Nómba 14 - Bokyi Bible

Banet-Ézerel ba/shwôn Bushwôn

¹ Buchú bumúmú banet-Ézerel ba/tii ké bafip.

² Mbé ba-kûshwôn ne Músis ne Éron ba/fu, kyi/mû kyi/chi kyi-nwa kyi-shwôm ńkyí byi/mû byidakpú ké Éjip, nang nyín ké kyikim-dyikán.

³ Ebóng ńkyí Óburúkpâbí mu o-kúng ng bě o/fu, be byiwâa ké esí ányi. Ba/chi ba-ju bě ké byití, ne ba/chi ba-kám banyi eten ne bwǎn eten. Kii*nwa kyi-shwôm* ńkyí byidabwa esim ké Éjip*?

⁴ Ne mbé kâng ba-raa ne barî ba/fu, bâ n̂g byi-cá onet-dyishí byi-bwa esim ké Éjip.

⁵ Músis ne Éron kâng ba-tíngê kyísí ké bushú ḿbú banet kángkáng.

⁶ Ne Jóshwa mú wǎn-Nûn ne Kálep mú wǎn-Jéfúne, ḿbé ba/mû banet-boǒfêp-esí ashí afee, ba-ját byídí ebe ké byiko ké bafip.

⁷ Ne ba-raa ne banet-Ézerel ba/fu, esí nyí be byi/dakyé kyikû kyi-kim ne nyǐ, nyi esí nyí enong enong.

⁸ Â be byimu byi-nyîn n Óburúkpâbí, nyǐ o/chi o-kúng bě byi-byí áku, o-kye bě esí ányi nyí enong enong, ne e-bát ng byiryíng.

⁹ *Da n̂g ebírî bunwa ne Óburúkpâbí* ne *da n̂g eshî banet ḿbé mbe ba-kyú u ányi* kii*sóng bě ne byi-kpógê kámbé*. Óburúkpâbí mu ne be, ne oo/kpógê erím-bakye nyí nyi e-ku ng kámbé. Ké bubwô ámbu, *da n̂g eshî*.

¹⁰ Oshê omúmú ba/mû ba-kyé ng bukwóp ḿbú mbé badatím Jóshwa ne Kálep aká ba-ju. Nké ké abe ányi, banet-Ézerel ba/ri busan ḿbú ragerage, ḿbé bu/fím ké bushú ḿbú Óburúkpâbí ké boo/byí bu-cít mpyep mú Óburúkpâbí odakyú.

Músis o/fé Nshwam o-kye Óburúkpâbí ké Bubwô-Banet-Ézerel

¹¹ Óburúkpâbí o-raa ne Músis o/fu, banet ḿbén ba-né ng mě ka-rí nǎ. Mbé ba-mîng ng atyém ebe efé ne me ka-rí nǎ, nang ké me nn/chi byěm-akat chwóó ké burwám ebe.

¹² Me n/chi n-twóm kyibî-orwôm o-ba-ju kámbé, nké me n/chi n-chi ǒ a-firi bonchí mú oshê mú o/rêe o-shwôm, ne mú o/chi o-kyú ne busa o-shwôm kámbé.

¹³ Nké Músis o/raa ne Óburúkpâbí o/fu, wo a/fîm banet ḿbén ba-byí ké Éjip ké busa eyên. Â nkéré mú banet-Éjip ba/jwo ńkyí wo aa/chi banet eyên,

¹⁴ mbé ba/chi ba-kúng kánkyí ba-sét banet ḿbé mbe ba-kyú u ké esí ńnyín. Banet ḿbén baa/jwo ba/fu, wo, ǎ Óburúkpâbí, amu ne be, ne ba/fu, be byimu byi-ri ng ǒ gbúúl ké nkéré ófíbí eyên oo/bwom o-cít bě, ne ba/fu, ké esû, wo amu a-câ bě kashú ké ófíbí, ne ké buchú, wo amu a-câ bě kashú ké bumang-okwâ.

¹⁵ Kántîk, â wo a/ju kángkáng banet eyên, eshê nyí ee/jwo kyi-kim ne dyizîn eyên e/chi e-raa e/fu,

¹⁶ wo a/ju banet eyên, ké nǎ, wo a/mû a*fí a-man n ekúng kámbé ba-ribi ké esí nyí wo a/ryí ocím a/fu, a-kyâ kámbé*.

