Nómba 13 - Bokyi Bible

Banet-Boǒfêp-Esí

¹ Óburúkpâbí o-raa ne Músis o/fu,

² cá onet-dyishí obónge obónge ké byikû-banet ḿbyí banet-Ézerel diǐkpú ne byifee a-twóm kámbé wǎ banet-boǒfêp-esí ba-da-kyé kyikû kyi-kim ne esí nyí Kínan, nyí me mu n-kyâ banet-Ézerel.

^3-15 Músis o/chi ńkyí Óburúkpâbí o/sét ǎ o/fu, ochi, ne o/fîm banet-ashí ké kyikim-dyikán ńkyí Páran o-twóm. Mbé ba/mû něen. Ké kyikû-banet ńkyí Rúben, Shámwa mú wǎn-Záku nké o/mû onet-dyishí. Ké kyikû-banet ńkyí Syímyon, Sháfat mú wǎn-Hóryi nké o/mû onet-dyishí. Ké kyikû-banet ńkyí Júda, Kálep mú wǎn-Jéfúne nké o/mû onet-dyishí. Ké kyikû-banet ńkyí Ézaka, Égal mú wǎn-Josêf nké o/mû onet-dyishí. Ké kyikû-banet ńkyí Éferem, Hoshâ mú wǎn-Nûn nké o/mû onet-dyishí. Ké kyikû-banet ńkyí Běnjámin, Pálatyi mú wǎn-Ráfu nké o/mû onet-dyishí. Ké kyikû-banet ńkyí Zébélon, Gádyel mú wǎn-Sodyí nké o/mû onet-dyishí. Ké kyikû-banet ńkyí Manáse, Gadyí mú wǎn-Súse nké o/mû onet-dyishí. Ké kyikû-banet ńkyí Dǎn, Ámyel mú wǎn-Gemályi nké o/mû onet-dyishí. Ké kyikû-banet ńkyí Ásha, Sétu mú wǎn-Mákel nké o/mû onet-dyishí. Ké kyikû-banet ńkyí Nafatályi, Nábyi mú wǎn-Búfyishi nké o/mû onet-dyishí. Ké kyikû-banet ńkyí Gât, Gúwel mú wǎn-Mákyi nké o/mû onet-dyishí.

¹⁶ Ḿbén nké ba/mû banet-boǒfêp-esí ḿbé Músis o/twóm o/fu, bada-kyé kyikû kyi-kim ne esí nyí Kínan. Músis o-yángê dyizîn ńdyí Hoshâ mú wǎn-Nûn, dyi-firi Jóshwa.

¹⁷ Ké nkéré Músis o/twóm kámbé, nyǐ o/sét kámbé o/fu, fím m̂ nyín ba-dim ḿbú bushûyû, ba-ribi ké kyicê-busyísen ńkyí esí nyí Kínan, ne ba-ribi kâng ké esí nyí eku éku, nyí bushûyû.

¹⁸ Kyé n̂g kyikû ba-nyît dyizong ńdyí esí ányi nyi, ne ocím-banet ḿbé mbe ba-kyú u ányi, ne eringe nyí mbé mbe ba-shwane e.

¹⁹ Kyé n̂g kyikû ba-nyît â esí ányi nyi e-nwa ng, aa e*fí e-nwa ng* aa banet ḿbé mbe ba-kyú u ányi mbe ba-kyú u ké eshê nyí ba/bi ekpe ba-wâng kányí, ne nang â mbe ba-kyú u ké eshê nyí e*fí ne ekpe*.

²⁰ Kyé n̂g kyikû ba-nyît â esí ányi e-bát ng byiryíng, ne â kyizinge nkyi kô. Ne *da n̂g emîng ebê ne byirim-byichí ḿbyí badachi bato ké mbyí* ḿbyí mbyi byi-zím m ányi*. Kyi/mû ké nkéré mú byirim-byichí ámbyi byidakpet ejîi.

²¹ Banyinchéng ámbe ba-dim kâng ḿbú bushûyû ba-da-kyé kyikû kyi-kim ne esí ányi kyi-fím ké kyikim-dyikán ńkyí Zîn, ké kyicê-busyísen tete ba-ribi oshê mú Réhop, fáráng ne kyikit ńkyí badayú kaku ké Hámat, ńkyí nkyi ké kyicê ńkyí bushûyû.

