké oshê-bakúsí ne byěm ebe. Esí e/cít kámbé ba-rím.

³⁴ Kángkáng banet-Ézerel ḿbé ba/mû ányi ba/chêe ké nkéré ba/jwo bukyû ebe ḿbú mbe ba-tii ng. Mbé ba-raa ne ejá kyíbóng ba/fu, byizóngê ochéé. Esí e-man n bě emyii to.

³⁵ Óburúkpâbí kâng o-twóm okwâ mú o/mang o-shí kángkáng égot-banyinchéng ámbe ebónge esim-bajam bafee esim diǐkpú ḿbé ba/shí burwan ámbu.

Acáng-Okwâ

³⁶ Óburúkpâbí o-raa kâng ne Músis o/fu,

³⁷ sét Elyǎza mú wǎn-Éron mú nchi kyifen-Osówo a/fu, oyip acáng-okwâ nyí ba/chi ké borôn, ké byěm ḿbyí byi/waa, ḿbyí banyinchéng ḿbé baa/shí kámbé, ba-pwó amánge-okwâ nyí ké kafâ-acáng-okwâ ké kyikit kyikíri, ké nǎ, acáng-okwâ ányi a/já mě.

³⁸ Nyǐ a/já mě kyi-fím ké nkéré ba/shí burwan ké nyǐ ké kyikit-kyifen echi ńkyí Óburúkpâbí. Ké bubwô ámbu, yip acáng-okwâ nyí banyinchéng ḿbén ḿbé ba/ju kámbé ké dyishí-byibî ebe, a-díp kányí a-firi biǐbáá-borôn, a-kúng kányí a-chi kiinkíbí ńkyí badacít kyikit-kyifen ejí echi. Kyi/chi kyi-kyú banet-Ézerel chwǒm-ekó ekuri.

³⁹ Elyǎza kâng o/kúng acáng-okwâ o-díp kányí a-firi biǐbáá-borôn, o-cít kyikit-kyifen-Osówo echi.

⁴⁰ Ńkyín kyi/mû chwǒm ńkyí kyi/kuri banet-Ézerel ekó kyi/fu, onet mú o*fí ké kyikû ńkyí Éron* o*dachi o-bâ ké kyikit-kyifen-Osówo echi o/fu, nyǐ o-shí i burwan o-kye Óburúkpâbí*. Â kyi*fí éné* ba-ju ng onet ámu wǎ Kóra ne banet emen. Ba/chi ńkyín kángkáng wǎ eringe nyí Óburúkpâbí o/kye Elyǎza busa ké ocím mú Músis.

Éron o/nyii Banet-Ézerel

⁴¹ Ké orî-dyicí, oshê omúmú ba-kpet eshwôn ne Músis ne Éron ba/fu, ben baa/ju banet ḿbé Óburúkpâbí.

⁴² Ké nkéré mú mbé kángkáng baa/cibi kyikit kyibónge edashwôn ne Músis ne Éron, mbé ba/bírî ba-tún ḿbú mpyep mú Óburúkpâbí odakyú, ne mbé ba/ri ba/fu, ófíbí o/mû o/cít kámú, ne ba/ri to ba/fu, busan ḿbú ragerage ḿbú bu/fím ké bushú ḿbú Óburúkpâbí boo/byí.

⁴³ Músis ne Éron ba-dim ba-da-bwom ké kashú-mpyep ámu,

⁴⁴ ne Óburúkpâbí o-raa ne Músis o/fu,

⁴⁵ *dabwon fáráng ne banet ḿbén* ké nǎ, me n/chi n-ju kámbé ké abe. Mbé ashí afee ba-tíngê kyísí.

⁴⁶ Ne Músis o-raa ne Éron o/fu, yip dyicáng-okwâ eyên a-fîm amánge-okwâ ké kyikit-kyifen-Osówo echi a-fé ké ndyí, a-fé to burwan ké amánge-okwâ ányi. Ca ne ndyí babap a-kâm banet-Ézerel ámbe a-da-chi kámbé kyifen ńkyí byibî efîm. Ca babap. Óburúkpâbí oo/tông kafâ esa emen, ne kyibî-orwôm kii/kpet.

⁴⁷ Éron o-chi éné. O-kúng dyicáng-okwâ emen, o-zóngê o-da-nung ké otyém-dyizu-banet ámbe. Ké nkéré nyǐ o/ri o/fu, kyibî-orwôm kii/kpet, nyǐ o/fé burwan ké amánge-okwâ ányi ne o-chi banet-Ézerel kyifen ńkyí byibî efîm.

⁴⁸ Ńkyín kyi/chi orwôm ámu o-man, ne nyǐ o/waa cip ké otyém ne otyém-banet bakpó ne bakúsí.

⁴⁹ Ocím-banet ḿbé ba/kpú o/mû égot-banet etánge etánge ké byikit diǐkpú ne byinyii esim-égot echât ne bajam-banet batánge, ba*da/fé ocím-banet ḿbé ba/kpú ké nkéré mú Kóra o/bírî bunwa*.

⁵⁰ Ké nkéré mú orwôm ámu oo/man, Éron o/bwa esim o-kâm Músis ké ocím-dyifyi-mpyep mú Óburúkpâbí odakyú.