¹⁷ Kántîk, ké bubwô ámbu, ǎ Óburúkpâbí, me mu n-fâ nshwam n/fu, tông bě busa eyên, a-chi ńkyí wo a/ryí ocím ké nkéré mú wo a/raa a/fu,

¹⁸ me Óburúkpâbí kyi-sóng ng ne ba-chi kyi-sa mě kafâ, ne me mu n-tông ng kiǐtí-kyijé, ne mu m-pwoo ng byibî ne anwa nyí ba/bírî ne me. Nang ké nkyi éné, me mm*mîng ekye bwǎn ne bwǎn ḿbé bwǎn ebe busông* kyi-byí ké etáng-bwǎn echât ne enyii ké byibî ḿbyí banchí ne bané ebe*.

¹⁹ Nké kántîk, ǎ Óburúkpâbí, ké bubwô ḿbú kiǐtí-kyijé eyên ńkyí kii*man* me mu n-fâ nshwam n/fu, pwoo kyibî ńkyí banet ḿbén wǎ eringe nyí wo aa/pwoo kámbé kyi-fím nkéré mú mbé ba/dim ba-mîng Éjip.

²⁰ Óburúkpâbí o-faa o/fu, me n/chi m-pwoo kámbé wǎ eringe nyí a/fu,

²¹ nké me n/ryí ocím n/fu, ké ntûntû, wǎ eringe nyí me mu okpó, ne wǎ eringe nyí baa/jwo kyi-kim ne dyizîn ejí ké ejíí emúmú,

²² banet ḿbén baa*kpen mú mbé badaribi ké esí ányi*. Mbé baa/ri busan ḿbú ragerage, ḿbú bu/fím ké bushú ejí ne akat-byěm ḿbyí me n/chi ké Éjip ne ké kyikim-dyikán, nké mbé baa/kan kampén kampén ba/fu, kasa mě, ne mbé baa/né echi ńkyí n/fu, bachi.

²³ Mbé baa*ba/chi ba-ribi ké esí nyí n/ryí banchí ebe ḿbé kpákpá ocím*. Onet nang obónge mú oo/né mě oo*ribi ké esí ányi*.

²⁴ Nké ké bubwô ḿbú Kálep mú ḿgbán ejí mu ne dyityém buko, ne o/tôong o-kyâ mě ofê, me n/chi n-kúng ǎ o-ribi ké esí nyí nyǐ o/kyé kyikû kyi-kim ne nyǐ, ne bwǎn emen ba/chi ba-já esí ányi,

²⁵ nyí banet-Amálek ne ḿbé Kínan mbe ba-kyú u ké ewo emen kántîk. Pín n̂ esim nencí ba-dim ḿbú kyikim-dyikán ńkyí ké kyicê ńkyí dyiga ńdyí Ákwaba.

Óburúkpâbí o/kye Banet-Ézerel Busông ké Bushwôn ḿbú ba/shwôn ne Nyǐ

²⁶ Óburúkpâbí o-raa ne Músis ne Éron o/fu,

²⁷ bambên atyém-banet ḿbén ba-shwôn n ne me ka-rí nǎ. Me nn/jwo ńkyí mbe ba-shwôn n něen ne me kyi-kwárê.

²⁸ Kántîk, sét n̂g kámbé ńkyín ba/fu, me n/ryí ocím n-sem dyizîn ejí n/fu, ké ntûntû, wǎ eringe nyí me mu okpó, me n/chi n-chi běn dyizong dyibónge kerededet ne ńkyí ben ba/bí. Me Óburúkpâbí nn/raa.

²⁹ Ben ba/chi ba-kpú. Byikwóm-enyam-byiko enen byi/chi byi-pwôo byiryibyiryi ké kyikim-dyikán ńkyín. Ké bubwô ḿbú ben baa/shwôn bushwôn ne me, onet o*fí nang obónge ké burwám enen mú oo/shwôm aje bujam* mú o/chi o-ribi ké esí ányi*.