²² Mbé ba/ce kpá ké kyicê-esí ńkyí busyísen, ne ba-ba-ribi ké oshê mú Héboron, mú mu kyikit ńkyí byikû-banet ḿbyí Ahíman ne Shésha ne Talyimyâ, ḿbé ba/fím ké kyikim-banet ḿbé Ának ba/mû ba-kyú u. Ba/bi Héboron o-rí aje káchâtkányi ne ba-kûbi Zôn mú ké Éjip.

²³ Mbé ba/baribi ké owo mú Éshikol, ne ányi nké mbé ba/két kyire-kyichí, ńkyí kyi/mû ne kiincicôk-byirim-kyichí kyibónge, ḿbyí badachi bato ké mbyí, ńkyí burô emen bu/kúng banyinchéng ashí afee ne ba-tû kánkyí ké byikem ké ochí. Mbé ba/bê to ne byirim-byichí byikíri ḿbyí badakó pamagáránit ne fyîk.

²⁴ Ba/fé kyikit ánkyi dyizîn, Owo mú Éshikol, ké bubwô ḿbú kiincicôk-byirim-kyichí ánkyi ńkyí banet-Ézerel ba/két ányi.

²⁵ Ké nkéré baa/kyé kyikû kyi-kim ne esí ányi ké bajam-ací bafee, banet-boǒfêp-esí ámbe ba/bwa esim

²⁶ ba-kâm Músis ne Éron ne kángkáng banet ḿbé Ézerel ké oshê mú Kádyishi, ké kyikim-dyikán ńkyí Páran. Mbé ba/sét kyi-kim ne byěm ḿbyí mbé ba/ri, ne ba/tông kámbé byirim-byichí ḿbyí mbé ba/bê ne mbyí.

²⁷ Mbé ba-sét Músis ba/fu, be byi/kyé kyikû kyi-kim ne esí-Kínan, ne be byi/ri byi/fu, nyǐ nyi e-nwa ng, ne e-bát ng byiryíng. Nyín něen byirim-byichí ḿbyí byi/fím ké esí ányi.

²⁸ Nké banet ḿbé mbe ba-kyú u ányi mbe ba-shwane e kanong kanong, ne eshê ebe e/rêe kanong kanong, ne ba/bi ekpe ba-wâng kányí. Ńkyí kyi/bwa kyi-bên kyi-shwôn, be byi/ri bwǎn ḿbé Ának ányi.

²⁹ Banet ḿbé Amálek mbe ba-kyú u ké kyicê-esí ńkyí busyísen. Ḿbé Hyítat ne Jébus ne Ámórit mbe ba-kyú u ké esí nyí eku éku. Banet ḿbé Kínan mbe ba-kyú u fáráng ne baya ḿbé badakó Medeterényan ne bakô-kace ńké Jódan.

³⁰ Onyinchéng obónge ké burwám ebe, mú odabángê Kálep, o-chi banet ḿbé [mbe ba-shwôn n ne] Músis ba-cíbî pyêp, ne o-raa o/fu, byikye bunwa kántîk byi-koo esí ányi. Be byimu byi-shwane e byi-kwárê mú byidakpógê kányí.

³¹ Nké banyinchéng ḿbé ba/mû ba/ce ne Kálep ké kyikû ba/faa ba/fu, aa*wááng*. Be byi*fí byi-shwane e byi-kwárê mú byidakye kámbé bunwa*. Banet ḿbé mbe ba-kyú u ányi mbe ba-shwane e ba-shwôm bě.

³² Mbé kâng ba-sét kyisédéng kyi-káng ké burwám-banet-Ézerel kyi-kim ne esí nyí mbé baa/kyé kyikû. Mbé ba-raa ba/fu, esí ányi e*fí e-bát ng nang byiryíng ḿbyí byidakwárê banet ḿbé mbe ba-kyú u ányi*. Onet nang orá mú be byi/ri o/mû kiǐkpôl,

³³ ne be byi/ri nang bwǎn ḿbé Ának. Be byi/mû byi/firi éné boǒníngéníngê wǎ boojujware, ne éné nké be byi/mû kámbé ké achi.