Nómba 15 - Bokyi Bible

Byije byi-kim ne Byifen-Osówo echi

¹ Óburúkpâbí o/kye Músis

² byije ḿbyín o/fu, okye banet-Ézerel ba-kûtî kámbyí ké esí nyí nyǐ mu o-bâ ekye kámbé.

³ O/fu, ba-man n ekúng otyép-mpong nang otyítǎm nang etám-ebû ebónge nang ebúbǔu ebónge ba-kye Óburúkpâbí wǎ kyifen ńkyí badashí kyirim-enyam kyimúmú, nang wǎ kyifen-Osówo echi ńkyí ocím etî mú ba/ryí Osówo, nang wǎ eyáré nyí e/nyîn ǒ ekye ké dyityém eyên, nang wǎ eyáré ekye ké nkéré ajî-byifen enen ḿbyí bamu ba-kyâ Osówo ofê. Kyinung ńkyí eyáré-byiryíng ḿbyín kyi-nyîn n Óburúkpâbí.

^4-5 Nang yeě nké mu o-kyâ Óburúkpâbí ebúbǔu nang etám-ebû wǎ kyifen ńkyí badashí kyirim-enyam, onet ámu o/chi o-cibi ne kyitú ánkyi kyílogaram-filáwa mú badachi berêt obónge, mú ba/chwáp lyíta-bakút-ólif obónge wǎ eyáré-esang-byichí, cibicibi ne lyíta-bato obónge.

⁶ Â o/yárê otyítǎm, o/chi o-kye bakyílogaram-filáwa mú badachi berêt bafee, mú ba/chwáp lyíta-bakút-ólif obónge ne kyicê wǎ eyáré-esang-byichí,

⁷ cibicibi ne lyíta-bato obónge ne kyicê. Kyinung ńkyí byifen ḿbyín kyi-nyîn n Óburúkpâbí.

⁸ Â o/yárê Óburúkpâbí otyép-mpong wǎ kyifen ńkyí badashí kyirim-enyam, nang wǎ kyifen-Osówo echi ńkyí ocím etî mú ba/ryí Osówo, nang wǎ kyifen ńkyí okwáre ne Osówo,

⁹ o/chi o-kye bakyílogaram-filáwa mú badachi berêt bachât, mú ba/chwáp balyíta-bakút-ólif bafee ké mǔ,

¹⁰ cibicibi to ne balyíta-bato bafee. Kyinung ńkyí kyifen ńkyín kyi-nyín n Óburúkpâbí.

¹¹ Â ba/kye otyép-mpong nang otyítǎm nang etám-ebû nang ebúbǔu, ba/chi ba-kye to eyáré ányi kerededet.

¹² Â ba/yárê kyi-shwôm kyitú kyibónge, ba/chi ba-sû byěm-eyáré kerededet ḿbyí mbyi byi-cen n ne eyáré-byitú ányi.

¹³ Onet-Ézerel nang orá mú mu oyén-oshê o/chi o-chi ńkyín ké nkéré o-kú o-kyâ eyáré-byiryíng nyí nyi ne kyinung ńkyí kyidanyîn Óburúkpâbí.

¹⁴ Ne â nang nkéré orá nké ocinónet mú mu o-kyú u ké burwám enen, nang o/bê ekyú ké kyikim-nkéré, nang oo/bajé ojěng ányi, nké mu o-kyâ eyáré-byiryíng nyí nyi ne kyinung ńkyí kyidanyîn Óburúkpâbí, o/chi o-tî byije ámbyi eringe ebónge.

¹⁵ Ké kángkáng nkéré mú mu o-bâ, [kángkáng byije ḿbyín] mbyi byi-ta ng běn ne bacinbánet ḿbé mbe ba-kyú u ké burwám enen. Ben ne mbé bamu eringe ebónge ké bushú ḿbú Óburúkpâbí.

¹⁶ Dyizong-byije dyibónge nké dyi/ta běn ne mbé.

¹⁷ Óburúkpâbí o/kye Músis

¹⁸ byije ḿbyín o/fu, okye banet-Ézerel ba-kûtî kámbyí ké esí nyí nyǐ mu o-bâ ekye kámbé.

¹⁹ O/fu, ké nkéré ba-kú ba-ryí i nang ebóng byiryíng ḿbyí ba/fîm ké esí ányi, kúng n̂g kyicê kyibónge ba-tî cát wǎ kiǐtí-eyáré nyí Óburúkpâbí.

²⁰ Ké nkéré baa/rám berêt, kúng n̂g mbwôp kashú-kyirim-berêt ńkyí mbwôp kashú-berêt mú ba/chi ké esang-byichí nyí efyîfî ba-kye Óburúkpâbí wǎ kiǐtí-eyáré. Kye n̂g ńkyín ké dyizong-bukwóp dyibónge ńdyí bamu ba-kyâ kiǐtí-eyáré nyí esang-byichí nyí ba/kíbî ba-fîm esang emen.