³⁰ Me n/ryí ocím n/fu, m-mîng ng běn ba-kyú ké nyǐ. Nké onet o*fí ké burwám enen mú o/chi o-ribi ké nyǐ* kyi-cibi ne Kálep ne Jóshwa*.

³¹ Ben ba/fu, ba/chi ba-kám bwǎn enen, nké me n/chi n-kúng kámbé ba-ribi ké esí nyí ben ba/né, ne e/chi e-kyú esí ebe.

³² Ben ba/chi ba-kpú nyín ké kyikim-dyikán ńkyín.

³³ Bwǎn enen ba/chi ba-zóp ké kyikim-dyikán ńkyín ké bajam-aje bafee, ba-ri ng busông ké bubwô-atyém enen nyí ba*da/fé ne me* tete onet mú o/waa wǎ nryî esim o-kpú.

³⁴ Ben ba/chi ba-ri afaníkong ké dyishí-kyibî enen ké bajam-aje bafee. Dyije dyibónge dyi/bwom ké dyicí nang dyirá ńdyí bajam-ací bafee nyí ben ba/rí bamu ba-kyé ng kyikû kyi-kim ne esí ányi. Ben ba/chi ba-nyît eringe nyí kyi/byí, [ńkyí ba/fu, me n-chi i onet-bushwôn enen.]

³⁵ Me n/ryí ocím n-sem dyizîn ejí n/fu, n-chi i běn ńkyín, ben bambên atyém-banet ḿbé baa/cibi kyikit kyibónge ba-bwom bunwa ne me. Nyín ké kyikim-dyikán nké nang yeě ké burwám enen o/chi o-kpú. Me Óburúkpâbí nn/raa.

^36-37 Ḿbé banyinchéng ḿbé Músis o/twóm o/fu, bada-kyé kyikû kyi-kim ne esí ányi ba/basét ńkyí kyi*fí ntûntû* ne nkyí nké kyi/chi banet-Ézerel ba-shwôn bushwôn ne Óburúkpâbí. Ne ké bubwô ámbu, Óburúkpâbí o/twóm banyinchéng ámbe kyibî-orwôm, ne mbé ba/kpú.

³⁸ Ké burwám-banet-boǒfêp-esí ashí diǐkpú ne afee, Jóshwa ne Kálep nké nke ba/kpen.

Mbwôp Kashú-Nkéré mú ba/kan Esí Ebe ekoo

³⁹ Ké nkéré Músis o/sét banet-Ézerel ńkyí Óburúkpâbí o/raa, mbé ba/tii bukyû kanong kanong.

⁴⁰ Pirípirí ké orî-dyicófóróng, mbé ba-dim edakoo esí nyí eku éku, ba-raa ng ba/fu, kántîk, be bii/kpá byiko ḿbyí byidawâa ḿbú kyikit ńkyí Óburúkpâbí o/sét bě kyi-kim ne nkyí. Be byi/bángê byi/fu, be bii/chi kyibî.

⁴¹ Nké Músis o/raa o/fu, ebóng kyi/chi kâng ńkyí ben kántîk bamu ba-né ng echi ńkyí Óburúkpâbí o/sét. Kii*ba/chi kyi-nwa kyi-kye běn*.

⁴² *Da n̂g ece*. Óburúkpâbí o*fí ne ben* ne banet-bushwôn enen ba/chi ba-kpógê běn.

⁴³ Â ben ba/bwom bunwa ne banet-Amálek ne ḿbé Kínan, ben ba/chi ba-kpú ké byití. Óburúkpâbí oo*ba/chi o-kyú ne ben* ké nǎ, ben baa/né ecen ne nyǐ ké kyikû.

⁴⁴ Nang ké nkyi éné, mbé ba/tigi ba-dim ba-da-nung ké esí nyí eku éku, nang ké mkpukpu-byěm-Óburúkpâbí ne Músis ba/waa ké kafâ-oshê.

⁴⁵ Banet-Amálek ne ḿbé Kínan kâng, ḿbé ba/mû ba-kyú u ányi, ba-kye kámbé bunwa ba-kpógê banet-Ézerel, ba-nwa ne mbé tete ba-ribi ké oshê mú Hóma.