²¹ Ké nkéré mú mu o-bâ kángkáng, kye n̂g Óburúkpâbí kiǐtí-eyáré ńkyín ké berêt mú ben ba/chi.

²² Nké â onet kâng o/róng byije ḿbyín byikíri etî, ḿbyí Óburúkpâbí o/kye Músis, o*da/nyît*.

²³ Ne â nkéré mú mu o-bâ ké kashú nké oshê ba*da/chi kángkáng byěm ḿbyí Óburúkpâbí o/kye busa ké ocím mú Músis*.

²⁴ Â ba/róng ké bubwô ḿbú oshê ba*da/nyît* mbé ba/chi ba-kye otyép-mpong wǎ kyifen ńkyí badashí kyirim-enyam, nyí kyinung emen kyidanyîn Óburúkpâbí, cibicibi ne bachíchí-eyáré-esang-byichí ne eyáré-bato. Mbé ba/chi ba-kye otúbû ba-nye ányi wǎ kyifen ńkyí kyidafîm byibî.

²⁵ Nchi kyifen-Osówo o/chi o-chi kyifen ńkyí byibî efîm ké bubwô-oshê, ne n/chi m-pwoo kámbé, ké nǎ, mbé ba*da/nyît ne ba-róng* ne mbé baa/bê ne eyáré ebe nyí byibî efîm wǎ eyáré-byiryíng-Óburúkpâbí ebakye.

²⁶ N/chi m-pwoo kángkáng banet-Ézerel ne kángkáng bacinbánet ḿbé mbe ba-kyú u ne mbé, ké nǎ, nang yeě o/mû oo/róng.

²⁷ Â onet kǎnchí o/chi kyibî, ké nǎ, nyǐ o*da/nyît* nyǐ o/chi o-kye buma-ebúbǔu bubónge ḿbú boo/rí dyije wǎ kyifen ńkyí kyidafîm byibî.

²⁸ Ké kyikit-kyifen-Osówo echi, nchi kyifen-Osówo o/chi o-chi ǎ kyifen ńkyí byibî efîm, ne me n/chi m-pwoo ǎ.

²⁹ Kyije ńkyín kyibónge kyi/ta nang yeě mú o/chi kyibî, ké nǎ, o*da/nyît*. Onet ámu nang mu oyén-oshê, nang mu ocinónet.

³⁰ Nké nang yeě mú o/tigi ne o-chi kyibî oo/cábê Óburúkpâbí, ne ba/chi ba-ju ǎ, nang mu oyén-oshê nang mu ocinónet,

³¹ ké nǎ, nyǐ oo/né ńkyí Óburúkpâbí o/sét, ne o/tigi otigíng o-bên kyije ńkyí Óburúkpâbí. Nyǐ oyén nké o/cen ne bukyû emen.

Onet mú o*da/tî Dyicí-Ékwâbashi*

³² Nkéré obónge, ńdyí banet-Ézerel ba/tôong ké kyikim-dyikán, ba/ri onyinchéng obónge mú mu o-sá ng ekwón ké dyicí-ékwâbashi.

³³ Ba/yip ǎ ba-dim ne nyǐ ba-kâm Músis ne Éron ne kángkáng banet-Ézerel,

³⁴ ne ba/tî ǎ ké kyikit ńkyí mbe ba-bám m ǎ, ké nǎ, ba/mû ba*fí ba-nyît ng chwǒm ńkyí ba/chi ba-chi ǎ*.

³⁵ Óburúkpâbí o-sét Músis o/fu, baju onyinchéng ámu. Kángkáng banet batím ǎ aká o-kpú ké esim-oshê nyí kyíjí.

³⁶ Ké bubwô ámbu kâng, oshê omúmú ba/yip ǎ ba-byí ne nyǐ esim-oshê nyí kyíjí ba-tím ǎ aká o-kpú wǎ eringe nyí Óburúkpâbí o/kye busa.

Byije byi-kim ne Ecím-Byídí

³⁷ Óburúkpâbí o/kye Músis busa

³⁸ o/fu, osét banet-Ézerel o/fu, chi n̂g byirim-bacat ké ecím-byídí enen ba-fé bucat ḿbú bulûbulu ké kyirim nang kyirá ńkyí ké bakô. Kû n̂g echi ńkyín ké kángkáng nkéré mú mu o-bâ.

³⁹ Byirim ámbyi byi/chi byi-bwom běn wǎ chwǒm ńkyí dyizíím, ne nang ké nkéré orá nké ba/ri kámbyí, ben ba/chi ba-zîim kángkáng byije ejí ba-chi eringe byi/sét, ne ben kâng baa*ba/chi ba-bírî mě esim* ba-chi ńkyí okabe enen mu o-ryuu ng*.

⁴⁰ Byirim ámbyi byi/chi byi-kû běn ezîim ba-tî kángkáng byije ejí, ne ben ba/chi ba-kyú banet ejí kerededet.

⁴¹ Me n-chi i Osówo Óburúkpâbí enen. Me n/fîm běn ba-byí ké Éjip eringe nyí me ndakyú Osówo enen. Me n-chi i Óburúkpâbí.